ەندى بىرەر اپتادان كەيىن كەزەكتى وقۋ جىلى اياقتالىپ, وقۋشىلار جازعى دەمالىسقا شىعادى. ەلوردالىق ورەندەر ءۇشىن بيىلعى دەمالىس قانداي قىزىقتارىمەن وتپەك؟ بۇل تۋرالى قالالىق ءبىلىم باسقارماسى قوسىمشا ءبىلىم بەرۋ جانە تاربيە جۇمىستارى ءبولىمىنىڭ جەتەكشى مامانى اسەم ۇسەنوۆا ايتىپ بەردى.
– وقۋشىلاردىڭ جازعى دەمالىسىن ءتيىمدى ءارى قىزىقتى وتكىزۋ ءۇشىن قانداي شارالار ازىرلەنىپ وتىر؟
– بيىل 9-شى جانە 11-ءشى سىنىپتاردا وقيتىن بالالاردان باسقا وقۋشىلاردىڭ 98 پايىزىن جازعى دەمالىستىڭ بارلىق تۇرىمەن قامتۋ جوسپارلانىپ وتىر. جازدىڭ العاشقى كۇندەرىندە 3 ساۋىقتىرۋ ورتالىعى جۇمىسىن باستايدى. اتاپ ايتقاندا, «بوروۆيچوك» (2 ماۋسىمنان باستاپ), «ارمان» جانە «باتىر» (9 ماۋسىمنان باستاپ). بۇعان قوسا, مەكتەپتەردىڭ جانىنان 2 ماۋسىم مەن 13 شىلدە ارالىعىندا 68 لاگەر جانە 66 «ديدارلى جاز» سپورتتىق ويىن-ساۋىق الاڭى جانە «ايبىندى ماۋسىم» اسكەري سپورتتىق الاڭى مەن جازعى دەمالىس اكادەمياسى قۇرىلماقشى.
– بۇل لاگەرلەرگە جولدامانى كىم بەرەدى؟
– بالالارىن دەمالىس لاگەرىنە ءجىبەرگىسى كەلگەن اتا-انا بالاسى وقيتىن مەكتەپكە حابارلاسىپ, بارلىق مالىمەتتى بىلۋگە بولادى. جولداما تەك مەكتەپ ارقىلى بەرىلەدى.
– لاگەرلەر اقىلى بولار؟
– يا, مەكتەپىشىلىك لاگەرلەرگە 10 كۇن بويى دەمالۋ – 3 000-4 000 تەڭگە ارالىعىن قۇرايدى. بۇل بالالاردى تاماقتاندىرۋمەن اينالىساتىن مەردىگەر كاسىپورنى بەلگىلەگەن باعاعا بايلانىستى. بارلىق لاگەرلەردە الەۋمەتتىك جاعدايى از قامتىلعان وتباسىلاردىڭ بالالارى جانە جەتىم بالالار تەگىن دەمالادى.
– ال وقۋشىلاردىڭ شىعارماشىلىعىن, وي تانىمىن ارتتىرۋعا باعىتتالعان قانداي دا ءبىر ۇيىرمەلەر ۇيىمداستىرىلعان با؟
– ارينە, ونسىز بولمايدى عوي. قالادا 2 ماۋسىمنان 11 شىلدەگە دەيىن ماحامبەت وتەمىسۇلى اتىنداعى وقۋشىلار سارايىندا «جازعى شىعارماشىلىق مەكتەبى» اشىلادى. بالالار وسى مەكتەپكە بارىپ, شىعارماشىلىعىن شىڭدايدى. زياتكەرلىك قابىلەتتەرىن ارتتىرىپ, وي-ۇسىنىستارىن ورتاق تالقىلاي الادى. جازعى مەكتەپ اۋىسىم بويىنشا جۇمىس ىستەيدى. ءار اۋىسىمعا 12 كۇننەن كەلەدى. وسى ۋاقىت ىشىندە بالالار دەمالىسىن قىزىقتى وتكىزىپ قانا قويماي, قارىم-قابىلەتىن وي-ءورىسىن دە دامىتا الادى.
قىمبات توقتامۇرات