كەشە استانا قالاسىنىڭ جەرگىلىكتى پوليتسيا قىزمەتى باسشىلىعى قازاقستان ۇكىمەتىنىڭ قاۋلىسىمەن بەكىتىلگەن ەرەجەگە سايكەس حالىقپەن ەسەپ بەرۋ كەزدەسۋىن وتكىزدى.
القالى جيىندى استانا قالاسى قوعامدىق كەڭەسىنىڭ توراعاسى سانسىزباي ەسىلوۆ اشىپ, جۇرگىزىپ وتىردى.
قالا تۇرعىندارىمەن ەسەپ بەرۋ كەزدەسۋدە جەرگىلىكتى پوليتسيا قىزمەتىنىڭ باستىعى, پوليتسيا پولكوۆنيگى باقىتجان مالىباەۆ «جەرگىلىكتى پوليتسيا قىزمەتىنىڭ 2017 جىلى اتقارعان جۇمىستارى تۋرالى» ەسەپ بەردى.
كۇنى-ءتۇنى تىنبايدى
بۇگىنگى تاڭدا قالانىڭ جەرگىلىكتى پوليتسياسى قىزمەتىندە ءبىر مىڭ بەس ءجۇز ادام جۇمىس ىستەيدى. تۇرعىندار سانىنىڭ جىلدان-جىلعا وسە تۇسۋىنە بايلانىستى قىزمەتكەرلەردىڭ جەتىسپەۋشىلىگى ايقىن اڭعارىلىپ وتىر. ءبىر ۋچاسكەلىك ينسپەكتور تالاپ بويىنشا 250-300 ادامعا قىزمەت كورسەتۋى كەرەك بولسا, ەلوردادا ءار ۋچاسكەلىك ينسپەكتورعا 600-700 ادامنان كەلەدى ەكەن.
2017 جىلدىڭ وتكەن ون ءبىر ايىندا جەرگىلىكتى پوليتسيا قىزمەتى كوشەلەر مەن حالىق كوپ جۇرەتىن قوعامدىق ورىنداردا, ساياجاي القاپتارىندا قۇقىق بۇزۋشىلىقتىڭ الدىن الۋ ماقساتىندا 250-دەن اسا رەيد وتكىزدى. اسىرەسە, جەكەلەگەن ادامدارمەن تۇسىنىك, ۇگىت-ناسيحات جۇمىستارى دەندەپ جۇرگىزىلەدى. سونىڭ ناتيجەسىندە قوعامدىق ورىنداردا جاسالاتىن قىلمىس – 12,2 پايىزعا, كوشەلەردە كەز كەلگەن جەرگە تەمەكىنىڭ تۇقىلىن تاستاۋ, شەمىشكە شاعۋ, سىرا ءىشۋ سياقتى ۇساق قۇقىق بۇزۋشىلىق – 22,7 پايىزعا, جاسوسپىرىمدەر اراسىنداعى ءتارتىپ بۇزۋشىلىق – 36,3 پايىزعا, بۇرىن سوتتالعاندار تاراپىنان جاسالاتىن قىلمىس 22,8 پايىزعا ازايىپ وتىر.
ەسەپتى كەزەڭدە ەلوردا كوشەلەرىندە 183 مىڭ جول ەرەجەسىن بۇزۋ فاكتىسى تىركەلىپ, 1900 جۇرگىزۋشى كولىكتى ماس كۇيىندە باسقارعانى ءۇشىن جاۋاپقا تارتىلعان.
«سەرگەك» بەينەكامەرا جۇيەسى جۇمىس ىستەگەلى ەلوردا كوشەلەرىندە جول ەرەجەسى مەن قوعامدىق ءتارتىپتى بۇزۋ وقيعالارى ءبىرشاما ازايعان. ماسەلەن, قوعامدىق ورىنداردا ءتارتىپ بۇزۋ وتكەن جىلدىڭ وسى كەزەڭىندە 1380 بولسا, بيىل ول 872-گە دەيىن كەمىپ وتىر.
بۇگىنگە دەيىن قوعامدىق كولىكتەرگە ارنالعان ارناۋلى جولاقتارمەن جۇرگەن 11000-نان اسا جول ەرەجەسىن بۇزۋشىلىق تىركەلىپ, وسىعان وراي, 63 ميلليون تەڭگەدەن اسا ايىپپۇل سالىنعان.
جالعا پاتەر بەرۋشى – جەكە كاسىپكەر
قالا اۋماعىندا ەكى كەزەڭدە «ۋچاسكە» شۇعىل الدىن الۋ ءىس-شارالارى جۇرگىزىلدى. باقىتجان مالىباەۆتىڭ ايتۋىنشا, العاشقى 15 ناۋرىزدان 1 ماۋسىمعا دەيىنگى جۇمىستار جەرگىلىكتى پوليتسيا قىزمەتىنىڭ ءوز باستاماسىمەن قولعا الىنىپ, جان-جاقتى ۇيىمداستىرىلسا, ەكىنشى كەزەڭدەگى جۇمىستاردى جۇرگىزۋگە ىشكى ىستەر مينيسترلىگى ىقپال ەتكەن كورىنەدى. مىنە, وسى «ۋچاسكە» ءىس-شاراسى كەزىندە ۋچاسكەلىك ينسپەكتورلار 260 مىڭ پاتەر مەن 27800 جەكەمەنشىك ۇيلەردى ارالاپ, ءۇي يەلەرىمەن, پاتەر جالداۋشىلارمەن كەزدەسۋلەر وتكىزگەن. كوشى-قون ءتارتىبىن بۇزۋشىلار اكىمشىلىك جاۋاپكەرشىلىككە تارتىلىپ, كوپتەگەن ادامداردىڭ تۇرعىلىقتى جەرلەرىنە ەسەپكە تۇرۋىنا مۇمكىندىكتەر جاسالعان.
ماسەلەن, وسى ءىس-شارا كەزىندە 10 مىڭعا تارتا جالعا بەرىلگەن پاتەر انىقتالىپ, 2516 زاڭدى تۇلعا جەكە كاسىپكەر رەتىندە تىركەلسە, 1220 ادام دەكلاراتسيا تۇرىندە كىرىسىن كورسەتكەن. ودان مەملەكەتكە 90 ملن 105 مىڭ تەڭگە قارجى ءتۇسىپ وتىر.
ۇرلىق جاساعاندار ۇستالدى
بۇگىنگى تاڭدا ەلوردادا پاتەر يەلەرى كووپەراتيۆتەرى شتاتىندا 182 كونسەرج بەن قوعامدىق كومەكشى جۇمىس ىستەيدى ەكەن. 850-دەن اسا ادام پوليتسياعا قولعابىس بەرىپ, بەلسەندىلىك تانىتۋدا. سولاردىڭ كومەگىمەن جىل باسىنان بەرى 1129 اكىمشىلىك قۇقىق بۇزۋشىلىق انىقتالىپ, 218 ادام ىشكى ىستەر باسقارمالارىنا جەتكىزىلگەن. مىنە, وسىنداي قىلمىس پەن ۇساق قۇقىق بۇزۋشىلىقتىڭ الدىن الۋعا جاردەمىن تيگىزگەندەرگە قالا اكىمدىگى دە قولداۋ ءبىلدىرىپ, ولاردىڭ قوعامدىق ءتارتىپ پەن قاۋىپسىزدىكتى ساقتاۋداعى ەڭبەكتەرىن باعالاپ, كوتەرمەلەۋ ءۇشىن 13 ميلليون تەڭگە قارجى ءبولىپ كەلدى.
ۆوكزال ماڭى – باقىلاۋدا
سونداي-اق, تەمىر جول ۆوكزالى ماڭىنداعى كوشەلەردە, ش.ايمانوۆ, 16, دۇكەنۇلى, 38, بوگەنباي باتىر, 59, سارىارقا داڭعىلى, 43 ءۇيدىڭ اۋلالارى ايرىقشا باقىلاۋعا الىنعان. ءارى وسى جەردە ورناتىلعان بەينەكامەرالار قالا اكىمدىگىنىڭ جاعدايدى باقىلاۋ ورتالىعىمەن تىكەلەي قوسىلعاندىقتان, دابىل قاعىلعان كەزدە شۇعىل ارەكەت ەتۋ توبى بىردەن كومەككە كەلەتىن بولادى.
بۇل, اسىرەسە, جەكەنىڭ مۇلكىن ۇرلاۋعا بايلانىستى جاسالاتىن قىلمىستاردىڭ الدىن الۋ ءۇشىن جاسالاتىن ماڭىزدى قادامدار. قوعامدىق ورىنداردا ىشىمدىك ءىشىپ الىپ, ءتارتىپ بۇزۋعا بايلانىستى ۇستىمىزدەگى جىلى 18 مىڭنان اسا اكىمشىلىك حاتتاماسى تولتىرىلعان. وسى باعىتتا كەشكى 21.00 ساعاتتان كەيىن, تاڭەرتەڭ ساعات 11.00-گە دەيىن جاسى 21-گە تولماعان جاس ادامدارعا الكوگول ىشىمدىكتەرىن ساتۋعا تىيىم سالۋ تالاپتارىن ورىندامايتىن ساتۋشىلارعا قاتىستى قاتاڭ شارا قولدانۋ كەرەكتىگى, ءسوز جوق, قولدارلىق ۇسىنىس.
ۋچاسكەلىك ينسپەكتورلاردا دامىل جوق
اعىمداعى جىلى وتباسىندا بولاتىن زورلىق پەن زومبىلىقتىڭ الدىن الۋ ءۇشىن دە بىرقاتار جۇمىستار اتقارىلىپتى. اششى سۋعا تويىپ الىپ, وتباسىنىڭ مازاسىن الاتىندار, قالا بەردى, ايەلىنە, بالا-شاعاسىنا قول كوتەرەتىندەر سانى قالادا ازايماي كەلەدى. ولارمەن جۇمىس جۇرگىزۋدە ۋچاسكەلىك ينسپەكتورلاردىڭ جۇمىسى بۇرىنعى قاي كەزدەن دە جاندانا تۇسكەن. وسىنداي 18 قىلمىستىڭ 11-ءى ماس كۇيىندە جاسالاتىنى انىقتالىپ وتىر.
بۇل باعىتتا بۇگىنگى كۇنى 4000-عا تارتا قىلمىس تىركەلىپ, ولاردىڭ بارلىعى دا ۋچاسكەلىك پوليتسيانىڭ باقىلاۋىنا الىنعان. جىل باسىنان بەرى ىشىمدىككە سالىنىپ, وتباسى مەن كورشى-كولەمنىڭ بەرەكەتىن العان 800-دەن اسا اداممەن تۇسىنىك باعىتىندا جۇمىستار جۇرگىزىلگەن. 1370 ادام اكىمشىلىك جاۋاپكەرشىلىككە تارتىلعان.
قالا تۇرعىندارىمەن ەسەپ بەرۋ كەزدەسۋى سوڭىندا باقىتجان مالىباەۆ جەرگىلىكتى پوليتسيا قىزمەتىنىڭ جۇمىسىنا بەلسەنە ارالاسىپ, ازاماتتىق ۇستانىم تانىتقان بىرنەشە ادامعا العىس حاتتار مەن باعالى سىيلىقتار تاپسىردى.
تاڭاتار تولەۋعاليەۆ
