استانا قالالىق ەنەرگەتيكا باسقارماسىنىڭ مالىمەتىنە قاراعاندا, ەلورداداعى الەۋمەتتىك نىساندار مەن تۇرعىن ۇيلەردىڭ جىلىتۋ ماۋسىمىنا دايىندىعى 90 پايىزدان اسقان. ەندى ءبىر ساناۋلى ۋاقىتتان كەيىن قالا قىسقا 100 پايىز دايىن بولادى.
قالادا, اسىرەسە, الەۋمەتتىك نىسانداردى قىسقى ماۋسىمعا دايىنداۋ اسا ماڭىزدى. سول سەبەپتەن وعان ءبىرىنشى كەزەكتە كوڭىل بولىنەدى. قازىرگى ۋاقىتتا سارىارقا اۋدانىنداعى دەنساۋلىق ساقتاۋ نىساندارىنىڭ دايىندىعى 100 پايىز ەكەن. الماتى اۋدانىندا 19 دەنساۋلىق ساقتاۋ نىسانىنىڭ 12-ءسى قىسقا ساقاداي ساي, ياعني دايىندىق 95 پايىز شاماسىندا دەگەن ءسوز. سارىارقا اۋدانىندا ءبىلىم بەرۋ نىساندارى دا تولىق دايىن ەكەن. الماتى اۋدانىندا 76 نىساننىڭ 73-ءى تولىق دايىندىقتان وتكەن. قالعان 3 نىساندى ءبىر-ەكى اپتا كولەمىندە اياقتاۋ جوسپارلانىپ وتىر. بىلايشا ايتقاندا, جىلىتۋ ماۋسىمى باستالماي تۇرىپ-اق بۇل اۋداندا دا ءبىلىم بەرۋ نىساندارى قىسقا تولىق دايىن بولادى.
استانا قالاسىندا 2255 تۇرعىن ءۇي قورى بولسا, سونىڭ 2135-ىندە دايىندىق جۇمىستارى تولىق اياقتالعان. بۇل كورسەتكىشتى اۋداندارعا ءبولىپ قارايتىن بولساق, ەسىل اۋدانىنداعى دايىندىقتىڭ 88 پايىز شاماسىندا ەكەنىن كورەمىز. بۇل اۋدانداعى 258 نىساننىڭ 226-سى جىلىتۋ ماۋسىمىنا دايىن. ال سارىارقا اۋدانىنداعى 927 نىساننىڭ 908-ىندە جوندەۋ جۇمىستارى تامىز ايىنىڭ 20-سىنا جەتپەي اياقتالعان. ورىندالعان دايىندىق جۇمىسى 98 پايىزدى قۇراپ وتىر. الماتى اۋدانى – كولەمى جاعىنان ەلورداداعى ەڭ ۇلكەن اۋدان, مۇندا 1070 تۇرعىن ءۇي نىسانى قىسقا دايىندىقتان وتكىزىلۋى ءتيىس. قازىر ونىڭ 1012-ءسى تولىق دايىندىقتان وتكەن. كورىپ وتىرعانىمىزداي, قالاداعى ۇيلەر, الەۋمەتتىك-مادەني نىسانداردا دايىندىق جۇمىستارى تولىق اياقتالۋعا جاقىن.
ال كوشەدەگى ۇلكەن جىلۋ جەلىلەرىن ازىرلەۋ, جاڭارتۋ, جوندەۋ جۇمىستارىن «استانا-تەپلوترانزيت» اق ءساۋىر ايىنان باستاپ اتقارىپ جاتىر. بۇل اكتسيونەرلىك قوعام جالپى ۇزىندىعى 583 شاقىرىم بولاتىن جىلۋ جەلىسىنە قىزمەت كورسەتەدى. بۇگىندە 3 698 تەكشە مەتر جىلۋ قۇبىرىنىڭ ءۇستى جىلۋ ساقتايتىن ارنايى ماتەريالمەن ورالعان, 1,432 شاقىرىم تاراتۋ جەلىسى كۇردەلى جوندەۋدەن وتكەن. وسىلايشا, بۇل كاسىپورىن دا بىرتىندەپ دايىندىق جۇمىستارىن اياقتاپ كەلەدى. ەلوردانى جىلۋمەن قامتيتىن ەكى ۇلكەن جىلۋ ەلەكتر ورتالىعىنىڭ (جەو-1, جەو-2) دايىندىعىنا كەلەتىن بولساق, مۇنداعى جوندەۋ, ازىرلەۋ جۇمىستارى 90 پايىز شاماسىندا ورىندالعان. ەنەرگەتيكا ماماندارى جىلىتۋ ماۋسىمى باستالعانشا بارلىق ەنەرگيا كەشەنىنە دايىندىق پاسپورتى رەسىمدەلىپ, تۇرعىن ءۇي قورى مەن ءتۇرلى نىساندارعا جىلۋدىڭ مەرزىمىنەن كەشىكتىرىلمەي بەرىلەتىنىنە سەنىمدى.
مەڭدوللا شامۇراتوۆ
