پيانينو پەرنەسىندە ءفاني سازى

كوپتەن كۇتكەن “Astana Piano Passion” ەكىنشى حالىقارالىق كلاسسيكالىق مۋزىكا فەستيۆالى مەن جاس پيانيستەر بايقاۋى ءوز مارەسىنە جەتتى.

بايگەدە وزا شاپقان ەڭ ۇزدىك ونەرپازدار كەشە «استانا وپەرا» مەملەكەتتىك وپەرا جانە بالەت تەاترىندا وتكەن گالا-كونتسەرتتە سالتاناتتى تۇردە ماراپاتتالدى. مۋزىكا الەمىندەگى ايتۋلى ۋاقيعاعا اينالعان “Astana Piano Passion” وسىمەن ەكىنشى رەت وتكىزىلىپ وتىر. 10 مامىردا باستالىپ, التى كۇنگە سوزىلعان بايقاۋ شەڭبەرىندە استانادا 7 فورتەپيانولىق كونتسەرت, جوعارى وقۋ ورىندارى مەن مۋزىكالىق مەكتەپتەردىڭ وقۋشىلارى ءۇشىن ەكى شەبەرلىك ساعاتى, سونداي-اق, مۋزىكالىق مەكتەپتەر مەن ستۋديالاردىڭ مۇعالىمدەرىنە ارنالعان دوڭگەلەك ۇستەل وتكەن بولاتىن. وسىناۋ اۋقىمدى شاراعا قاتىسۋشىلار كۇندەلىكتى ساعات 10.00-18.00 ارالىعىندا ۇزبەي دايىندالعان. فەستيۆالگە الەمنىڭ 23 ەلىنەن قاتىسۋعا ءۇمىت بىلدىرگەن 120 پيانينوشىنىڭ وتىزى عانا جارتىلاي فينالعا ءوتىپ, جۇلدەلى ورىندار ءۇشىن فينالدا باق سىناستى. ال, ارنايى قۇرىلعان قازىلار القاسى پيانينوشىلاردىڭ 40 ساعاتتان استام ويىنىن تىڭداپ, جەڭىمپازداردى انىقتادى. ناتيجەسىندە ءى ورىن ۇلكەن توپ اراسىندا رۋمىنيادان كەلگەن بوتساك الەكساندرۋ-كادميەلگە, ورتا توپتان بەلورۋسسيالىق حاندوگي ۆلاديسلاۆقا, ال كىشى توپتان جاپونيالىق وكۋي شيو مەن ونەر دوداسىندا ەلىمىزدىڭ مارتەبەسىن قورعاعان 10 جاسار دارىندى پيانيست ءسانجارالى كوپباەۆقا بۇيىردى.

بيىلعى فەستيۆال وزىنە جۇكتەلگەن ءۇمىتتى اقتادى. فەستيۆالدى باستان-اياق تاماشالاۋعا توعىز جارىم مىڭعا تارتا كورەرمەن كەلدى. الەمنىڭ بەس قۇرلىعىنان عالامتور ارقىلى قوسىلعان ادامدار سايتتاعى جاڭالىقتارمەن تانىسىپ وتىرعان ەكەن. سونىمەن قاتار, بيىل دا تىڭدارماندار فەستيۆال اياسىندا وتكەن كونتسەرتتەردى ينتەرنەت جەلىسى ارقىلى تىكەلەي ەفيردە كورۋگە مۇمكىندىك الدى. سايت ستاتيستيكاسى كورسەتكەندەي, بايقاۋعا دەگەن قىزىعۋشىلىق بىلتىرعى جىلمەن سالىستىرعاندا ءۇش ەسە وسكەن. بايقاۋدىڭ نەبارى ءۇشىنشى كۇنىندە سايت قولدانۋشىلارى 135 مىڭعا جەتكەن. ينتەرنەت ارقىلى داۋىس بەرۋدىڭ ناتيجەسى بويىنشا اۋديتوريانىڭ كوزايىمىنا اينالىپ, ارناۋلى سىيلىققا رەسەيلىك انيسا داجاەۆا يە بولدى.

فەستيۆال مادەنيەت سالاسىندا حالىقارالىق بايلانىستاردى رەتتەپ جانە جاس تالانتتاردى قولداپ قانا قويماي, سونداي-اق قازاق كومپوزيتورلارىنىڭ شىعارماشىلىعىن ناسيحاتتاۋىمەن قۇندى. وسى تۇرعىدا قازاق كومپوزيتورىنىڭ شىعارماسىن ۇزدىك ورىنداعانى ءۇشىن ۋكراينانىڭ جاس ونەرپازى ميكيتا بۋرزانيتسا ماراپاتتالدى. ونەرپازداردىڭ ۇستازى, قازىلار القاسىنىڭ قۇرمەتتى مۇشەسى دەنيس ماتسۋەۆ ساحنا تورىندە ارناۋلى سىيلىق يەلەرىن جاريالاپ, ديپلومداردى تابىستادى. اتاپ ايتار بولساق, يركۋتسك قالاسىندا وتەتىن «زۆيوزدى نا بايكالە» حالىقارالىق مۋزىكا فەستيۆالىنە قاتىسۋعا جاپونيالىق وكۋي شيو مەن گرۋزيا ونەرپازى حريكۋلي داۆيت, فرانتسياداعى «Annecy Classic» حالىقارالىق مۋزىكا فەستيۆالىنە بوتاك الەكساندرۋ-كادميەل جولداما الدى. «Crescendo» جاڭا بۋىن فەستيۆالىنىڭ بيىل ونجىلدىق مەرەيتويى بولادى. وسىدان ون جىل بۇرىن رەسەيلىك قانا ەمەس, الەمنىڭ تۇكپىر-تۇكپىرىنەن مۋزىكانتتار باس قوسىپ, كوپتەگەن ەلدەرگە گاسترولدىك ساپارلارعا شىعىپ, ونەر كورسەتكەنبىز. وسى فەستيۆالگە كوپباەۆ ءسانجارالى قاتىساتىندىعىنا قۋانامىن» دەيدى رەسەي حالىق ءارتىسى دەنيس ماتسۋەۆ. ال, تالامۋنۋەر ايديبا «نوۆىە يمەنا» ايماقارالىق قايىرىمدىلىق قورى اتىنان سۋزدال قالاسىنداعى جازعى لاگەردە دەمالاتىن بولدى.

سىيلىقتار لەگى وسىمەن اياقتالعان جوق. حريكۋلي داۆيت پەن ميكيتا بۋرزانيتسا استانا قالاسىنىڭ اكىمى يمانعالي تاسماعامبەتوۆتىڭ قولىنان 500 مىڭ تەڭگە كولەمىندەگى ارناۋلى سىيلىققا يە بولدى. فەستيۆالدىڭ دەمەۋشىسى «كاسپي بانك» اتىنان بانكتىڭ باسشىلار كەڭەسىنىڭ توراعاسى ۆياچەسلاۆ كيم 1 ملن تەڭگە كولەمىندەگى سىيلىقتى ماكسيم ماكسيموۆكە تاعايىنداسا, قر مادەنيەت ءمينيسترى ارىستانبەك مۇحامەديۇلى بۇل بايقاۋ قاتىسۋشىلاردى ۇزاق تا ماعىنالى ونەر جولىنا باستايتىندىعىن ايتىپ, 250 مىڭ تەڭگەلىك جۇلدەنى ءسانجارالى كوپباەۆ پەن ايديبا تالامۋنۋەرگە تاپسىردى.

ماراپاتتاۋ راسىمىنەن كەيىن كورەرمەندەر سازدى مۋزىكا الەمىنە ەنە بەردى.

ءمادينا جاقىپ