جاقىندا استانا قالاسىنىڭ ءماسليحاتىندا تۇرعىن الاپتاردىڭ احۋالىن جاقسارتۋ جونىندەگى كەشەندى ءىس-شارالار جوسپارىن تالقىلاۋ اياقتالدى. سونىمەن, ەلوردادا وتكەن جىلى نە وزگەردى, بيىل نە وزگەرەدى دەگەن ماسەلەلەر ناقتىلاندى. بۇل تۋرالى ءماسليحات توراعاسى ەرلان كاناليموۆ الەۋمەتتىك جەلىدەگى پاراقشاسىندا ەگجەي-تەگجەيلى اقپارات بەردى.
«بيىل سارىارقا اۋدانىندا 17 كوشەگە جارىق ورناتۋ, سونداي-اق «كوكتال-1» (5 كوشە) جانە «اگروقالاشىق» (9 كوشە) تۇرعىن الاپتارىندا 14 كوشەنى قوسا العاندا, 20 كوشەگە اسفالت توسەۋ جۇمىسى جوسپارلانۋدا. 2023 جىلى اۋداندا 16 مىڭنان استام جاسىل جەلەك وتىرعىزىلدى, سونىڭ ىشىندە 2900 اعاش, 2 مىڭنان استام بۇتا, 10 مىڭعا جۋىق كوپجىلدىق وسىمدىكتەر جانە 2 مىڭعا جۋىق بۇتادان جاسالعان قورشاۋلار بار. اۋداندا 3235 كونتەينەرى بار 1047 كونتەينەرلىك الاڭ جاسالدى. 39 جاڭا كونتەينەرلىك الاڭدى قايتا جاڭالاۋ جۇمىسى جۇرگىزىلدى, 93 مەكەنجاي بويىنشا جوندەۋ جۇمىستارى اتقارىلدى» دەپ تىزبەلەدى اتقارىلعان ءىس-شارالاردى ە.كاناليموۆ.
ءماسليحات توراعاسى سارىارقا اۋدانىنىڭ اكىمىنە كوشەلەردى جارىقتاندىرۋ مەن اباتتاندىرۋعا, اسىرەسە ەسكى اعاشتار كامەرالار مەن جول بەلگىلەرىنىڭ كورىنۋىنە كەدەرگى كەلتىرۋى مۇمكىن جەرلەرگە نازار اۋدارۋدى تاپسىردى. ەرلان كاناليموۆ دۇرىس بەلگىلەنبەگەن بەلگىلەر بويىنشا اكىمشىلىك پوليتسيا باسقارماسى, كولىك جانە جول-كولىك ينفراقۇرىلىمىن دامىتۋ باسقارماسى قىزمەتكەرلەرىنىڭ, اۋداندىق اكىمدىكتەر مەن ءماسليحات دەپۋتاتتارىنىڭ قاتىسۋىمەن كوشپەلى كەڭەس وتكىزىلەتىنىن ءمالىم ەتتى.
