استاناداعى اباي جانە ادولف يانۋشكەۆيچ كوشەلەرىنىڭ قيىلىسىندا ورنالاسقان 25 قاباتتى ءۇش بىردەي دوڭگەلەك ۇيدەن تۇراتىن «ەگاليتە» تۇرعىن ءۇي كەشەنى – بايقوڭىر اۋدانىنداعى اسەم عيماراتتاردىڭ قاتارىندا. كەزىندە بۇل قۇرىلىسى ۇزاققا سوزىلعان نىساننىڭ ءبىرى بولاتىن. بۇگىندە وسى ۇيلەرگە «نۇرا-10» جشس جەتەكشىلىك ەتەدى. ونىڭ ديرەكتورى ەرسانا اكىمبەكوۆا 13 جىلدان بەرى تۋىنداعان قيىندىقتاردى تۇگەل ەڭسەرىپ, بارلىق ءىستىڭ باسى-قاسىندا ءجۇر.
شيرەك عاسىردى ارتقا تاستاعان باس قالامىز بۇگىندە الەمگە تانىمال بولىپ قانا قويماي, ەكونوميكاسى دامىعان, جاڭعىرعان جاڭا ينفراقۇرىلىمى بار زاماناۋي مەگاپوليسكە اينالدى. بۇل رەتتە تۇرعىن ءۇي-كوممۋنالدىق شارۋاشىلىق سالاسىندا تىندىرىمدىلىعىمەن تانىلعان ەرسانا داۋلەتبەكقىزىنىڭ اتقارىپ جۇرگەن ەڭبەگى ەرەكشە.
حالقىمىز «ەڭبەك – ىرىستىڭ بۇلاعى, باقىتتىڭ شىراعى» دەپ بەكەر ايتپاسا كەرەك. بەرەكەلى ىسىمەن كوپشىلىكتىڭ ىقىلاس-قوشەمەتىنە بولەنگەن باسشى ادال ەڭبەك پەن كاسىبىنە بەرىلگەندىكتىڭ ارقاسىندا نارىقتا باسەكەگە قابىلەتتىلىك تانىتىپ, تۇرعىنداردىڭ يگىلىگى جولىندا ايانباي قىزمەت ەتىپ كەلەدى.
– مەن جەتەكشىلىك ەتەتىن اباي داڭعىلى, 92/2 مەكەنجايىندا ورنالاسقان «ەگاليتە» تۇرعىن ءۇي كەشەنى 25 قاباتتى, 230 پاتەردەن تۇرادى. بۇل ءۇي كەزىندە پروبلەمالى نىسان بولعان. سودان 6 جىل كۇتىپ, اقىرى قالا اكىمدىگىنىڭ ارالاسۋىمەن قۇرىلىسى اياقتالىپ, اباي كوشەسىندەگى 92/1, 92/2, 92/3 – ءۇش ءۇي 2011 جىلى تاپسىرىلدى. ول كەزدە بۇل ءۇيدىڭ بىتپەگەن جۇمىسى كوپ ەدى. سونىڭ ءبارىن كۇندىز-ءتۇنى ۋاقىتپەن ساناسپاي ەڭبەك ەتىپ, جىلدار بويى تەر توگۋدىڭ ناتيجەسىندە جونگە كەلتىردىك. نەگىزگى جۇمىسىم – ينجەنەرلىك جۇيەلەردى, ىستىق, سۋىق سۋدى, جىلۋدى, جارىقتى, تازالىقتى قامتاماسىز ەتىپ, ەسىك الدىن كوگالداندىرۋ. بۇل باعىتتا جىل سايىن ءبىر كۇردەلى ءىس اتقارىپ, توقتاۋسىز جۇمىس ىستەپ جاتىرمىز. تۇرعىندار دا ريزا. ءوز باسىم باستاعان كەز كەلگەن ءىستى اياعىنا دەيىن جەتكىزۋگە تىرىسامىن. ءار قيمىل-ارەكەتىمدى تۇرعىندارعا ايتىپ, كەڭەسىپ وتىرامىن. بىرلەسىپ, اقىلداسىپ اتقارعان شارۋا قاشان دا ناتيجەلى ەكەنىن كوزبەن كورىپ كەلەمىز, – دەدى ەرسانا اكىمبەكوۆا.
بۇگىندە جشس-دە مامان تاپشىلىعى دەگەن اتىمەن جوق. ديرەكتوردىڭ ايتۋىنشا, ولاردىڭ دەنى ءوز ىسىنە ادال, تىندىرىمدى ءارى ەڭبەكقور, باستىسى, جاۋاپكەرشىلىكتى سەزىنە بىلەتىن جاندار ءارى ون ءۇش جىلدان بەرى وزىمەن بىرگە جۇمىس ىستەپ كەلەدى. ماسەلەن, سانتەحنيك مەرەكە, اعاش ۇستاسى ەرجان, ەدەن جۋشى ءشاربان بۇل جەردە سوناۋ 2010 جىلدان بەرى ەڭبەك ەتەدى ەكەن.
– «بىرلىك ءتۇبى – تىرلىك» دەگەندەي, وسى جىلدار ىشىندە ءبارىمىز بىرلەسىپ ءبىراز جۇمىس بىتىردىك. ارىگە بارماي-اق, سوڭعى جىلداردا اتقارىلعان ىستەرگە توقتالسام, وسىدان ەكى جىل بۇرىن قارا مەتالل ترۋبالاردى اۋىستىردىق. ول ارقىلى سۋ جۇرەدى, سۋ تيگەن سوڭ مەتالدىڭ ۋاقىت وتە كەلە ءار جەرىنەن تەسىلەتىنى بەلگىلى. وسىنى حالىققا تاپتىشتەپ ءتۇسىندىرىپ, تەسىلگەن جەردى جىلدا بىتەگەننەن ولاردى ساپالى قۇبىرمەن الماستىرعاننىڭ الدەقايدا ءتيىمدى ەكەنىن جەكە-جەكە جەتكىزەمىن. جەتەسىنە جەتكىزىپ ايتقان سوڭ, ولار دا تۇسىنەدى. ءسويتىپ, وتكەن جىلداردا تۇرعىنداردىڭ كەلىسىمىمەن ۇيدەگى بارلىق ترۋبالار, ناسوستار اۋىستىرىلدى. جالپى, مەن ۇنەمى كۇندەلىكتى جۇمىستان بولەك, جىلدىڭ باسىندا جەكە جوسپار جاسايمىن. وعان وسى ۇيلەرگە قاتىستى ءبىر اۋقىمدى جۇمىستى كىرگىزەمىن. سونداي شەشىمىن كۇتكەن ۇلكەن ماسەلەنىڭ ءبىرىن بىلتىر جوسپارلاعانمىن. اقىرى, ۇيدەگى سۋ وتەتىن تەپلووبمەننيكتى اۋىستىردىق. سونىمەن بىرگە, بيىك ۇيلەردە ءورت تۋىنداعان جاعدايدا, جاقىندا عانا الماتىدا بولعان جاعداي قايتالانباۋى ءۇشىن تۇرعىن ءۇي كەشەنىندەگى ءتۇتىندى سورۋ جۇمىستارى قالىپتى جۇمىس ىستەۋى كەرەك. بىلتىر استانادا بولعان جاعدايعا بايلانىستى ورىمدەي ءورت ءسوندىرۋشى اسقار زابيكۋليننىڭ حالىقتى قۇتقارامىن دەپ اجال قۇشقانىن ەل جاقسى بىلەدى. الداعى ۋاقىتتا وسىنداي جاعدايلار قايتالانباۋى ءۇشىن ءتىلسىز جاۋدىڭ الدىن الۋعا بارىنشا كۇش سالامىز. بۇل رەتتە ءتۇتىننىڭ يىسىنەن بەلگى بەرەتىن دابىلقاققىشتاردى ورناتۋدى بيىل اياقتايمىز, – دەدى جشس جەتەكشىسى.
جۇمىس بارىسىندا كەزدەسەتىن كەلەڭسىزدىكتەردىڭ ىشىندە ءورت قاۋىپسىزدىگى مەن ليفت قىزمەتىنە قاتىستى ماسەلەگە ەرەكشە الاڭدايدى. ونىڭ سەبەبى دە جوق ەمەس. بۇلاردىڭ ەكەۋى دە تۇرعىنداردىڭ ومىرىنە اسا قاۋىپتى ەكەنى بەلگىلى. سوندىقتان ەرسانا داۋلەتبەكقىزى قاراپ وتىرمايدى, ۇنەمى ىزدەنىس ۇستىندە جۇرەدى. ويلاعانى – تەك ەلدىڭ تىنىشتىعى. قايتسەم, تۇرعىنداردىڭ تۇرمىسىن جەڭىلدەتەمىن دەپ جارعاق قۇلاعى جاستىققا تيمەيدى. قازىرگى كەزدە «قازالتىنقىزمەت» ليفت كومپانياسىمەن جۇمىس ىستەپ كەلەدى. سوڭعى جىلدارى 4 ءليفتتىڭ تروستارىن اۋىستىردى. سونداي-اق وتكەن جىلى جالعا بەرۋ ەسەبىنەن 25 قاباتتى عيماراتقا كوسمەتيكالىق جوندەۋ جۇرگىزىلدى. بيىل ءبىرىنشى قابات تولىق جوندەلدى. جالپى, «ەگاليتە» تۇرعىن ءۇي كەشەنى ەكونوم كلاستاعى ءۇي بولسا دا, جشس جەتەكشىسى ونى ەليت كلاسقا جاقىنداتۋعا تىرىسىپ-اق كەلەدى. كەلەسى جىلى كاناليزاتسيانى تازالاۋ, جازدا باسپالداقتارعا كۇردەلى جوندەۋ جۇمىستارىن جۇرگىزۋ جوسپارلانىپ وتىر.
