بۇگىندە ەلوردانىڭ ەكى مەكتەبىندە «پروفەسسور ساباعى» وتەدى. №52 جانە №85 مەكتەپ-گيمنازيالارىندا بىلتىر ناۋرىز ايىنان بەرى ىسكە قوسىلعان بۇل ساباق قازىرگى تاڭدا وڭ ناتيجەسىن كورسەتىپ كەلەدى. ءبىلىمدى جاڭعىرتۋ ورتالىعىنىڭ تىڭ جوباسى سانالاتىن «پروفەسسور ساباعىنىڭ» مۇعالىمى – «ساتىلاي كەشەندى وقىتۋ» تەحنولوگياسىنىڭ اۆتورى, پەداگوگيكا عىلىمدارىنىڭ دوكتورى, پروفەسسور نۇرشا ورازاحىنوۆا.
بيىل كوكتەمدە 3 پروفەسسور نۇرشا الجانبايقىزىنىڭ «ساتىلاي كەشەندى وقىتۋ» تەحنولوگياسىنىڭ زەرتحاناسى اشىلدى. ال ءتول تەحنولوگيانىڭ تەوريالىق نەگىزى – الاش ارىستارىنىڭ وي-تۇجىرىمدارى. ن.ورازاحىنوۆانىڭ ۇستانىمى دا وسىعان سايادى. «ۇلتتى ءسۇيۋ, قازاقتىڭ وزگەشە مىنەزىن ساقتاپ قالۋ تۋعان انا ءتىلىن قالاي وقىتۋعا بايلانىستى. ءتىل – جۇرتتىڭ جانى. تىلىنەن ايىرىلعان جۇرت – جويىلعان جۇرت». حالەل دوسمۇحامەدۇلىنىڭ وسى تۇجىرىمىن شامشىراق ەتىپ العان تەحنولوگيانىڭ باستى مەجەسى دە وسى – انا ءتىلىمىزدىڭ جالاۋىن جىقپاي-اق ەكىنشى, ءۇشىنشى تىلدەردى مەڭگەرۋدىڭ نەگىزىن قالاۋ, تاڭداۋ ءپانى ارقىلى وقۋشىلاردىڭ ءبىلىمىن تەرەڭدەتىپ, دۇنيەتانىمىن كەڭەيتۋ. اتالعان زەرتحانا ۇكىمەتتىڭ «مەكتەپ وقۋشىلارىنىڭ فۋنكتسيونالدىق ساۋاتتىلىعىن دامىتۋ جونىندەگى» قاۋلىسىنا سايكەس, «ماڭگىلىك ەل» جالپىۇلتتىق يدەياسىن باسشىلىققا الا وتىرىپ, نۇر-سۇلتان قالاسىنىڭ ورتا ءبىلىم بەرۋ ۇيىمدارىندا جۇزەگە اسىپ جاتقان «پروفەسسور ساباعى» جوباسى اياسىندا ىسكە قوسىلعان ەدى. قازىرگى تاڭدا ءتول تەحنولوگيامىزعا ارنالعان زەرتحانا جۇمىسى ەلوردالىق ءبىلىم سالاسىنىڭ دامۋىنا زور ۇلەسىن قوسىپ كەلەدى.
«زاماناۋي تالاپتارعا ساي وقۋ-تاربيە ءۇردىسىن ۇلتتىق قۇندىلىقتارعا نەگىزدەۋ ارقىلى ۇلتتىق مەكتەپتىڭ ۇلگىسىن جاساۋ قاجەت. قازىرگى تاڭدا ءبىر عانا ەلوردانىڭ وزىندە 2 مىڭنان استام ءبىلىم الۋشى, 150-گە جۋىق تاربيەلەنۋشى سويلەۋ داعدىلارىن قالىپتاستىرىپ, ۇلتتىق ءتالىم-تاربيەمەن سۋسىنداۋدا. «ساتىلاي كەشەندى وقىتۋ» تەحنولوگياسىنىڭ تاجىريبەلىك الاڭ جۇمىستارىنا ەل كولەمىندە 7 بالاباقشا تاربيەشىسى مەن جۇزدەن استام مۇعالىم بەلسەندى قاتىسىپ ءجۇر. نۇر-سۇلتان اۋماعىندا سوڭعى 9 جىل كولەمىندە جۇرگىزىلىپ, اياسى كەڭەيىپ كەلە جاتقان ءتول تەحنولوگيانىڭ العاشقى جەڭىسى مەن جەتىستىكتەرى از ەمەس. بۇل تەحنولوگيا – اسىرەسە, قازاقشاعا شورقاق بالالار ءۇشىن تاپتىرماس وقىتۋ ادىستەمەسى. مەكتەپ وقۋشىلارى وسى تەحنولوگيا بويىنشا وقيتىن بولسا, انا ءتىلىن جەتىك مەڭگەرىپ قانا قويماي, سوزدىك قورىن مولايتىپ, وزگە پاندەر بويىنشا دا ويلاۋ قابىلەتىن دامىتادى» دەدى «پروفەسسور ساباعىنىڭ» مۇعالىمى نۇرشا الجانبايقىزى.
كوكتەم قارقىن
