پرەزيدەنت قاسىم-جومارت توقاەۆ ۇلتتىق بانك توراعاسى عالىمجان ءپىرماتوۆتى قابىلدادى. مەملەكەت باسشىسىنا ۇلتتىق بانكتىڭ بيىلعى ءبىرىنشى جارتىجىلدىقتا جۇزەگە اسىرعان اقشا-كرەديت ساياساتىنىڭ الدىن الا قورىتىندىلارى جونىندە ەسەپ بەرىلدى.
قاسىم-جومارت توقاەۆقا الەمدەگى جانە قازاقستانداعى ەكونوميكالىق احۋال, ينفلياتسيا فاكتورلارى مەن ونى تومەندەتۋ ءۇشىن قابىلدانىپ جاتقان شارالار, تولەم بالانسىنىڭ ديناميكاسى, سونداي-اق بجزق, ۇلتتىق قور اكتيۆتەرى مەن التىن-ۆاليۋتا رەزەرۆتەرىنىڭ جاي-كۇيى تۋرالى باياندالدى.
عالىمجان ءپىرماتوۆتىڭ ايتۋىنشا, ۇلتتىق بانك قابىلداعان شارالاردىڭ ناتيجەسىندە ينفلياتسيا باسەڭدەپ كەلەدى جانە بانك بولجامىنا ساي قالىپتاسىپ وتىر. سونىمەن قاتار پرەزيدەنتكە اشىق بانكينگ تۇجىرىمداماسىن قولدانىسقا ەنگىزۋ جانە تولەم نارىعىن رەتتەۋ ماسەلەلەرى جونىندە مالىمەت بەرىلدى. كەزدەسۋ سوڭىندا مەملەكەت باسشىسى اقشا-كرەديت ساياساتىن ءتيىمدى ىسكە اسىرۋعا باعىتتالعان مىندەتتەر جۇكتەدى.
مەملەكەت باسشىسى قاسىم-جومارت توقاەۆ University Medical Center كورپوراتيۆتىك قورىنىڭ باسقارما توراعاسى يۋري پيانى قابىلدادى. پرەزيدەنتكە University Medical Center كورپوراتيۆتىك قورى قىزمەتىنىڭ ناتيجەسى مەن الداعى جوسپارى تۋرالى باياندالدى. مەملەكەت باسشىسىنا مەكەمە نەگىزىندە العاشقى ينتەگراتسيالانعان اكادەميالىق مەديتسينالىق ورتالىق قۇرۋ ارقىلى UMC-ءدى ترانسفورماتسيالاۋ بارىسى تۋرالى مالىمەت بەرىلدى. نەگىزگى ماقسات – ءبىلىم بەرۋ, زەرتتەۋ ءىسىن جانە كلينيكالىق تاجىريبەنى توعىستىرا وتىرىپ, مەديتسينالىق قىزمەت ساپاسىن جاقسارتۋ.
يۋري پيا قاسىم-جومارت توقاەۆقا زامان تالابىنا ساي دارىگەرلەردى دايارلاۋ ءۇشىن قوردىڭ جۇزەگە اسىرىپ جاتقان شارالارى تۋرالى ايتتى. سونداي-اق ەلىمىزدەگى مەديتسينالىق ءبىلىم بەرۋ ءىسىن جەتىلدىرۋ پەرسپەكتيۆالارى تۋرالى كوزقاراسىن جەتكىزدى. كەزدەسۋ بارىسىندا وتاندىق دەنساۋلىق ساقتاۋ جۇيەسىنىڭ تۇيتكىلدى ماسەلەلەرى, سونىڭ ىشىندە قولدانىستاعى ينفراقۇرىلىمدى ءتيىمدى پايدالانۋ جانە قازاقستاندا مەديتسينالىق كومەك كورسەتۋ ساپاسىن ارتتىرۋ شارالارى تالقىلاندى.
