قايىرىمدىلىقتى قولدايتىن قور

قازاقستان رەسپۋبليكاسى­نىڭ تۇڭعىش پرەزيدەنتى – ەلباسى قورىنا جۋىردا  15 جىل تولادى. قوردىڭ وسى جىلدار ىشىندە الەۋمەتتىك, ادەبي-مادەني جانە وقۋ-اعارتۋ, عىلىمي باعىتتاردا تىندىرعان جۇمىستارى از ەمەس. بيىلدىڭ وزىندە بۇل ۇيىم اۋىز تولتىرىپ ايتار­لىقتاي ىستەردى اتقارىپ تاستاپتى. تاياۋدا اتالمىش قور باسشىلىعى ەل پرەزيدەنتىمەن كەزدەسىپ, بيىلعى قىزمەتىنىڭ قورى­تىندىلارىمەن تانىستىردى. سوعان قاراپ, ءسوزىمىزدىڭ شىندىعىنا كوز جەتكىزۋگە بولادى.

وسى جىلى قور ءارتۇرلى باعىتتا 25 مىڭعا جۋىق ادامدى قامتىعان ەلۋگە تارتا شارا وتكىزدى. اتقارىلعان ىستەرگە توقتالار بولساق, بيىل جىل سايىن وتكىزىلىپ تۇراتىن «الەۋمەتتىك يدەيالار مەن جوبالار» جارمەڭكەسىندە ەل اۋماعىنداعى 22 ۇكىمەتتىك ەمەس ۇيىم قوردىڭ قارجىلىق قولداۋىنا يە بولعان. سونىڭ ىشىندە قور مۇمكىندىگى شەكتەۋلى ادامداردى الەۋمەتتىك بەيىمدەۋگە جانە ساۋىقتىرۋعا, ينكليۋزيۆتى قوعامدى دامىتۋعا, ءتۇرلى ەتنوس وكىلدەرى اراسىنداعى دوستىق, تاتۋلىق جانە كەلىسىمدى نىعايتۋعا, وتباسىنىڭ الەۋمەتتىك ورتاداعى مارتەبەسى مەن ءرولىن ارتتىرۋعا اتسالىسقان.
«مەكتەپكە جول» قايىرىمدىلىق اكتسياسى اياسىندا قاراعاندىدا جانە ونىمەن سەرىكتەس شاحتينسك, تەمىرتاۋ, اباي, جەزقازعان قالالارىندا جانە پاۆلوداردا تۇراتىن كوپ بالالى جانە از قامتىلعان وتباسىلاردان شىققان بالالارعا جانە جەتىمدەرگە نەمەسە اتا-انا قامقورلىعىنان ايىرىلعان بالالارعا وقۋ قۇرالدارىن الىپ بەرۋگە سەپتەستى.
قاراعاندى وبلىسىنداعى ع.مۇستافين اتىنداعى اۋىل تۇرعىندارى بيىل قىزىل سۋدان ەداۋىر زارداپ شەككەنى بەلگىلى. بۇل اۋىلدىڭ بالالارى دا قوردىڭ كومەگىمەن 1 قىركۇيەككە دايىن بولدى. اتالمىش اكتسيا اياسىندا قور جالپى العاندا مىڭنان استام بالاعا جاردەم كورسەتتى. بۇدان تىس بالالاردى قورعاۋ كۇنىنە وراي جەتىم جانە اتا-انا قامقورلىعىنسىز قالعان 300 بالاعا سىيلىقتار بەرىلدى. مۇمكىندىگى شەكتەۋلى 1300 بالا «امان كەلەشەك» اتتى مادەني-سپورتتىق فەستيۆالگە قاتىستى.
بيىل قىتاي حالىق رەسپۋبليكاسى نۇرسۇلتان نازارباەۆتى «جىبەك جولى» سىيلىعىمەن ماراپاتتادى. وسى سىيلىققا تيەسىلى قوماقتى قاراجاتتى ەلباسى «ميلوسەرديە» قايىرىمدىلىق قورىنا اۋداردى. اتالمىش قوردىڭ ديرەكتورى ارۋجان سايىننىڭ ايتۋىنشا, بۇل قارجى 29 بالانىڭ ءومىرىن ساقتاپ قالۋعا سەپتىگىن تيگىزىپ, اۋىر ناۋقاسقا شالدىققان جەتكىنشەكتەرگە قاجەتتى وتالار جاساۋعا مۇمكىندىك بەردى.
تاياۋدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى الەۋمەتتىك جەتىمدىكتىڭ الدىن الۋ ماسەلەسىنە ارنالعان «دوڭگەلەك ۇستەل» ءماجىلىسىن وتكىزدى. وندا اتا-انانىڭ قامقورلىعىنسىز قالعان بالالاردى وتباسىلىق ومىرگە دايىنداۋ جايى قوزعالىپ, بۇعان جاردەمدەسەتىن الەۋمەتتىك ۇستازدار مەن پسيحولوگتاردى دايارلاۋ جايى­نا نازار اۋدارىلدى. الماتى جانە استانا قالالارىندا «وتباسىن قولداۋ» ورتالىعىن اشۋ مەن «كاسىبي پاتروناتتى وتباسىلار» سىندى قاناتقاقتى جوبانى جۇزەگە اسىرۋ تۋرالى ايتىلدى.
ستاتيستيكالىق دەرەكتەرگە سۇيەنسەك, جىل سايىن ەلىمىزدە وكپەنىڭ قاتەرلى ىسىگىنە ءتورت مىڭعا جۋىق ادام شالدىعادى. نەگىزىنەن, بۇل دەرتكە ەر ادامدار كوپ ۇشىرايدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى وتكەن كوكتەمدە جان-جاقتان بۇل سالاداعى دارىگەر مامانداردى شاقىرىپ, اتالعان ماسەلەنىڭ شەشىمىن تابۋعا تىرىسىپ, حالىقارالىق كونفەرەنتسيا ۇيىمداستىردى. مۇنداي شارالاردىڭ قاتارىنا حالىقارالىق جەر كۇنىنە ارنالعان ۇلتتىق ەكولوگيالىق ءىى جاستار فورۋمىن دا قوسۋعا بولادى.
ەلباسى قورى سونداي-اق, شىعار­ماشىلىقپەن جانە عىلىممەن اينالىساتىن جاستارعا ۇنەمى قولداۋ كورسەتىپ كەلەدى. بيىل بۇل باعىتتا قور 9 گرانت ءبولدى جانە مادەنيەت پەن عىلىمنىڭ جاس قايراتكەرلەرىنە 20 سىيلىق تاعايىندادى. بەلسەندى جانە دارىندى 80 ستۋدەنتكە ءداستۇرلى ستيپەنديالارىن بەردى. جاس عالىمداردىڭ باسىن قوسىپ, «استانا ەكسپو-2017» تاقىرىبىندا «دوڭگەلەك ۇستەل» ءماجىلىسىن وتكىزدى. وندا جاستار وزدەرىنىڭ عىلىمي جوبالارىن تانىستىرۋعا مۇمكىندىك الدى.
– قور جىل بويى سىياقىلار, ستيپەنديالار مەن گرانتتار تاپسىرۋ جونىندەگى كونكۋرستىق باعدارلامالاردى عانا جۇزەگە اسىرىپ قويماي, «التىن توبىلعى» سەكىلدى جاڭا ادەبي بايقاۋدى دا جاريالادى. مۇنىڭ قورىتىندىسى جەلتوقسان ايىندا بەلگىلى بولادى, – دەيدى قوردىڭ اتقارۋشى ديرەكتورى ساعىندىق نۇراحانوۆ.
«التىن توبىلعى» بايقاۋى تۋرالى كەڭىرەك اڭگىمەلەسەك, وعان 18-35 جاس ارالىعىنداعى قالامگەرلەر قاتىسىپ جاتىر. «ەڭ ۇزدىك پروزا», «ەڭ ۇزدىك پوەزيا», «ەڭ ۇزدىك دراماتۋرگيا», «ەڭ ۇزدىك بالالار ادەبيەتى» اتالىمدارىنىڭ جەڭىمپازدارىنىڭ ارقايسىسىنا 1 ميلليون تەڭگە تابىستالادى. سونداي-اق, «ماڭگىلىك ەل» تاقىرىبىنداعى ۇزدىك تۋىندى اۆتورىنا 1,5 ميلليون تەڭگە بەرىلەدى.
بيىل ەلىمىزدە تۇڭعىش رەت «Bala Turkvizyon» بايقاۋى ءوتتى. وندا قاراعاندىلىق ورەن تۇرسىنحان ەركىن جەڭىمپاز اتانىپ, جاقىندا تۇركيانىڭ ىستامبۇل قالاسىندا وتەتىن اتالمىش بايقاۋعا قاتىسۋعا جولداما الدى. بۇل بايقاۋ دا قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ قولداۋىمەن ۇيىمداستىرىلدى.
بۇدان وزگە اتالمىش قور «مەيiرiم – 2015» بالالار شىعارماشىلىعى بايقاۋىن, «جەڭىس رۋحى» ءان جارىسىن ۇيىمداستىرىپ, جاس تالانتتار ونەرىنىڭ شىڭدالۋىنا جول اشتى.
ەل اۋماعىنان تىس ماسكەۋ قالاسىنىڭ مەتروپوليتەنىندە «ۆىستاۆوچنايا» مەترو ستانتسياسىندا, تبيليسي قالاسىنداعى گرۋزيانىڭ ۇلتتىق مۇراجايى گالەرەياسىندا جانە قىتايدىڭ «دزينتاي» پەكين ونەر مۇراجايىندا «بەلگىسىز قازاقستان» اتتى فوتوكورمەنىڭ اشىلۋىنا سەپ بولىپ, ەلىمىزدىڭ الەمگە تانىلا تۇسۋىنە ۇلەس قوستى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى جىل اياعىنا دەيىن تاعى وسىنداي ءارتۇرلى باعىتتاعى 17 شارانى وتكىزۋدى جوسپارلاپ قويىپتى. بۇل – يگى ىستەر جالعاسادى دەگەن ءسوز.

     امانعالي قالجانوۆ