پاتەرلەر كىلتى تابىستالدى
نۇر-سۇلتان قالاسىنىڭ اكىمدىگى قولدان كەلگەنشە باسپانا كەزەگىنىڭ تەزىرەك جىلجۋىنا ىقپال ەتەتىن بار مۇمكىندىكتەردى قاراستىرىپ كەلەدى. سونىڭ دالەلى – قالا كۇنىنە وراي «جاعالاۋ-4 پوليگون 4» تۇرعىن ءۇي كەشەنىنىڭ ۇلەسكەرلەرى جاڭا پاتەرگە قونىستاندى. پاتەر كىلتىن نۇر-سۇلتان قالاسى اكىمىنىڭ ورىنباسارى ەسەت بايكەن مەن ءماسليحات حاتشىسى ەرلان كاناليموۆ سالتاناتتى تۇردە تابىستادى.
– تۇرعىن ءۇي كەشەنىنىڭ قۇرىلىسى 2012 جىلى باستالىپ, نىسان قۇرىلىس سالۋشىلاردىڭ كىناسىنەن 2017 جىلى پروبلەمالىق دەپ تانىلعان. 2022 جىلى «ەلوردا قۇرىلىس كومپانياسى» قۇرىلىستى اياقتادى. مىنە, 9 جىلدان كەيىن 566 ۇلەسكەر قونىس تويىن تويلاۋ مۇمكىندىگىنە يە بولدى, – دەدى نۇر-سۇلتان قالاسى اكىمىنىڭ ورىنباسارى ەسەت بايكەن.
مەملەكەت باسشىسىنىڭ تاپسىرماسى بويىنشا ەلوردادا قولجەتىمدى الەۋمەتتىك تۇرعىن ءۇي قۇرىلىسىنىڭ كولەمى ۇلعايدى. مىسالى, 2018 جىلى – 1100 پاتەر, 2019 جىلى – 2900 پاتەر, 2020 جىلى – 7000 پاتەر, 2021 جىلى شامامەن 10 000 پاتەر سالىندى. جىل سوڭىنا دەيىن تاعى 2000-نان استام ۇلەسكەرگە كىلتتەر تابىستاۋ جوسپارلانىپ وتىر.