قازاقستان پرەزيدەنتى قاسىم-جومارت توقاەۆ ەلورداداعى بىرقاتار نىساندى ارالادى.
«بوتالى» وتباسى دەنساۋلىعى ورتالىعىنا كەلگەن مەملەكەت باسشىسىنا قالانىڭ العاشقى مەديتسينالىق-سانيتارلىق ءجاردەم جەلىسىنىڭ دامۋى جانە «ۇيدەگى دارىگەر» جوباسى تۋرالى ءمالىمەت بەرىلدى. مەديتسينالىق كابينەتتەردى, جەڭىلدىكپەن ءدارى-دارمەكتەر بەرىلەتىن ءدارىحانانى ارالاعان پرەزيدەنت زاماناۋي تسيفرلىق تەحنولوگيانى قولداناتىن تىركەۋ ءبولىمىنىڭ جۇمىسىمەن دە تانىستى.
سونداي-اق مەملەكەت باسشىسى ەلورداداعى №68 مەكتەپ-گيمنازياسىندا دا بولدى. مۇندا قاسىم-جومارت توقاەۆقا نۇر-سۇلتان قالاسىنداعى ءبىلىم بەرۋ مەكەمەلەرىندە جۇرگىزىلىپ جاتقان تسيفرلاندىرۋ جۇمىستارىنىڭ ناتيجەلەرى باياندالدى.
سونىمەن قاتار قازاقستان پرەزيدەنتى مەكتەپ-گيمنازياداعى وقۋشىلار سارايىنىڭ فيليالى سانالاتىن «شۇعىلا» كوميۋنيتي ورتالىعى» قوسىمشا ءبىلىم بەرۋ ورتالىعىنىڭ جۇمىسىمەن دە تانىستى.
مۇندا بالالاردىڭ قابىلەتىن دامىتۋعا ارنالعان 5 ستۋديا مەن 13 ۇيىرمە تەگىن جۇمىس ىستەيدى. بۇل ۇيىرمەلەرگە ونلاين جۇيەسى ارقىلى جازىلۋعا بولادى.
بۇل جەردەن كەيىن قاسىم-جومارت توقاەۆ پاراليمپيادالىق جاتتىعۋ ورتالىعىنا باردى. پرەزيدەنتكە حالىقارالىق قولجەتىمدى ستاندارتتار بويىنشا قايتا جاڭعىرتىلعان, مۇمكىندىگى شەكتەۋلى جاندارعا تولىقتاي ىڭعايلاستىرىلعان جاتتىعۋ, ويىن زالدارى, جۇگىرۋ جولاعى, جەكپە-جەك جانە پاۋەرليفتينگ اۋماعى بار پاراليمپيادا ورتالىعى تانىستىرىلدى.
سپورتشىلارىمىزدىڭ جەتىستىكتەرىن ماقتان تۇتىپ, جوعارى باعالايتىنىن ايتقان قاسىم-جومارت توقاەۆ توكيودا وتەتىن پاراليمپيادالىق ويىنداردا جوعارى دەڭگەيدە ونەر كورسەتۋ ءۇشىن ۇيىمداستىرۋ جانە قارجىلىق قولداۋ كورسەتىلەتىنىن جەتكىزدى.
پرەزيدەنت «iKomek109» مونيتورينگ جانە جەدەل ارەكەت ەتۋ ورتالىعىنا دا ات باسىن بۇردى. مۇندا مەملەكەت باسشىسىنا باسقارۋ پانەلىنىڭ مۇمكىندىگى كورسەتىلدى. بۇل جەردەگى قوسىلعان 6 مىڭنان اسا كامەرا توتەنشە جاعدايلار مەن وقىس وقيعالار كەزىندە شۇعىل ارەكەت ەتىپ, ولاردى قالىپقا كەلتىرۋگە, سونداي-اق قالانىڭ تىنىس-تىرشىلىگىنە مونيتورينگ جۇرگىزۋگە مۇمكىندىك بەرەدى. قاسىم-جومارت توقاەۆ مەملەكەتتىك ورگانداردىڭ قىزمەتىنىڭ نەگىزگى تۇتىنۋشىسى رەتىندە حالىقپەن ءتيىمدى كەرى بايلانىس جانە كوممۋنيكاتسيا ورناتۋى ءۇشىن زاماناۋي تسيفرلىق تەحنولوگيانى قولدانۋدىڭ ماڭىزدى ەكەنىن اتاپ ءوتىپ, بۇل تاجىريبەنى وڭىرلەرگە تاراتۋ قاجەتتىگىن ايتتى.
