استانا اكىمى باقىت سۇلتانوۆ پەن رەسەي فەدەراتسياسىنىڭ قازاقستانداعى ءتوتەنشە جانە وكىلەتتى ەلشىسى الەكسەي بوروداۆكين 2019 جىلعا جوسپارلانعان پەتەربۋرگ پەن چەليابىدەگى استانا كۇندەرىن وتكىزۋدىڭ دايىندىقتارىن تالقىلادى.
تاراپتار 2018 جىلدىڭ جەلتوقسان ايىندا اياقتالاتىن استانا اكىمدىگى مەن ماسكەۋ ۇكىمەتى اراسىنداعى ەكىجىلدىق ىنتىماقتاستىق باعدارلاماسىن جۇزەگە اسىرۋدىڭ الدىن الا قورىتىندىلارىن تالقىعا سالدى. الەكسەي بوروداۆكين رەسەيلىك تاراپتىڭ «جۇيەلى جانە جوسپارلى ىنتىماقتاستىقتى» جالعاستىرۋعا مۇددەلىلىگىن تانىتتى. ول سونداي-اق الداعى جىلدارعا ءوزارا ءىس-قيمىلداردىڭ جاڭا باعدارلاماسىن جاساۋدى ۇسىندى. «ەلشىلىك استانا مەن ماسكەۋدىڭ اراسىنداعى دوستىق قارىم-قاتىناستاردى دامىتۋ مەن نىعايتۋعا تولىعىمەن مۇمكىندىك تۋعىزۋعا ۇمتىلادى» دەدى ەلشى.
باقىت سۇلتانوۆ ەلشىنىڭ ۇسىنىسىن بىردەن قولدادى. «مەملەكەت باسشىسىنىڭ تاپسىرماسى بويىنشا ءبىز استانانى دامىتۋدىڭ 2050 جىلعا دەيىنگى ستراتەگياسىن ازىرلەۋگە كىرىستىك, – دەدى قالا باسشىسى. – وسى قۇجاتتى جۇزەگە اسىرۋ بارىسىندا الەمدەگى ءارتۇرلى قالالاردىڭ ۋربانيستيكالىق دامۋداعى حالىقارالىق تاجىريبەسىن زەرتتەيمىز. اسا ءىرى مەگاپوليس رەتىندە ماسكەۋدىڭ تاجىريبەسى ءبىز ءۇشىن اسا قىزىقتى بولارى ءسوزسىز».
ەلوردا اكىمى بۇگىنگى تاڭدا مەملەكەتتەر اراسىنداعى باسەكەلەستىك قالالاردىڭ باسەكەلەستىگىنە اۋىسىپ جاتقانىن تىلگە تيەك ەتتى. «بىراق بۇل جاعدايدا اڭگىمە تەك باسەكەلەستىك تۋرالى ەمەس, سونداي-اق ءوزارا ءتيىمدى كووپەراتسيا جونىندە بولىپ وتىر» دەپ اتاپ ءوتتى ب.سۇلتانوۆ.
