پۋشكين پورترەتى
ۇلتتىق اكادەميالىق كىتاپحانادا ورىستىڭ ۇلى اقىنى الەكساندر پۋشكيننىڭ تۋعانىنا 220 جىل تولۋىنا وراي رەسەيدەگى عىلىم جانە مادەنيەت ورتالىعىنىڭ ۇيىتقى بولۋىمەن «پۋشكين پورترەتتەرى» اتتى كورمە بولدى.
ايتۋلى كورمەگە اقىننىڭ ومىرىنەن سىر شەرتەتىن 20-دان استام كارتينا قويىلدى. جالپى, اتالعان مۋزەي الپىس جىلدان بەرى ۇلى تۇلعانىڭ پورترەتتەرىن تاقىرىپ بويىنشا جيناپ كەلەدى. بۇگىندە مۇراجايدىڭ جەكە قورىندا 3000-نان استام سۋرەت ساقتالعان.
بۇل كورمە حرونولوگيالىق تۇرعىدان ەكى عاسىردى قامتيدى. وسى ۋاقىت ارالىعىنداعى اقىننىڭ پورترەتىن سالعان قىلقالام شەبەرلەرىنىڭ جۇمىسى شىعارماشىلىق ىزدەنىستەرىمەن ەرەكشەلەنەدى. كارتينالاردىڭ بوياۋى قانىق, ءبىر-بىرىنە دە ۇقسامايدى, كورنەكتى جاننىڭ وبرازى شەبەر اشىلعان.
كورمەنىڭ اشىلۋىندا قازاقستانداعى رەسەي فەدەراتسياسىنىڭ توتەنشە جانە وكىلەتتى ەلشىسى الەكسەي بوروداۆكين پەن پارلامەنت ءماجىلىسىنىڭ دەپۋتاتى, پۋبليتسيست-عالىم, «ءبىزدىڭ پۋشكين» اتتى كىتاپتىڭ اۆتورى ساۋىتبەك ابدراحمانوۆ ءسوز سويلەپ, ءوتىپ وتىرعان شارانىڭ ماڭىزى مەن اقىننىڭ شىعارماشىلىعى تۋرالى پاراساتتى وي ءوربىتتى. سونداي-اق شارا بارىسىندا «قازىرگى الەمدەگى پۋشكين» دەگەن تاقىرىپتا دوڭگەلەك ۇستەل ءماجىلىسى ءوتتى.