نۇر-سۇلتان قالاسىنىڭ تىلدەردى دامىتۋ جانە مۇراعات ءىسى باسقارماسى باسشىسى ت.قىشقاشباەۆ ساياباققا اتاۋ بەرۋدىڭ ماڭىزدىلىعىنا توقتالدى. «بيىل 4-6 قىركۇيەكتە نۇر-سۇلتان قالاسىندا ازيا ەلدەرى قالامگەرلەرىنىڭ فورۋمى وتەدى, شاراعا الەمنىڭ تۇكپىر-تۇكپىرىنەن 100-گە جۋىق دەلەگات كەلمەكشى, ونىڭ ىشىندە نوبەل سىيلىعىنىڭ يەگەرلەرى, الەم ادەبيەتىنە وزىندىك ۇلەس قوسقان قالامگەرلەر بولادى. وسىعان بايلانىستى قر مەملەكەت حاتشىسى م.ءتاجيننىڭ 2019 جىلعى 7 ماۋسىمداعى وكىمىمەن ارنايى رەسپۋبليكالىق ءىس-شارالار جوسپارىمەن بەكىتىلگەن حات جىبەرىلىپ, مۇددەلى قۇرىلىمدارمەن اقىلداسا كەلە, «قالامگەرلەر» اللەياسى اتاۋىن بەرۋ تۋرالى ۇسىنىسقا توقتالدىق. مۇنى جازۋشىلار وداعى دا, زيالى قاۋىم دا ءبىراۋىزدان قولداپ وتىر» دەدى باسقارما باسشىسى.
ساياباق اباي ەسكەرتكىشىنە, اباي داڭعىلىنا, ساكەن مۇراجايىنا, جاستار سارايى مەن ق.قۋانىشباەۆ تەاترىنا جاقىن ورنالاسقان, حالىق ەڭ ءجيى جۇرەتىن ورىنداردىڭ ءبىرى. سوندىقتان دا قولدانىستاعى زاڭناماعا جانە ونىڭ تالاپتارىنا سايكەس, 2019 جىلعى 24 شىلدەدە قالالىق ونوماستيكالىق كوميسسيا وتىرىسىندا بۇل ماسەلە قارالىپ, وڭ شەشىمىن تاپقان. كەلەسى بايانداماشى قازاقستان جازۋشىلار وداعى نۇر-سۇلتان قالاسى فيليالىنىڭ ديرەكتورى داۋلەتكەرەي كاپۇلى قاتىسۋشىلاردان وسى باستامانى قولداۋدى سۇرادى. اتالعان ۇسىنىس بويىنشا داۋىس بەرىلدى, داۋىس بەرۋ قورىتىندىسى نۇر-سۇلتان قالاسى ءماسليحاتىنىڭ كوپشىلىك تىڭداۋلار حاتتاماسى تۇرىندە قابىلدانىپ, نۇر-سۇلتان قالاسى اكىمدىگىنىڭ ينتەرنەت-رەسۋرسىندا جانە بۇقارالىق اقپارات قۇرالدارىندا جاريالاناتىن بولدى.
