بايقوڭىر اۋدانىندا «مەكتەپكە جول» اكتسياسى اياسىندا «بالالارعا مەيىرىم سىيلا» ەكى ايلىق قايىرىمدىلىق شاراسى باستالدى. استانا قالاسى ءماسليحاتىنىڭ توراعاسى ەرلان كاناليموۆ پەن بايقوڭىر اۋدانىنىڭ اكىمى ەرلان جاۋلىباەۆ «ايماق-تاۋ», «جاننۇر» ساۋدا ورتالىعى جانىندا «مەكتەپكە جول-2022» برەندتەلگەن قايىرىمدىلىق ۇيشىگىنە وقۋ قۇرالدارى – سومكە, داپتەر, قالام سالىپ, اكتسيانى باستاپ بەردى.
– قايىرىمدىلىق اكتسياسىنىڭ ماقساتى – از قامتىلعان, كوپبالالى, تۇرمىسى ناشار وتباسى بالالارىنا, جەتىم بالالارعا, اتا-اناسىنىڭ قامقورلىعىنسىز قالعان بالالارعا الەۋمەتتىك كومەك كورسەتۋ, بالالاردىڭ الەۋمەتتىك سەبەپتەرمەن مەكتەپكە بارماۋىن بولدىرماۋ. قالانىڭ ءاربىر تۇرعىنى شاما-شارقى جەتكەنشە ارنايى جاشىكتەرگە وقۋ قۇرالى مەن مەكتەپ فورماسىن سالىپ, وقۋشىلاردىڭ ساپالى ءبىلىم الۋىنا ۇلەس قوسا الادى. بىلتىر بايقوڭىر اۋدانىندا اكتسيا اياسىندا 1000-عا جۋىق وقۋشى كەڭسە تاۋارىمەن قامتىلدى, – دەدى ەرلان جاۋلىباەۆ.
بيىل بايقوڭىر اۋدانىنداعى 17 مەكتەپكە 2521 وقۋشى 1-سىنىپقا قابىلدانادى. ال 11-سىنىپتى 1142 وقۋشى بىتىرەدى. ەلوردانىڭ ەسكى بولىگىندە ورنالاسقان اۋداندا كومەكتى كەرەك ەتەتىن وتباسىلار از ەمەس. ونىڭ ۇستىنە, اۋداندا تۇراقتى مەكەنجايى جوق تۇرعىندار بار.
2008 جىلى باستالعان «مەكتەپكە جول» رەسپۋبليكالىق اكتسياسى قانشا وتباسىنىڭ الەۋمەتتىك جانە گۋمانيتارلىق كومەك الۋىنا جول اشتى؟ بۇل تۋرالى ءماسليحات توراعاسى ەرلان كاناليموۆ ايتىپ بەردى.
– بىلتىر قايىرىمدىلىق اكتسياسى اياسىندا 546 ميلليون تەڭگەگە ەلوردانىڭ 8000 وقۋشىسى قولداۋ تاپتى. بيىل 8500 بالانى قامتۋ جوسپاردا بار. بۇل باعىتتا ارىپتەستەرىم, كاسىپكەرلەر, مەملەكەتتىك قىزمەتكەرلەر, قوعام بەلسەندىلەرى اتسالىسىپ, ساۋاپتى باستاماعا دەم بەرەتىنىنە سەنەمىن.
2022-2023 وقۋ جىلى حالىقتىڭ الەۋمەتتىك وسال توبىنا جاتاتىن بالالاردى مەكتەپ فورماسى جانە وقۋ قۇرالىمەن قامتاماسىز ەتۋگە ءار بالاعا 40000 تەڭگە ءبولىنىپ, استانادا 13500 بالانى قۇرادى. 2023-2024 وقۋ جىلى ءبىر وقۋشىعا 41000 تەڭگەگە جەتىپ, 14500 وقۋشى قامتىلادى. بۇل بويىنشا بيۋدجەتتەن ءتيىستى قارجى ءبولىندى, – دەدى ءماسليحات توراعاسى.
