استانا قالاسىنىڭ تۇرعىندارى 15 قاراشاعا دەيىن قالاعان ەمحاناسىنا تىركەلە الادى. ەلىمىزدە جىل سايىن وتەتىن ەمحانا تاڭداۋ شاراسى قىركۇيەك ايىندا باستالعان ەدى.
بىرىڭعاي ۇلتتىق دەنساۋلىق ساقتاۋ جۇيەسi ەنگiزiلگەلi تۇرعىندارعا ەمحانا مەن اۋرۋحانالاردى ەركiن تاڭداۋ قۇقى بەرىلگەنى بەلگىلى. ماماندار تاڭداۋ ەركىندىگى بەرىلگەن ءتورت جىلدىڭ ىشىندە ەمدەۋ مەكەمەلەرi اراسىنداعى باسەكەلەستiك ارتقانىن ايتادى. ال كەيبىر تۇرعىندار ەمحانا اۋىستىرعانىمەن, قىزمەت كورسەتۋ ساپاسىندا ايتارلىقتاي وزگەرىس جوق ەكەنىن العا تارتادى. «بۇرىن باسقا ەمحانادا تىركەلگەنمىن. وسى مۇمكىندىكتى پايدالانىپ, №10 ەمحاناعا اۋىسۋعا ءوتىنىش جازدىم. مەنىڭ ويىمشا, ەمحانا اۋىستىرساق تا, دارىگەرلەردىڭ قابىلداۋى, ەمدەۋ, تەگىن ءدارى بەرۋىندە ايىرماشىلىق جوق سياقتى. ناتيجەسىن الداعى ۋاقىتتا بىلەمىن» دەيدى قالا تۇرعىنى ءنۇسىپجامال بەكتەمىسوۆا.
ەمحاناعا تىركەلۋدىڭ ەكى جولى بار. ءبىرىنشىسى – جەكە كۋالىگىڭىزدى تىركەۋ بولىمىنە اپارىپ, مەكەمە باسشىسىنىڭ اتىنا جازباشا تۇردە ءوتىنىش جازاسىز. سونىمەن قاتار, «ەلەكتروندى ۇكىمەتتىڭ» ۆەب-پورتالى ارقىلى ونلاين تىركەلۋگە بولادى. اقپارات ءۇش كۇن ىشىندە وڭدەلىپ بولعاننان كەيىن, تاڭداعان ەمحاناڭىزدىڭ قىزمەتىن پايدالانۋعا بولادى. ال ەمحانا تاڭداۋعا ءوتىنىش قالدىرماعان ازاماتتار اۆتوماتتى تۇردە بۇعان دەيىنگى ەمحانانىڭ تىزىمىندە قالدىرىلادى. ەمحانا اۋىستىرۋ جىلىنا ءبىر-اق رەت جۇرگىزىلەدى.
بيىلعى وزگەرىستىڭ تاعى ءبىر جاڭالىعى – شەتەلدىكتەرگە دە تاڭداۋ بەرىلدى. بۇعان دەيىن شەتەلدىك ازاماتتارعا تەك توتەنشە جاعداي كەزىندە عانا مەديتسينالىق كومەك كورسەتىلسە, 1 قاڭتاردان باستاپ ولار دا قازاقستاندىقتار سەكىلدى دەنساۋلىعىن تەگىن تەكسەرتە الادى.
«تۇرعىندار ەمحانا اۋىستىرماي تۇرىپ ويلانۋلارى كەرەك. سەبەبى باسقا ەمحانا تاڭداعان جاعدايدا, ءوز ۇيىنە دارىگەر شاقىرتۋ مۇمكىندىگىنەن ايىرىلادى. جۇكتى ايەلدەر, كىشكەنتاي بالاسى بارلار, قاريالارعا قيىندىق تۋى مۇمكىن» دەيدى ەلوردالىق دارىگەرلەر.
جالپى, استانادا ەمحانا جەتىسپەۋشىلىگى جاسىرىن ەمەس. قالا حالقىنىڭ جىلدام قارقىنمەن وسۋىنە دەموگرافيا مەن كوشى-قون ءۇردىسى تىكەلەي اسەر ەتەدى. ماسەلەن, جىل سايىن استانالىقتاردىڭ سانى 6 پايىزعا ارتادى. وعان قوسا, قالانىڭ شەت ايماقتارىندا تۇراتىن حالىقتىڭ باسىم بولىگى قالاعا كەلىپ تىركەلگەن. وسىعان بايلانىستى جاڭا مەديتسينالىق نىساندار سالۋ قاجەتتىگى تۋىنداۋدا. استانا قالاسى دەنساۋلىق ساقتاۋ باسقارماسىنىڭ باسشىسى كامالجان نادىروۆ جۋىردا عانا استانا قالاسىنىڭ باس جوسپارى عىلىمي-زەرتتەۋ ينستيتۋتىمەن بىرلەسە وتىرىپ, جاڭا ورتالىقتاردى قۇرۋدىڭ كارتاسى قولعا الىنعانىن مالىمدەدى. جوبانى جۇزەگە اسىرۋدا جەكەمەنشىك ينۆەستورلاردى تارتۋ كوزدەلۋدە. ەگەر جوبا ءساتتى جۇزەگە اسسا, تۇرعىنداردىڭ ەمحانا قىزمەتىن ءتيىمدى پايدالانۋىنا جول اشىلار ەدى.
گۇلميرا ايماعانبەت
