ەلوردادا Dobro.qz ۆولونتەرلىك ۇيىمى مەن قالا اكىمدىگىنىڭ ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسياسى ۇيىمداستىرعان جاڭاجىلدىق قايىرىمدىلىق كەش وتۋدە. دۋماندى شاراعا اتا-اناسىنىڭ قامقورلىعىنسىز قالعان, كوپبالالى, الەۋمەتتىك از قامتىلعان وتباسى بالالارى مەن ەرەكشە قاجەتتىلىگى بار بالعىندار قاتىسا الادى.
«ەرەكشە قاجەتتىلىگى بار بالالاردى تاربيەلەپ وتىرعان 312 وتباسىدان 418 بالا قامتىلادى. اسىراۋشىسىنان ايىرىلعان 100 بالا, كوپبالالى وتباسىدان 112 بالعىن جانە از قامتىلعان وتباسىلاردان 30 بالا قاتىسادى. 18-26 جەلتوقسان كۇندەرى كۇن سايىن 40 مينۋتتان 8 مەرەكەلىك كەش ۇيىمداستىرىلادى. كارانتيندىك تالاپتاردى ەسكەرىپ, بارلىق سانيتارلىق تالاپتاردى ساقتاي وتىرا 10-15 بالاعا وتكىزەمىز. جالپى, ءبىر كۇندە 80-100 ورەنگە ەرەكشە كوڭىل-كۇي سىيلاپ, مەرەكەلىك سىيلىقتار ۇلەستىرەمىز. ءتىپتى شارا اياقتالعان سوڭ, ۇيىنە قايتقىسى كەلمەي, شىرشا جانىندا وتىرىپ الاتىندار دا بار. ءوزىم دە ەرەكشە قاجەتتىلىگى بار بالانى تاربيەلەپ وتىرعان انامىن. سوندىقتان مۇندا كەلگەن ءاربىر بالا مەن ءۇشىن ىستىق. ولاردىڭ قۋانعانىن كورىپ, ءىشىم جىليدى. جۇزدەرىنە كۇلكى ءۇيىرىلىپ, شاتتىققا بولەنگەنىن كورگەندە ءوزىمدى ەڭ باقىتتى ادام رەتىندە سەزىنەمىن. وزگەگە كومەكتەسكەن سايىن ءوز بالامنىڭ ساۋىعىپ كەتەرىنە سەنىمىم ارتا تۇسەدى. ەرىكتىلەرگە العىس ايتامىن. سەبەبى ولاردىڭ ەڭبەگى وراسان» دەيدى Dobro.qz ۆولونتەرلىك ۇيىمىنىڭ مۇشەسى شىنىقۇلوۆا بوتاگوز.
3 بالانىڭ اناسى ساعىندىق ايىم جاڭا جىلدىق كەشكە قاتىسقان ۇلىنىڭ ەرەكشە قۋانعانىن ايتىپ, ۇيىمداستىرۋشىلارعا ريزاشىلىعىن جەتكىزدى. «بالالارعا وتە قاتتى ۇناپ جاتىر. ەرىكتىلەر مەن ۇيىمداستىرۋشىلارعا ايتار العىسىم شەكسىز. سەبەبى بالالار بيىل ەشقايدا شىققان جوق, مۇنداي جاڭا جىلدىق كەشكە قاتىسامىز دەپ ويلاعان دا جوقپىز. مەن «باقىتتى شاڭىراق» مۇگەدەك بالالارى بار نەمەسە تاربيەلەپ وتىرعان وتباسىلارعا قولداۋ كورسەتۋ» قوعامدىق قورعا تىركەلگەنمىن. سول ارقىلى بۇگىنگى جيىنعا قاتىسىپ وتىرمىز» دەيدى ول.
26 جەلتوقسانعا دەيىن جالعاساتىن ىزگى شارا 1000 استانالىققا مەرەكەلىك كوڭىل-كۇي سىيلايدى. بۇل سىرقاتىنىڭ سالدارىنان كوپشىلىككە قوسىلا الماي وقشاۋلانىپ قالعان بالالارعا وزدەرىن قوعامنىڭ تولىققاندى مۇشەسى رەتىندە سەزىنەتىندەي كۇش بەرەرى ءسوزسىز.
