وسى اپتادا مەملەكەت باسشىسى نۇرسۇلتان نازارباەۆقا توتەنشە جانە وكىلەتتى ەلشىلەر – مالايزيادان حيدايات ابدۋل حاميد, ەستونيا رەسپۋبليكاسىنان ياان رەينحولد, ليۆيادان ساليم ابدۋراحمان ءال-سۋەيتي, يران يسلام رەسپۋبليكاسىنان موجتابا داميرچيلۋ, تاجىكستاننان نازيرماد اليزودا, كانادادان شون ستايل سەنىم گراموتالارىن تاپسىردى. ءوز كەزەگىندە پرەزيدەنت ەلشىلەردى ءبىزدىڭ ەلدەگى ديپلوماتيالىق قىزمەتتەرىنىڭ باستالۋىمەن قۇتتىقتاپ, جۇمىستارىنا ساتتىلىك تىلەدى.
مەملەكەت باسشىسىنىڭ ايتۋىنشا, قازاقستان اتالمىش ەلدەردىڭ بارلىعىمەن ماڭىزدى سەرىكتەستىك ورناتقان. ماسەلەن, تاجىكستان ەكونوميكاسىنا سالىنعان قازاقستاندىق ينۆەستيتسيا بۇگىندە 125 ميلليون دوللاردان اسادى ءارى بۇل ەلدە قازاقستاندىق 40 شاقتى كاسىپورىن جۇمىس ىستەيدى. پرەزيدەنت الداعى ۋاقىتتا ءوزارا ساۋدا كولەمىن ۇلعايتىپ, ىنتىماقتاستىق اياسىن كەڭەيتۋگە كۇش سالۋ قاجەتتىگىن دە اتاپ ءوتتى.
ال, قازاقستاننىڭ يرانمەن ساياسي-ەكونوميكالىق بايلانىستارى جىلدان جىلعا نىعايىپ كەلە جاتقانىن ايتقانىمىز ءجون. «بيىل ىسكە قوسۋ جوسپارلانعان قازاقستان –تۇرىكمەنستان – يران جاڭا تەمىرجولى – سونىڭ ايعاعى. بۇل باعىت جالپى وڭىردەگى ساۋدا-ەكونوميكالىق ىنتىماقتاستىققا سەرپىن بەرەدى. يراننىڭ يادرولىق باعدارلاماسى توڭىرەگىندەگى احۋالدى تەزدەتىپ رەتتەۋ وڭىردەگى تىنىشتىق پەن ىنتىماقتاستىق ءۇشىن اسا ماڭىزدى.
ءبىز ارااعايىن «التىلىق» پەن يران اراسىنداعى كەلىسسوزدەردىڭ ەكى راۋندىن الماتىدا وتكىزۋ ارقىلى بۇل ۇدەرىسكە ءوز ۇلەسىمىزدى قوستىق. بارشانى قاناعاتتاندىراتىن ۇزاق مەرزىمدى كەلىسىمگە تاياۋ ۋاقىتتا قول جەتكىزىلەدى دەپ ۇمىتتەنەمىز. ءبىز كەلەسى ايدا پرەزيدەنت حاسان رۋحانيدىڭ قازاقستانعا تۇڭعىش رەسمي ساپارىن كۇتىپ وتىرمىز. بۇل ساپار ەكىجاقتى بايلانىستاردى جاڭا ساپالى دەڭگەيگە كوتەرۋگە مۇمكىندىك بەرەدى» دەيدى مەملەكەت باسشىسى.
ەلباسىعا سەنىم گراموتاسىن تاپسىرعان ەلدەردىڭ ءبىرى – مالايزيا. اتالمىش ەل – بۇكىل مۇسىلمان الەمىندەگى سەنىمدى ساياسي ءارى ساۋدا سەرىكتەسىمىز. مەملەكەت باسشىسى پرەمەر-مينيستر نادجيب رازاكتىڭ تاياۋدا وتكەن رەسمي ساپارى ەكونوميكالىق ىنتىماقتاستىق اياسىن كەڭەيتە تۇسكەنىن العا تارتتى. ءويتكەنى, وسى ساپاردىڭ ناتيجەسىندە جالپى قۇنى 1 ميلليارد دوللاردان اساتىن كەلىسىمشارتتار جاسالعان.
مەملەكەت باسشىسى سونىمەن قاتار كانادا, ەستونيا جانە ليۆيا ەلدەرىمەن دە جان-جاقتى ىنتىماقتاستىقتى دامىتۋ قازاقستان ءۇشىن ماڭىزدى ەكەنىن العا تارتتى.
– ءبىز الەمدەگى ەڭ دامىعان 30 ەلدىڭ قاتارىنا كىرۋدى كوزدەپ وتىرمىز جانە بۇعان قاجەتتى بارلىق شارانى قابىلدايمىز. بۇل ماقساتقا جەتۋ ءۇشىن قاجەتتى باستى باعدار مەن ناقتى مىندەتتەر «قازاقستان-2050» ستراتەگياسىندا ايقىندالدى. ول ءبىزدىڭ ەلىمىزدىڭ بارلىق سىرتقى ساياسي سەرىكتەستەرىمەن ءوزارا ءتيىمدى بايلانىستاردى نىعايتۋعا باعىتتالعان, – دەي كەلە ەلباسى ەلىمىزدە شەتەلدىك ينۆەستورلارعا بىرەگەي مۇمكىندىكتەر ۇسىنىلاتىنىن, 2017 جىلى استانادا «بولاشاقتىڭ ەنەرگياسى» تاقىرىبىنا ارنالعان حالىقارالىق مامانداندىرىلعان
«ەكسپو» كورمەسى وتەتىنىن, سونداي-اق وڭىرلىك جانە جاھاندىق دەڭگەيدەگى وزەكتى ماسەلەلەردى شەشۋگە بەلسەندى قاتىسۋدى كوزدەيتىنىن اتاپ ءوتتى.
گۇلميرا ايماعانبەت
