ەلوردادا ازاماتتىق قورعاۋ قىزمەتتەرىنىڭ قىسقى ماۋسىمعا دايىندىعى كورسەتىلدى. №7 مامانداندىرىلعان ءورت ءسوندىرۋ ءبولىمىنىڭ اۋماعىندا قالا اكىمىنىڭ ورىنباسارى ەرمەك قيزاتوۆ ەلوردالىق ازاماتتىق قورعاۋ قىزمەتى بولىمشەلەرىنىڭ قىسقى كەزەڭگە جانە الداعى «قىس-2021» وقۋ-جاتتىعۋلارىنا دايىندىعىمەن تانىستى.
«ءبىزدىڭ ازاماتتىق قورعاۋ قىزمەتتەرىمىز – توتەنشە جاعدايلار دەپارتامەنتى ۇلتتىق ۇلانمەن جانە پوليتسيا دەپارتامەنتىمەن بىرلەسىپ, تەحنيكالاردى, اۋا رايىنىڭ كۇرت وزگەرۋى كەزىندە قىزمەت ەتەتىن بولىمشەلەردىڭ دايىندىعىن كورسەتتى. تەحنيكا جوعارى دەڭگەيدە دايىندالعان. توتەنشە جاعدايلار كەزىندە جۇمىلدىرۋ, بارلىق قىزمەتتەردى ۇيلەستىرۋ قامتاماسىز ەتىلدى. جىل سايىن وسىنداي جۇمىستار جۇرگىزەمىز. كۇردەلى كليماتتىق كەزەڭدەر بولدى, اسىرەسە 2019 جانە 2020 جىلدارى, سونداي-اق سۋ تاسقىنى كەزەڭىندە. بارلىق قىزمەتتىڭ جۇمىسىن ۇيلەستىرۋ جوسپارلانعان. بۇگىنگە دەيىن جىبەرىلگەن قاتەلىكتەرمەن جۇمىس جۇرگىزىلدى. بيىلعى قىستا دا قىزمەتتەرىمىز ناقتى جۇمىس ىستەيتىن بولادى دەپ ويلايمىن» دەدى ەرمەك قيزاتوۆ.
تج جويۋ باسقارماسىنىڭ باستىعى ەلدور رايىمبەكوۆتىڭ ايتۋىنشا, 28 بىرلىك تەحنيكا مەن 266 ادام 100 كم راديۋستاعى باعىتتار بويىنشا جۇرگىزىلەتىن ىزدەستىرۋ-قۇتقارۋ جانە اۆاريالىق-قۇتقارۋ جۇمىستارىنا قاتىسادى.
«سونداي-اق بىزدە اپاتتار مەديتسيناسى ورتالىعى بار, ول جول-كولىك وقيعالارى كەزىندە قارلى ۋچاسكەلەردە قالعان ەلدى مەكەندەرگە مەديتسينالىق كومەك كورسەتەدى. جكو كەزىندە قۇتقارۋ قۇرالدارى بار اۆاريالىق-قۇتقارۋ تەحنيكاسى جۇمىلدىرىلادى. جىل سايىن دايىندىق جۇرگىزىلەدى. 2019-2020 جىلدارى قار باسقان ۋچاسكەلەر كوپ بولدى. ءبىز قار قۇرساۋىنان 2 مىڭعا جۋىق ادامدى ەۆاكۋاتسيالادىق. سونداي-اق مەديتسينالىق كومەككە مۇقتاج 6 جۇكتى ايەل ەلدى مەكەندەردەن قالاعا جەتكىزىلدى» دەدى ەلدور رايىمبەكوۆ.
تجد تۇرعىندارعا 90% جانە ودان دا كوپ ىقتيمالدىعى بار داۋىلدى ەسكەرتۋلەر كەزىندە شىقپاۋ كەرەكتىگىن ايرىقشا اتاپ ءوتتى.
«تۇرعىندار مەن جۇرگىزۋشىلەردىڭ نازارىن مىناعان اۋدارعىم كەلەدى, 90% ىقتيمالدىعى بار داۋىلدى ەسكەرتۋ تۋرالى SMS-حابارلامالار كەلىپ تۇسكەن كەزدە قالادان تىس جەرلەرگە شىقپاۋ كەرەك. توتەنشە جاعدايلاردا ءوزىڭىزدىڭ تۋىستارىڭىزدى حاباردار ەتىپ, قوسىمشا 112 نومىرىنە قوڭىراۋ شالىپ, جولداعى جاعداي تۋرالى ءبىلۋىڭىز كەرەك. سونىڭ ىشىندە «قازاۆتوجول» سايتىندا جابىق تراسسالار تۋرالى اقپارات بولادى» دەپ تۇيىندەدى باسقارما باسشىسى.
https://www.youtube.com/watch?v=8v3Q660GPbY
