جەلتوقسان ايى تۋىسىمەن باس قالادا قاۋىرت قاربالاس باستالادى. اۋداندار قالانى قاردان تازارتۋمەن قاتار, قىسقى بەزەندىرۋ جۇمىسىنا دا بەلسەنە كىرىسەدى. تاۋەلسىزدىك مەرەكەسى مەن جاڭا جىل كەشتەرىنە ارنالعان ءارتۇرلى اسەمدىك اشەكەيلەر جاسالىپ, ەلوردانى ەرەكشە اسەمدىككە بولەيدى. ول قالا تۇرعىندارىنا تاماشا مەرەكەلىك كوڭىل-كۇي سىيلايدى. مىنە, وسى ايتۋلى ناۋقانعا تەك اۋدان اكىمدىكتەرى عانا ەمەس, ينۆەستورلار دا اتسالىسادى.
– استانانىڭ قىسى ۇزاق ەكەنى ايتپاسا دا بەلگىلى, سوندىقتان بۇل ۋاقىتتى بارىنشا ءتيىمدى پايدالانۋ كەرەك. مىنە, وسى ماقساتتا ەسىل اۋدانىندا قىسقى مەرەكەلىك شارالاردى كوپتەپ وتكىزۋ داستۇرگە اينالعان. «ESIL WINTER» فەستيۆالى اياسىندا ءبىز تۇرعىنداردىڭ كوڭىل كوتەرۋىنە قولايلى جاعداي جاساپ قانا قويماي, ساۋدا-ساتتىقپەن اينالىساتىن ازاماتتارعا دا تيىمدىلىك جاساۋعا تىرىسامىز. سونداي-اق حالىقارالىق تاجىريبەنى زەردەلەپ, قالانىڭ قىسقى ساياحات ىستەرىن وركەندەتۋگە ءتيىمدى تاسىلدەردى دە پايدالانامىز. ال ينۆەستورلار بولسا, قالا ۋچاسكەلەرىنە ءوز شىرشالارىن وتكىزۋدىڭ ۇتىمدى ادىستەرىن ۇسىنىپ, سىرعاناق, شاڭعى الاڭدارىن اشىپ, وزدەرى ەكونوميكالىق جاقتان تابىس تابۋمەن قاتار, اۋدانىمىزدىڭ قىسقى كوڭىل كوتەرۋ ىستەرىنە دە اتسالىسادى. سول ءۇشىن ولارعا ۇلكەن راحمەت, – دەدى اۋدان اكىمى بەرىك جاكەنوۆ.
بيىل ەسىل اۋدانىندا قىسقى كوڭىل كوتەرۋگە ارنالعان 11 ورتالىق اشىلدى. ونىڭ باسىم بولىگى دەمەۋشىلەر ەسەبىنەن ۇيىمداستىرىلادى. ماسەلەن, «قازترانسگاز» كومپانياسىنىڭ قولداۋىمەن ەسىل وزەنىنىڭ جاعالاۋىنداعى ساياباقتا جاڭا جىلدىق اشەكەيلەر مەن 23 مەترلىك شىرشا ورناتىلدى. سونداي-اق «سامۇرىق-قازىنا» اق وكىلدەرى «زەلەنىي كۆارتال» كوپپاتەرلى تۇرعىن ءۇي كەشەنىنىڭ تۇرعىندارى ءۇشىن جاڭاجىلدىق شىرشا ورناتتى. كوپ ۇزاماي بۇل ۋچاسكەلەردە مۇز الاڭى پايدالانۋعا بەرىلەدى.
بيىل قىسقى ويىن-ساۋىق ورىندارىنىڭ ءبىرى رەتىندە ەلوردانىڭ ورتالىق پاركىن اتاۋعا بولادى. مۇندا جاقىن ارادا شاڭعى الاڭى, سىرعاناق ورنى, كەرلينگ سىندى ويىن الاڭدارى ىسكە قوسىلادى. سونىمەن قاتار, ساياباقتا فەستيۆالدەر, كورمەلەر ۇيىمداستىرۋ دا جوسپارلانىپ وتىر. شارانى ۇيىمداستىرۋعا مادەني ورتالىقتار, تەاترلار, فيلارمونيا, ينسترۋكتورلار, انيماتورلار جۇمىلدىرىلادى.
ايتا كەتەيىك, قالا تۇرعىندارى تومەندەگى ورىندارعا بارىپ, قىس قىزىعىن سەزىنىپ, كوڭىل كوتەرۋىنە بولادى.
– ەحرو-2017 الاڭى;
– ەسىل وزەنى جاعالاۋى بويىنداعى ساياباق;
– «كەرۋەن» سوو;
– «حان شاتىر» سوو;
– «زەلەنىي كۆارتال» تك;
– «جاعالاۋ» تك;
– «ۇركەر» تۇرعىن الابى;
– «پريگورودنىي» تۇرعىن الابى;
– بوتانيكالىق باق;
– «جەتىسۋ» ساياباعى;
– «Ailand» وتباسىلىق دەمالىس ورتالىعى.
