2022 جىلدىڭ 1 ماۋسىمىنداعى جاعداي بويىنشا قالاداعى بەلسەندى كاسىپكەرلەر سانى 175,5 مىڭدى قۇراپ, وتكەن جىلدىڭ سايكەس كەزەڭىمەن سالىستىرعاندا 13,3 پايىزعا ارتتى. ولاردىڭ نۇر-سۇلتان قالاسىنىڭ ىشكى وڭىرلىك ونىمىنە قوسقان ۇلەسى 5636,6 ملرد تەڭگەنى نەمەسە 66,9 پايىزدى قۇرادى. بۇل – قازاقستاننىڭ بارلىق ءوڭىرى اراسىنداعى ەڭ جوعارى كورسەتكىش. ەلوردالىق كاسىپكەرلەر كەشە «قازاقستاننىڭ ۇزدىك تاۋارى» وڭىرلىك كورمە-بايقاۋىندا ءوز ونىمدەرىن ۇسىندى. ەلىمىزدە وتاندىق ءونىمنىڭ ساپاسىن ارتتىرۋعا جانە قازاقستان نارىعىن جوعارى ساپالى ءارى باسەكەگە قابىلەتتى ونىمدەرمەن تولىقتىرۋعا باعىتتالعان «قازاقستاننىڭ ۇزدىك تاۋارلارى» بايقاۋى جىل سايىن وتكىزىلىپ كەلەدى. پاندەمياعا بايلانىستى ەكى جىل ۇزىلىستەن كەيىن ءداستۇرلى شارا بيىل قايتا ۇيىمداستىرىلىپ, «وندىرىستىك ماقساتتاعى ۇزدىك تاۋارلار», «حالىققا ارنالعان ۇزدىك تاۋارلار» جانە «ۇزدىك ازىق-تۇلىك تاۋارلارى» نوميناتسيالارى بويىنشا تاڭداۋلى كاسىپكەرلەر انىقتالدى. جەڭىمپازدار ارنايى ديپلوممەن جانە باعالى سىيلىقتارمەن ماراپاتتالدى. ەلوردادا ەركەعالي راحماديەۆ اتىنداعى مەملەكەتتىك اكادەميالىق فيلارمونيا عيماراتىندا وتكەن «قازاقستاننىڭ ۇزدىك تاۋارى» وڭىرلىك كورمە-بايقاۋىنىڭ اشىلۋ سالتاناتىنا نۇر-سۇلتان قالاسىنىڭ اكىمى التاي كولگىنوۆ قاتىستى.
باس قالا باسشىسى كورمە-بايقاۋدى ۇيىمداستىرۋشىلارعا العىسىن ايتا وتىرىپ, بۇل ءبىزدىڭ كاسىپكەرلەرگە ءوز ءونىمىن كوپشىلىككە تانىستىرۋعا مۇمكىندىك بەرەتىن جاقسى الاڭ ەكەنىن اتاپ ءوتتى.
ءداستۇرلى شاراعا ەلوردالىق 100-گە جۋىق كاسىپكەر قاتىستى. ولاردىڭ بارلىعى دا قازاقستان رەسپۋبليكاسى اۋماعىندا ونەركاسىپتىك, ازىق-تۇلىك تاۋارلارى مەن وندىرىستىك-تەحنيكالىق ماقساتتاعى ونىمدەردى ءوندىرۋدى جۇزەگە اسىراتىن, ءونىم ساپاسىنىڭ تۇراقتى جوعارى دەڭگەيىن قامتاماسىز ەتۋ جانە ونى جۇيەلى جاقسارتۋ بويىنشا بايقاۋدى ۇيىمداستىرۋشى راستاعان وڭ ناتيجەسى بار جەكە كاسىپكەرلەر نەمەسە زاڭدى تۇلعالار.
نۇر-سۇلتان قالاسى كاسىپكەرلەر پالاتاسىنىڭ ديرەكتورى بەيسەن جولبولديەۆتىڭ ايتۋىنشا, 2022 جىلدىڭ 1 ماۋسىمىنداعى جاعداي بويىنشا قالاداعى بەلسەندى كاسىپكەرلەر سانى 175,5 مىڭدى قۇراپ, وتكەن جىلدىڭ سايكەس كەزەڭىمەن سالىستىرعاندا 13,3 پايىزعا ارتتى. ولاردىڭ نۇر-سۇلتان قالاسىنىڭ ىشكى وڭىرلىك ونىمىنە قوسقان ۇلەسى 5636,6 ملرد تەڭگەنى نەمەسە 66,9 پايىزدى قۇرادى. بۇل – قازاقستاننىڭ بارلىق ءوڭىرى اراسىنداعى ەڭ جوعارى كورسەتكىش.
باس قالادا نەگىزگى سالا – ساۋدادان باسقا جەڭىل جانە جيھاز ونەركاسىبى دامىپ, پارفيۋمەرلىك-كوسمەتيكالىق ونىمدەر, سانيتارلىق-گيگيەنالىق جانە مەديتسينالىق بۇيىمدار, قۇبىرلار, جارىق ديودتى جانە مەتالل پلاستيك ونىمدەر, ليفت, ەسكالاتورلىق جانە تراۆولاتور جابدىقتار, جوعارى ۆولتتى جابدىقتار ءوندىرىلىپ جاتىر. بۇل رەتتە نۇر-سۇلتان قالاسى كاسىپكەرلەر پالاتاسى ەلوردادا بيزنەس-احۋالدى جاقسارتۋ, قالادا ىسكە اسىرىلىپ جاتقان جوبالاردا جەرگىلىكتى قامتۋ ۇلەسىن ارتتىرۋ, شاعىن جانە ورتا بيزنەستى مەملەكەتتىك قولداۋ شارالارى پاكەتىن كەڭەيتۋ بويىنشا ۇسىنىستار ازىرلەۋ, اكىمشىلىك كەدەرگىلەردى جويۋ بويىنشا تۇراقتى تۇردە جۇمىس ىستەپ كەلەدى.
استانالىق كومپانيالار «وندىرىستىك ماقساتتاعى ۇزدىك تاۋارلار», «حالىققا ارنالعان ۇزدىك تاۋارلار», «ۇزدىك ازىق-تۇلىك تاۋارلارى» نوميناتسيالارى بويىنشا ۇزدىك اتانۋعا بارىن سالدى. ءار نوميناتسيادا ءۇش جەڭىمپاز انىقتالدى. وسىلايشا «حالىققا ارنالعان ۇزدىك تاۋارلار» نوميناتسياسىندا جيىرما جىلعا جۋىق ۋاقىتتان بەرى ديزاينەرلىك كيىم وندىرۋمەن اينالىسىپ كەلە جاتقان «ابيشەۆ» جەكە كاسىپكەرلىگى ءبىرىنشى ورىندى جەڭىپ الدى. قايروللا زەكەنۇلى باسقاراتىن كومپانيا 2020 جىلى «التىن ساپا» بايقاۋىنىڭ «ىسكەر» سىيلىعىنىڭ يەگەرى اتانعان بولاتىن, سونداي-اق «التىن ويماق» كيىم ديزاينەرلەرى بايقاۋىنىڭ قاتىسۋشىسى. ديزاينەر جۇمىستارىنىڭ قورجىنىندا تانىمال قازاقستاندىق ءانشى ديماش قۇدايبەرگەننىڭ ساحنالىق كوستيۋمدەرى دە بار. وسى نوميناتسيا بويىنشا ەكىنشى ورىندا «شەنبەرگ گالينا» جەكە كاسىپكەرلىگى يەلەندى. بۇل مەكەمە 2016 جىلدان بەرى كومپانيا APOLI ساۋدا ماركاسىمەن گيپواللەرگەندى ماتالاردان ەكو-ويىنشىقتاردى تىگەدى. ال ءۇشىنشى ورىن «Big Dream Lab» جشس-كە تيەسىلى بولدى. اتالمىش كومپانيا پوليگرافيا, ءبىلىم بەرۋ, ماركەتينگ, قۇرىلىس, ءوندىرىس جانە ونەركاسىپتە وزىق تەحنولوگيالاردى ازىرلەۋ جانە ەنگىزۋ ىسىمەن اينالىسادى. نارىقتا 2019 جىلدان باستاپ جۇمىس ىستەيدى, شتاتىندا 22 ادام ەڭبەك ەتەدى.
«ۇزدىك ازىق-تۇلىك تاۋارلارى» نوميناتسياسىندا ءبىرىنشى ورىندى «جەتi اسپان» جشس جەڭىپ الدى. كومپانيا Galmart سۋپەرماركەتتەر جەلىسىندە اسپازدىق ونىمدەردى وندىرەدى. نارىقتا 2010 جىلدان بەرى جۇمىس ىستەيدى, كومانداسىندا 777 ادام ەڭبەك ەتەدى. ەكىنشى ورىندى توعىز جىل ىشىندە Happy Cake كونديتەرلىك دۇكەندەر جەلىسىنە اينالىپ ۇلگەرگەن «Akmeshit cake company» جشس يەلەنسە, ءۇشىنشى ورىن ماشام ساۋدا بەلگىسىمەن بەسبارماق, كوجەلەر, لاعمانعا ارنالعان جايما مەن كەسپەلەردى ازىرلەيتىن «كوجاحمەتوۆ ن.ن.» جەكە كاسىپكەرلىگىنە بۇيىردى.
«ۇزدىك وندىرىستىك تاۋارلار» نوميناتسياسى بويىنشا دا ءۇش جەڭىمپاز انىقتالدى. ولاردىڭ قاتارىندا «الكون+» فيرماسى», «تسەنتر ەليت نس» جشس-پەن بىرگە «LIDER» جەكە كاسىپكەرلىگى بولدى. بايقاۋ ديپلومانتتارى «قازاقستاننىڭ ۇزدىك تاۋارى» رەسپۋبليكالىق كورمە-بايقاۋىنىڭ ەمبلەماسىمەن جانە ديپلومدارىمەن ماراپاتتالدى. بۇل ەمبلەما جارنامالىق ماقساتتا ءتورت جىل بويى پايدالانۋ قۇقىعىنا يە.
جەڭىمپازدار قازاقستان رەسپۋبليكاسى پرەزيدەنتىنىڭ قاتىسۋىمەن وتەتىن رەسپۋبليكالىق «قازاقستاننىڭ ۇزدىك تاۋارلارى» بايقاۋىنا قاتىسۋعا جولداما الدى. سونداي-اق كونكۋرس-جارمەڭكەگە قاتىسۋشىلار مەن قوناقتار باعالى سىيلىق ۇتىس ويىنىنا قاتىسىپ, كۇندەلىكتى تۇرمىسقا قاجەتتى ءارتۇرلى سىيلىققا يە بولدى.
گۇلبارشىن وكەشقىزى
