مەملەكەت باسشىسى جەتىسۋ وبلىسىنىڭ الەۋمەتتىك-ەكونوميكالىق دامۋ بارىسىمەن تانىستى.
پرەزيدەنتكە جەتىسۋ وبلىسىنىڭ اكىمى بەيبىت يساباەۆ ءوڭىردىڭ الەۋمەتتىك-ەكونوميكالىق دامۋى تۋرالى مالىمەت بەردى. ءوڭىر اكىمى مەملەكەت باسشىسىنا ايماق ەكونوميكاسىنىڭ بارلىق نەگىزگى سالاسىنىڭ دامۋىندا وڭ ءۇردىس ساقتالىپ وتىرعانىن ايتتى. وبلىستاعى ءوندىرىس كولەمى 5,8 پايىزعا, اۋىل شارۋاشىلىعى 1,7 پايىزعا ۇلعايعان. ال ساۋدا مەن قۇرىلىس سالالارىنىڭ دامۋ كورسەتكىشتەرى 1,6 ەسە ءوستى. 198,4 مىڭ شارشى مەتر تۇرعىن ءۇي پايدالانۋعا بەرىلگەن. بۇل 2022 جىلدىڭ وسى كەزەڭىمەن سالىستىرعاندا 11,2 پايىزعا كوپ. وبلىس ەكونوميكاسىنا 213,9 ميلليارد تەڭگە ينۆەستيتسيا تارتىلعان, سونىڭ ىشىندە جەكە ينۆەستيتسيالار 15,7 پايىزعا كوبەيدى.
بەيبىت يساباەۆ وبلىستىڭ ونەركاسىپ وندىرىسىندە 533 كاسىپورىن جۇمىس ىستەيتىنىن, وندا 26,6 مىڭ ادام ەڭبەك ەتىپ جاتقانىن جەتكىزدى. ونىڭ ايتۋىنشا, ءوندىرىس كولەمى 230,1 ميلليارد تەڭگەنى قۇرادى. بيىل جالپى قۇنى 46,9 ميلليارد تەڭگە بولاتىن 14 نىساندى ىسكە قوسۋ جوسپارلانعان.
اۋىل شارۋاشىلىعىنىڭ جالپى ءونىمى 1,7 پايىزعا وسكەن. ونىڭ ىشىندە ەگىن القابى 1,9 مىڭ گەكتارعا ۇلعايعان, ال قانت قىزىلشاسىن وسىرەتىن جەر كولەمى 2 ەسە ارتىپ, 8,7 مىڭ گەكتارعا جەتكەن.
سونىمەن قاتار وبلىس اكىمى مەملەكەت باسشىسىنىڭ تاپسىرماسىنا سايكەس اقسۋ قانت زاۋىتىنا تولىق جوندەۋ جۇرگىزىلىپ, ىسكە قوسىلعانى تۋرالى ايتتى. كوكسۋ قانت زاۋىتى 70 مىڭ توننا قانت وندىرگەن. بۇگىندە ەكى قانت زاۋىتى 280 شارۋاشىلىقتان 205 مىڭ توننادان استام شيكىزات قابىلداعان. ونىڭ 56 مىڭ تونناسى وڭدەلىپ, 7 مىڭ توننا قانت الىنعان.
وبلىستا سۋ جۇيەسىن قايتا جاڭارتۋ جانە سالۋ ءۇشىن 22 جوبانىڭ ىسكە اسىرىلىپ جاتقانى تۋرالى باياندالدى. ال 22 ەلدى مەكەن, سونىڭ ىشىندە تالدىقورعان قالاسىنا گاز قۇبىرى تارتىلىپ, 288 مىڭ ادام كوگىلدىر وتىنمەن قامتىلعان. بيىل 20 ەلدى مەكەندە قۇرىلىس-مونتاجداۋ جۇمىستارى جۇرگىزىلىپ جاتىر.
وبلىس اكىمى الەۋمەتتىك نىساندار سالۋ ماسەلەسىنە ارنايى توقتالدى. 2023-2025 جىلدارى 8,8 مىڭ ورىندىق 16 جاڭا مەكتەپ سالۋ جوسپارلانعان, سونىڭ ىشىندە 6600 ورىندىق 7 وقۋ ورداسى «جايلى مەكتەپ» ۇلتتىق جوباسى اياسىندا سالىنادى جانە 1800 ورىندىق 2 مەكتەپتىڭ قۇرىلىسى بيىل باستالعان. دەنساۋلىق ساقتاۋ سالاسى بويىنشا 8 نىساننىڭ قۇرىلىسى جۇرگىزىلىپ جاتىر. جەرگىلىكتى بيۋدجەت ەسەبىنەن 21 بلوكتى-ءمودۋلدى كەشەن سالىنعان. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2025 جىلعا دەيىن تاعى 59 نىسان سالۋ جوسپارلانعان. ال مادەنيەت سالاسىندا 5 نىساننىڭ قۇرىلىسى جۇرگىزىلىپ, تاعى 8 نىسان كۇردەلى جوندەۋدەن وتكىزىلىپ جاتىر.
مەملەكەت باسشىسىنا بيىل وبلىستا 14 سپورت نىسانى سالىنىپ جاتقانى جونىندە ايتىلدى. سونىمەن بىرگە جەرگىلىكتى بيۋدجەت ەسەبىنەن 3 بلوكتى-ءمودۋلدى كەشەن سالىنادى. ال دەمەۋشىلەر ەسەبىنەن تالدىقورعان قالاسىندا جىل بويى جۇمىس ىستەيتىن «Jetysu اrena» جابىق سپورت كەشەنى ىسكە قوسىلعان. بۇل كەشەنگە 867 ميلليون تەڭگە ينۆەستيتسيا سالىنعان.
جەتىسۋ وبلىسىنداعى اۆتوموبيل جولدارىنىڭ جالپى ۇزىندىعى – 3 988 شاقىرىم. بيىل وبلىستىق ماڭىزى بار 221 شاقىرىم جول مەن 73 ەلدى مەكەندەگى 249 شاقىرىم اۋىلىشىلىك جولداردى سالۋ جانە قايتا جاڭارتۋ جۇمىستارى جۇرگىزىلۋدە.
قاسىم-جومارت توقاەۆ وبلىستىڭ دامۋ قارقىنىن وڭ باعالاپ, وسى باعىتتاعى جۇمىستاردى ودان ءارى جالعاستىرۋدى تاپسىردى.
جاڭا شاعىن اۋدانعا باردى
مەملەكەت باسشىسى جەتىسۋ وبلىسىنىڭ ورتالىعىندا سالىنىپ جاتقان جاڭا شاعىن اۋداندا بولىپ, قۇرىلىس بارىسىمەن تانىستى.
قاسىم-جومارت توقاەۆقا جاڭا شاعىن اۋداندا 41 تۇرعىن ءۇي سالىنىپ جاتقانى جونىندە باياندالدى. 1510 پاتەردىڭ جالپى اۋدانى – 122,6 مىڭ شارشى مەتر. قۇرىلىسقا 28,3 ميلليارد تەڭگە بولىنگەن.
تالدىقورعان قالاسىنىڭ اكىمى ەرنات ءبازىلدىڭ ايتۋىنشا, وسى شاعىن اۋداندا بىلتىر اۋماعى 44,1 مىڭ شارشى مەتر بولاتىن 509 پاتەرلى 14 ءۇيدىڭ قۇرىلىسى اياقتالعان. ال بيىل جىل سوڭىنا دەيىن 783 پاتەرلى تاعى 21 ءۇيدى اياقتاۋ جوسپارلانىپ وتىر. قالا باسشىلىعى قالعان 218 پاتەرلى 6 ءۇيدىڭ قۇرىلىسىن كەلەسى جىلى اياقتايتىنىن جەتكىزدى. جىل سوڭىنا دەيىن تالدىقورعان قالاسى بويىنشا جالپى كولەمى 155,2 مىڭ شارشى مەتردى قۇرايتىن 2 065 پاتەر پايدالانۋعا بەرىلەدى. سونداي-اق 2024 جىلى 2 375 پاتەر سالۋ جوسپارلانعان. بۇدان بولەك, قاراتال وزەنىنىڭ وڭ جاعالاۋىن دامىتۋ قاراستىرىلعان.
كەزدەسۋ سوڭىندا پرەزيدەنت ۇكىمەتكە اتالعان ماسەلەلەردى زەردەلەپ, ءتيىمدى شەشىم قابىلداۋدى تاپسىردى.
تالدىقورعان دراما تەاترىندا بولدى
قاسىم-جومارت توقاەۆتىڭ جەتىسۋ وبلىسىنا جۇمىس ساپارى ءوڭىر ورتالىعى تالدىقورعان قالاسىندا جالعاستى.
پرەزيدەنت وبلىس ورتالىعىنداعى دراما تەاترىنا ەسىمى بەرىلگەن قازاق سسر حالىق ءارتىسى بيكەن ريموۆانىڭ بيۋستىنە گۇل شوعىن قويدى. بۇدان كەيىن مەملەكەت باسشىسى تەاتر عيماراتىن ارالاپ كوردى.
قاسىم-جومارت توقاەۆ تالدىقورعان دراما تەاترىندا جەتىسۋ وبلىسىنىڭ زيالى قاۋىم وكىلدەرىمەن كەزدەسىپ, پىكىر الماستى.
– بۇگىن, مىنە, حالقىمىزعا تانىمال اسا كورنەكتى اكتريسا بيكەن ريموۆا تەاترىندا كەزدەسىپ وتىرمىز. وتە قۋانىشتىمىن. شىن مانىندە, ءبىز وتكەن زاماننىڭ قايراتكەرلەرىنە, ولاردىڭ ەڭبەگىنە لايىقتى, ادىلەتتى باعا بەرۋىمىز كەرەك. بۇل ەلىمىزدىڭ بولاشاعى ءۇشىن, جاس ۇرپاققا دۇرىس جول كورسەتۋ ءۇشىن قاجەت, – دەدى پرەزيدەنت.
مەملەكەت باسشىسى وبلىس زيالىلارىنا جاستار تاربيەسى مەن ايماقتىڭ كەلەشەگى تۋرالى ويىن ايتتى.
– ءبىز ەلىمىزدىڭ بولاشاعى قانداي باعىتتا داميتىنىن ويلاساق, ەڭ الدىمەن, جاستارىمىزعا كوڭىل ءبولۋىمىز كەرەك. ەلىمىزدىڭ بولاشاعى – جاستاردىڭ قولىندا. قاي جەرگە بارسام دا, ۇنەمى ايتىپ ءجۇرمىن. جاستارىمىزدى كوزى اشىق, كوكىرەگى وياۋ, ادال ازامات ەتىپ تاربيەلەۋىمىز قاجەت. بۇل – ەل دامۋىنىڭ ماڭىزدى ءبىر باعىتى. ال ەندى وبلىستىڭ دامۋىنا كەلەر بولساق, ءوڭىردىڭ الەۋەتى زور. دامۋ قارقىنى جاقسى, ءالى دە تۇيتكىلدى ماسەلەلەر بار. مەن وبلىستىڭ جاعدايىن جاقسى بىلەمىن. الداعى ۋاقىتتا دا نازار اۋدارامىز, – دەدى قاسىم-جومارت توقاەۆ.
مەملەكەت باسشىسى بۇل, ەڭ الدىمەن, تۇراقتىلىقتىڭ, تىنىشتىقتىڭ ارقاسى ەكەنىنە نازار اۋداردى.
– وزدەرىڭىز بىلەسىزدەر, الەمدەگى احۋال كۇردەلى. ەڭ قۇبىلمالى كەزدە تۇرمىز. كۇردەلى كەز. سول سەبەپتى بەيبىتشىلىك ءبىزدىڭ باستى بايلىعىمىز ەكەنىن جاقسى ءتۇسىنۋىمىز كەرەك. بىرلىگىمىز مىعىم بوپ, ءبىر ەل بولىپ ەڭبەك ەتۋىمىز قاجەت. ەلدە زاڭ ۇستەمدىگى مەن ءتارتىپ بولسا عانا, تىنىشتىق پەن دامۋ بولادى. پرەزيدەنتتەن باستاپ ءبارىمىز كونستيتۋتسيانى قۇرمەتتەپ, زاڭعا باعىنۋىمىز كەرەك. زاڭ الدىندا ءبارىمىز تەڭبىز, – دەدى قاسىم-جومارت توقاەۆ.
كەزدەسۋ سوڭىندا پرەزيدەنت ەلىمىزدەگى باستامالاردىڭ ءتيىمدى جۇزەگە اسىرىلۋىنا ەلەۋلى ۇلەس قوسىپ جۇرگەن وبلىس بەلسەندىلەرىنە ريزاشىلىعىن ءبىلدىردى.
«ALACEM» تسەمەنت زاۋىتىنىڭ جۇمىسىمەن تانىستى
مەملەكەت باسشىسى جەتىسۋ وڭىرىندەگى ءىرى ءوندىرىس وشاقتارىنىڭ ءبىرى سانالاتىن «ALACEM» تسەمەنت زاۋىتىن ارالاپ كوردى.
2020 جىلى يندۋستريالاندىرۋ باعدارلاماسى اياسىندا ىسكە قوسىلعان قازاقستان – سينگاپۋر بىرلەسكەن كاسىپورنىندا قۇرعاق ادىسپەن جىلىنا 1,5 ميلليون توننا تسەمەنت وندىرىلەدى. جوبا قۇنى – 47 ميلليارد تەڭگە. زاۋىتتا, نەگىزىنەن, ازاماتتىق جانە وندىرىستىك نىساندار قۇرىلىسىندا كەڭىنەن پايدالانىلاتىن M400, M450, م500 ماركالى تسەمەنت تۇرلەرى شىعارىلادى. مىسالى, ۇلكەن الماتى وزەنىنە سالىنعان «ايۋساي» بوگەتىنىڭ قۇرىلىسىنا وسى زاۋىتتىڭ ءونىمى قولدانىلعان.
كاسىپورىننىڭ باسقارۋشى ديرەكتورى ستانيسلاۆ ششەرباكوۆتىڭ ايتۋىنشا, زاۋىت الماتى قالاسىنىڭ, جەتىسۋ جانە الماتى وبلىستارىنىڭ تسەمەنت ونىمىنە دەگەن سۇرانىسىن 65 پايىزعا دەيىن قامتاماسىز ەتەدى. جوبانى جۇزەگە اسىرۋ بارىسىندا ەكولوگيالىق تازا, قالدىقسىز ءوندىرىس ستاندارتتارىنا ساي كەلەتىن وزىق تەحنولوگيالار قولدانىلعان. سونداي-اق ءونىم پروتسەسىن باسقارۋ ءۇشىن DCS ينتەللەكتۋالدى جۇيەسى ەنگىزىلگەن.
كاسىپورىننىڭ ءوندىرىس جانە كولىك-لوگيستيكالىق ۋچاسكەلەرىندە 600 ادام جۇمىس ىستەيدى. ولاردىڭ باسىم بولىگى – جەرگىلىكتى تۇرعىندار. سونىمەن قاتار ءونىمدى وتكىزۋ, ديلەرلىك جەلىلەر ارقىلى قوسىمشا 200-گە جۋىق جۇمىس ورنى اشىلدى.
كومپانيا زاۋىتتى ىسكە قوسقالى بەرى بيزنەستىڭ الەۋمەتتىك جاۋاپكەرشىلىگى اياسىندا كەربۇلاق اۋدانىنىڭ دامۋىنا 2,7 ميلليارد تەڭگە قارجىلاي قولداۋ كورسەتكەن. بۇل قاراجات سارىوزەك – كوكتال جولىن جوندەۋگە جانە اۋدانداعى الەۋمەتتىك جوبالارعا جۇمسالدى.
مەملەكەت باسشىسى زاۋىت جۇمىسشىلارىمەن اڭگىمەلەسىپ, وسىنداي ءىرى ءوندىرىستىڭ اشىلۋى قۇرىلىس يندۋسترياسىن دامىتۋ, اسىرەسە, جەرگىلىكتى ينفراقۇرىلىمدى جەتىلدىرۋ ءۇشىن ماڭىزدى ەكەنىن اتاپ ءوتتى.
قاراتال تاريحي-ولكەتانۋ مۋزەيىن ارالاپ كوردى
پرەزيدەنت قاسىم-جومارت توقاەۆتىڭ جەتىسۋ وبلىسىنا جۇمىس ساپارى قاراتال اۋدانىندا جالعاستى.
مەملەكەت باسشىسى اۋدان ورتالىعى – ۇشتوبە قالاسىنداعى قاراتال تاريحي-ولكەتانۋ مۋزەيىنە باردى. مۋزەي بيىل پايدالانۋعا بەرىلگەن.
جالپى اۋدانى 2520 شارشى مەتر بولاتىن قوس قاباتتى عيماراتتا ولكە تاريحىنا قاتىستى 350-گە جۋىق ەكسپونات قويىلعان.
مەملەكەت باسشىسىنا مۋزەيدەگى ارحەولوگيالىق ارتەفاكتىلەر, ەتنوگرافيالىق جادىگەرلەر كورسەتىلىپ, قاراتال اۋدانىنىڭ تاريحى جانە جازۋشى كەمەل توقاەۆ, قازاق سسر حالىق ءارتىسى بيكەن ريموۆا, وسى وڭىردەن شىققان اقىن-جىراۋلار, بي-شەشەندەر مەن ەلگە ەڭبەگى سىڭگەن باسقا دا تۇلعالار تۋرالى تىڭ دەرەكتەر تانىستىرىلدى.
پرەزيدەنت مۋزەيدە جەرگىلىكتى زيالى قاۋىم وكىلدەرىمەن جۇزدەسۋ بارىسىندا مۇراجايدى ارالاپ شىققانىن جانە ونداعى جادىگەرلەردى كوبەيتۋ كەرەكتىگىن اتاپ ءوتتى. سونداي-اق قوعام دامۋى ءۇشىن مۇنداي مادەني نىسانداردىڭ قاجەت ەكەنىنە نازار اۋداردى.
سونداي-اق مەملەكەت باسشىسى «التىنەمەل» مەموريالدىق مۋزەيىندە دە بولدى. كورنەكتى ەتنوگراف, فولكلورتانۋشى, اعارتۋشى-عالىم شوقان ءۋاليحانوۆتىڭ بەيىتىنە زيارات ەتتى.
مەملەكەت باسشىسى ۇشتوبە قالاسىنداعى الەۋمەتتىك نىسانداردى دا ارالاپ كوردى.
بيىل اشىلعان گۋمانيتارلىق كوللەدجگە جانە دارىگەرلىك امبۋلاتورياعا باردى. سودان كەيىن, پرەزيدەنت 1963 جىلى سالىنعان, 1996 جىلى كەمەل توقاەۆتىڭ ەسىمى بەرىلگەن مەكتەپكە باردى. مەملەكەت باسشىسىنا قالامگەر كەمەل توقاەۆتىڭ شاعىن كابينەت-مۇراجايى تانىستىرىلدى. مۇندا جازۋشىنىڭ شىعارمالارى, تۇتىنعان جەكە زاتتارى قويىلعان.
