جاقىندا مىنەزدى جۋرناليست, ساتيريك جۇماتاي سابىرجانۇلىنىڭ قۇرمەتىنە ءوزى تۇرعان جۇمابەك تاشەنوۆ كوشەسىندەگى 7-ۇيگە ەسكەرتكىش تاقتا قويىلدى.
تاقتانىڭ اشىلۋىندا ءسوز العان اقىن جۇماش سومجۇرەك: «مۇنداي يگىلىكتى ءىس كەز كەلگەن ادامنىڭ ۇلەسىنە تيە بەرمەيدى. جۇمابەك تاشەنوۆتى بارشا جۇرت جاقسى بىلەدى. كەڭەس داۋىرىندە قازاق جەرىنىڭ تۇتاستىعىن قورعاپ قالعان تۇلعا. وسى كوشەنىڭ بويىندا جۇماتايدىڭ ەسكەرتكىش تاقتاسىنىڭ تۇرۋىندا ءبىر سيمۆوليكالىق ۇقساستىق بار» دەسە, قالامگەر قايسار ءالىم: «بۇل قازاق وقىرماندارىنىڭ ءىلتيپاتى دەۋگە بولادى. جۇماتاي قىسقا ومىرىندە ۇلتىم دەپ, قازاق ءتىلى مەن ادىلدىك ءۇشىن جان اياماي كۇرەسكەن دارىندى ازاماتتىڭ ءبىرى ەدى» دەپ ويلى ەستەلىك ءوربىتتى.
جۇماتاي سابىرجانۇلى كوزى تىرىسىندە ەلىمىزدەگى بىرقاتار گازەت-جۋرنالدا ەڭبەك ەتتى. اسىرەسە, وقىرماندار ونى ەگەمەندىكتىڭ ەلەڭ-الاڭ شاعىندا جارىق كورگەن «انا ءتىلى» گازەتىندەگى قىسقا دا نۇسقا, ەزۋ تارتقىزار ازىلمەن ورگەن ويماقتاي, وتتى ماقالالارى ارقىلى جاقسى بىلەدى. قالامگەردىڭ كوزى تىرىسىندە «كارى سايتان», «وكپەلەسەڭ, ءوزىڭ ءبىل» اتتى كىتاپتارى جارىققا شىقتى. كەيىن «مەن تانىعان شىندىق» دەگەن جيناعى باسىلدى.
