كورمەدە كەلەتىن قوناقتاردىڭ باسىم كوپشىلىگى شەتەلدىكتەر بولاتىندىقتان, وزدەرىن ەمىن-ەركىن سەزىنۋى ءۇشىن ءتيىستى جاعداي جاساۋ – ءبىزدىڭ مىندەتىمىز. بۇل, اسىرەسە, ءتارتىپ ساقشىلارىنا قاراتىپ ايتىلاتىن ءسوز. وسى ورايدا, استانالىق پوليتسەيلەر مەيماندارعا قىزمەت كورسەتۋ ءۇشىن اعىلشىن ءتىلىن ۇيرەنىپ ءجۇر دەگەن حابار الدىق.
استانا قالاسى ىشكى ىستەر دەپارتامەنتىندە جۇمىس ىستەيتىن 150 پوليتسەي اپتاسىنا ءۇش رەت ءتىل ۇيرەنۋ كۋرسىنا قاتىسىپ ءجۇر. وقۋ ءساۋىر ايىنان باستالىپ, كورمەنىڭ اياعىنا دەيىن جالعاسادى.
تىلدىك كۋرستىڭ باستى ماقساتى – پوليتسەيلەر شەت تىلىندە ءوزىن تانىستىرۋعا, قوناقتاردىڭ سۇراقتارىنا ماردىمدى جاۋاپ قايتارۋعا جانە اداسىپ قالعاندارعا جول سىلتەۋگە ۇيرەتۋ. سول سەبەپتى وقۋ باعدارلاماسى ءتارتىپ ساقشىلارىنىڭ جۇمىسىنا سايكەس ىڭعايلاستىرىلىپ جاسالدى. تىڭداۋشىلار كوبىنەسە اۋديو جانە ۆيدەوماتەريالداردى پايدالانىپ, شەتەلدىكتەردىڭ سويلەۋ مانەرىن ۇعىنۋعا بارىن سالۋدا.
«ءار ەلدىڭ سالتى باسقا» دەگەندەي, پوليتسەيلەر تەك ءتىلدى مەڭگەرىپ قانا قويماي, الەم ەلدەرىندەگى سالەمدەسۋ سالتىمەن دە تانىسىپ جاتىر. بۇل كۋرستارعا 167 قىزمەتكەر قاتىسۋدا.
سىزدەر دە ءبىلىپ جۇرىڭىزدەر, باس بارماقتى جوعارى كوتەرۋ يشاراسى تاياۋ شىعىس ەلدەرىندە, لاتىن امەريكاسىندا, باتىس افريكادا, اۋعانستاندا دورەكى بولىپ ەسەپتەلەدى. بۇل وسى ەلدەردىڭ حالقىنا «كەت!» دەگەن ماعىنانى بىلدىرەدى. بۇكىل الەمدە «ءبارى جاقسى» دەگەن ماعىنامەن بەلگىلى «وك» بەلگىسى فرانتسيادا كەرى ەموتسيانى, ال برازيليادا مۇلدەم انايى ماعىنانى بىلدىرەدى.
گۇلدانا تالعاتقىزى
