استانا اكىمى اسەت يسەكەشەۆتىڭ توراعالىعىمەن قالالىق اكىمدىكتە اپپاراتتىڭ كەزەكتى اپتالىق وتىرىسى ءوتتى. وندا قالا تىرشىلىگىنە قاتىستى بىرقاتار ماسەلەلەر قارالدى, دەپ حابارلايدى ەلوردا اكىمدىگىنىڭ مەديا ورتالىعى.
جيىن بارىسىندا استانا قالاسى اكىمىنىڭ ورىنباسارى قوسمان ايتمۇحامەتوۆ قالاداعى جالپى جاعدايعا توقتالىپ ءوتتى.
«استاناداعى جالپى جاعداي تۇراقتى. ەسەپتى كەزەڭدە تابيعي اپاتتار ورىن العان جوق. تەحنوگەندىك سيپاتتاعى 4 ءورت وقيعاسى تىركەلدى. ولاردىڭ ۇشەۋىندە ازاماتتار ۋلى گازدان زارداپ شەككەن بولاتىن. عيمارات جانۋىنىڭ ءبىر وقيعاسى تىركەلدى. جالپىلاي العاندا, ءورت سالدارىنان 11 ادام زارداپ شەكسە, ولاردىڭ 5-ءى – بالالار. ابىروي بولعاندا, قۇرباندار جوق» دەپ مالىمدەدى قوسمان ايتمۇحامەتوۆ.
وتىرىس بارىسىندا ەكولوگيا ماسەلەسى دە تالقىعا سالىندى. استانا اكىمى ورىنباسارىنىڭ ايتۋىنشا, اۋانىڭ لاستانۋىنا جول قوزعالىسىن رەتتەۋدىڭ جەتىلدىرىلمەگەن جۇيەسى مەن ەسكى كولىكتەردىڭ زياندى زاتتاردى شىعارۋى دا سەبەپ بولۋى مۇمكىن.
«بىزدە ماشينانىڭ بوس ءجۇرىسى دەگەن ۇعىم بار. ماشينالار قيىلىستاردا تۇرعان كەزدە, تاڭەرتەڭ ونى ىسكە قوسۋ كەزىندە اتموسفەراعا زياندى زاتتار شىعادى. وسى ماسەلەنى شەشۋ ءۇشىن ءبىز جانار-جاعار مايدى گازعا اۋىستىرۋدى ۇسىنىپ وتىرمىز. بۇگىنگە دەيىن 18-20 مىڭعا جۋىق كولىك قۇرالىن كوك وتىنعا اۋىستىرۋ جونىندەگى رۇقسات بار» دەپ اتاپ ءوتتى ول.
جوعارىدا اتالعان ماسەلەلەردى شەشۋ ماقساتىندا ەلوردا اكىمى ۇكىمەتتىڭ اتىنا زاڭناماعا موتورلى وتىننىڭ ساپاسىن باقىلاۋ تۇرعىسىندا وزگەرىستەر ەنگىزۋ جونىندەگى ۇسىنىم حاتتى جولداۋدى تاپسىردى.
ال ەنەرگەتيكا باسقارماسىنىڭ باسشىسى باقتىبەك جاپاەۆتىڭ جەو-2 كەڭەيتۋ مەن قايتا جوندەۋ جوباسىن ىسكە اسىرۋ اياسىندا № 7, 8 ستانسالاردىڭ ەنەرگەتيكالىق قازاندىقتارىن ورناتۋ كوزدەلىپ وتىرعانىن جەتكىزدى.
2017 جىلى № 3 سۋ جىلىتۋ قازاندىعى, 2018 جىلى
№ 2,4 سۋ جىلىتۋ قازاندىقتارى جانە 2019 جىلى № 1 سۋ جىلىتۋ قازاندىعى جوندەۋدەن وتكىزىلەدى.
اپپاراتتىق كەڭەستە ەلوردانى گازداندىرۋ جۇمىستارىن كەزەڭ-كەزەڭىمەن ىسكە اسىرۋ ماسەلەسى دە ايتىلدى. جيىندا تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى مۇسا تاناباەۆ ۆەدومستۆونىڭ «استانا قالاسىنىڭ 2017-2018 جىلدارعا ارنالعان قورشاعان ورتانى جاقسارتۋ شارالارىنىڭ كەشەندى جوسپارى» جوباسىن جۇزەگە اسىرۋعا كىرىسكەنىن مالىمدەدى.
استانانىڭ ەنەرگەتيكا باسقارماسى جەكە سەكتورداعى تۇرعىن ۇيلەر مەن ءزاۋلىم عيماراتتاردىڭ كەزەڭمەن «Global Gaz Group» جشس قاتىسۋىمەن گاز وتىنىنا كوشىرۋ جۇمىستارىن قولعا الىپ وتىر. وسى كۇنى «تۇران» ستانساسىنان تومەندەتىلگەن تابيعي گازدى (قۋاتى ساعاتىنا 10 مىڭ تەكشە) العاشقى تۇتىنۋشى نازارباەۆ ۋنيۆەرسيتەتىنە جىبەرۋ باستالدى. سونداي-اق, عارىش ورتالىعى مەن قورعانىس مينيسترلىگى اكادەمياسىن قوسۋ جۇمىستارى اياقتالدى. 2018 جىلدىڭ سوڭىنا دەيىن گازداندىرۋدىڭ ەكىنشى كەزەڭى پريگورودنىي, تەلمان تۇرعىن الاپتارىنداعى جەكە سەكتورداعى ۇيلەر مەن نازارباەۆ حالىقارالىق اۋەجايى اۋدانىن قامتيتىن «تەلمان» ستانساسى ىسكە قوسىلادى دەپ جوسپارلانۋدا.
وسىعان وراي, اسەت يسەكەشەۆ پرەمەر-ءمينيستردىڭ اتىنا ەكولوگيا ماسەلەلەرىنە قاتىستى كەڭەس وتكىزۋ جونىندە حات جولداۋدى, كاسىپكەرلىك جانە ونەركاسىپ باسقارماسى مەن ءىىد جپق كومىر ساپاسىن باقىلاۋدى كۇشەيتۋدى, قالا كوشەلەرى مەن اۋاسىن لاستايتىن كولىك قۇرالدارىن قاتاڭ قاداعالاۋدى تاپسىردى.
سونىمەن قاتار, استاناداعى كريمينوگەندىك جاعدايدىڭ احۋالى, قۇرىلىستىڭ پروبلەمالى نىساندارى, قالانى جارىقتاندىرۋ, ءمجا جوبالارىن ىسكە اسىرۋدىڭ بارىسى, جىلىتۋ ماۋسىمى, ازىق-تۇلىك باعاسىن تۇراقتاندىرۋ ءدارى-دارمەك توپتارى مەن ولاردىڭ قورلارىنا قاتىستى ماسەلەلەر تالقىلاندى.
جيىننىڭ قورىتىندىلارى بويىنشا, اسەت يسەكەشەۆ ءوز ورىنباسارلارى مەن باسقارما باسشىلارىنا, اۋدان اكىمدەرىنە بىرقاتار ناقتى تاپسىرما بەردى.
