باس قالادا پوليتسەيلەرگە ارنالعان جاڭا عيمارات پايدالانۋعا بەرىلەدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ حابارلادى.
«ءتارتىپ ساقشىلارىنا قولايلى ەڭبەك جاعدايلارىن تۋعىزۋ جانە قالا تۇرعىندارىنىڭ قاۋىپسىزدىگىن قامتاماسىز ەتۋ ءۇشىن پوليتسيا دەپارتامەنتىنىڭ (سارىارقا اۋدانى) بولىمشەسىنە ارنالعان جاڭا عيماراتتىڭ قۇرىلىسىن جۇرگىزىپ جاتىرمىز. قۇرىلىستىڭ ءوزى 5 جىل بۇرىن باستالعان, بىراق سوت پروتسەستەرىنە بايلانىستى پروبلەمالى نىسان رەتىندە تانىلدى. ماڭىزدى نىساننىڭ قۇرىلىسىن قايتا باستاۋ ءۇشىن بىرقاتار ماسەلەلەردى شەشتىك. سونىڭ ىشىندە قۇرىلىس كونسترۋكتسيالارىنا تەحنيكالىق تەكسەرۋ جۇرگىزىلدى: اپاتتى جەرلەرى بۇزىلدى, ارالىق جابىندارى كۇشەيتىلدى جانە تاعى باسقا جۇمىستار اتقارىلدى. نىسان بىرنەشە ايدان كەيىن پايدالانۋعا بەرىلەدى. جاڭا عيماراتتا 500 پوليتسيا قىزمەتكەرى جۇمىس ىستەيدى» دەپ ءتۇسىندىردى قالا باسشىسى.
اكىمنىڭ ايتۋىنشا, ەلورداداعى ءتورت ەلدى مەكەندە دەنە شىنىقتىرۋ-ساۋىقتىرۋ كەشەنى سالىنىپ جاتىر. وندا قالا تۇرعىندارىنىڭ ءوتىنىشى بويىنشا ۋچاسكەلىك پوليتسيا بەكەتتەرى ورنالاسادى. ماسەلەن, كوكتالدا قازىردىڭ وزىندە دەنە شىنىقتىرۋ-ساۋىقتىرۋ كەشەنى جۇمىس ىستەپ تۇر.
«سونداي-اق قالانىڭ ءتۇرلى اۋداندارىندا قوعامدىق ءتارتىپ پەن قاۋىپسىزدىكتى قامتاماسىز ەتۋ ءۇشىن, سول سياقتى ازاماتتارىمىزعا ىڭعايلى بولۋ ءۇشىن پوليتسيانىڭ مودۋلدىك بەكەتتەرىن اشامىز. ولاردىڭ سانىن ءبىرىنشى كەزەڭدە 10-عا دەيىن جەتكىزەمىز. سونىمەن قاتار, 7 ۋچاسكەلىك پوليتسيا بەكەتى جاڭعىرتىلدى. بۇل شارانىڭ ءبارى بىزگە قالانى «نۇر-سۇلتان – جايلى قالا» باس جوسپارى اياسىندا دامىتۋعا مۇمكىندىك بەرەدى. الەۋمەتتىك نىساندار (مەكتەپتەر, قولجەتىمدى تۇرعىن ءۇي, مەديتسينالىق ورتالىقتار, پوليتسيانىڭ تىرەك پۋنكتتەرى جانە ت.ب.) قادامدىق جەردە قولجەتىمدى بولادى» دەدى التاي كولگىنوۆ.
