قازاقستان دۇنيەجۇزىلىك ساۋدا ۇيىمىنا مۇشەلىككە قابىلداندى. جەنەۆادان جەتكەن جاعىمدى جاڭالىق بارىمىزگە بارەكەلدى دەگىزىپ, جەر-جاھانعا جايىلىپ جۇرە بەردى.
وسىناۋ ايتۋلى وقيعاعا بايلانىس-تى ەلباسى ن.ءا.نازارباەۆ دسۇ باس كەڭەسىنىڭ وتىرىسىندا ءسوز سويلەپ, الەمدىك ايدىك نارىققا قاراي قايىرلى قادام باسقان قازاقستان تالابىن قولداپ, قۋاتتاعان بارلىق تىلەكتەس مەملەكەتتەرگە, ۇيىم حاتشىلىعىنا ۇزاق جىلدارعا سوزىلعان كەلىسسوزدەر كەزىندەگى سىندارلى ۇستانىمدارى ءۇشىن العىسىن ايتىپ, ريزاشىلىعىن ءبىلدىردى.
تاۋەلسىزدىك العاننان بەرگى ارالىقتا قازاقستان ەكونوميكاسى ەلەۋلى قيىندىقتاردى ەڭسەرىپ, ءبىرتالاي بيىكتەردى باعىندىردى. ءوندىرىس ورگە باسىپ, ەل-جۇرتىمىزدىڭ ەڭسەسى كوتەرىلدى. تابىستىڭ تايقازانى تاسىپ, اۋزىمىز اققا ءتيدى. قازاقستان ەكونوميكاسىنىڭ قۇرىلىمى دا ۇلكەن وزگەرىستەرگە ءتۇستى. بۇگىندە ءىجو-ءنىڭ 54 پايىزىن قىزمەت كورسەتۋ سالاسى قامتاماسىز ەتىپ وتىر.
قازاقستان ءوزىنىڭ ينۆەستيتسيالىق الەۋەتىن دە ەداۋىر ارتتىرعانىن اتاپ وتكەنىمىز ابزال. سوڭعى ون جىلدا ەل ەكونوميكاسىنا 200 ميلليارد دوللاردان استام شەتەلدىك ينۆەستيتسيالار تارتىلدى. ازۋىن ايعا بىلەگەن اقش, نيدەرلاند, شۆەيتساريا, فرانتسيا, ۇلىبريتانيا, كانادا, جاپونيا, كورەيا سەكىلدى الپاۋىت مەملەكەتتەر ءبىزدىڭ ءىرى ينۆەستورلارىمىزعا اينالدى. سونداي-اق, ەكونوميكانى ءارتاراپتاندىرۋدىڭ ءارتۇرلى ءادىس-تاسىلدەرى قولدانىلۋدا. ينۆەستيتسيالاردىڭ تەك مۇناي-گاز, تاۋ-كەن سەكتورلارىنا عانا ەمەس, سونىمەن قاتار, وڭدەۋ كاسىپورىندارىنا دا كەلۋىنە بارلىق جاعداي جاسالعان. باسىمدىق بەرىلگەن سالالارداعى ينۆەستورلار 10 جىلعا كورپوراتيۆتىك تابىس جانە جەر سالىقتارىن, 8 جىلعا مۇلىك سالىعىن تولەۋدەن بوساتىلعان.
سارابدال ساياساتتىڭ ارقاسىندا قول جەتكىزگەن جوعارىداعى جەتىستىكتەرىمىزدى تىلگە تيەك ەتكەن نۇرسۇلتان ءابىشۇلى قازاقستان ەكونوميكاسىن جاھاندىق نارىققا ينتەگراتسيالاۋ بويىنشا ۇلكەن جولدى باسىپ وتكەنىمىزدى جانە مۇنىمەن توقتاپ قالمايتىنىمىزدى ايتتى.
سونىمەن ويداعى ءىسىمىز ورىندالدى. كوزدەگەن مەجەمىزگە كوتەرىلدىك. ۇلكەن تىلەكتىڭ ۇستىندەمىز. ماقسات – ايقىن, مىندەت – زور.
قازاقستاننىڭ دسۇ-عا كىرۋى حالقىمىزدىڭ ءال-اۋقاتىن ارتتىرۋعا يگى ىقپالىن تيگىزگەي!
تالعات باتىرحان
