تالاپقا ساي قىزمەت
اۋىل بالاسىنا ءبارى تاڭسىق. العاش اقمولاعا تابان تىرەپ, پويىزدان تۇسكەندە الدىمەن تەمىرجول ۆوكزالىن كورىپ, اۋزىم اشىلىپ قالدى. بۇرىن مۇنداي عيمارات كورگەن جوق ەدىم. ەڭسەلى, تۇرقى مەن تۇرپاتى بولەك. ءىشى-سىرتى ايناداي جالتىراپ جاتىر. ىعى-جىعى ادام. كولەمى ءبىزدىڭ ارقالىقتىڭ ۆوكزالىن ون وراپ الادى. قۇددى ءبىر انكاراعا كەلگەندەي كۇي كەشتىم. بۇل 1995 جىلدىڭ شىلدەسى ەدى. ءدام جازىپ, وقۋعا دا ءتۇستىم. اقمولاداعى (ول كەزدە سولاي اتالاتىن) بىلدەي ءبىر وقۋ ورداسىنىڭ ستۋدەنتى اتاندىم. قىزىعى مەن شىجىعى مول كۇندەر باستالدى. سوندا دا اۋىلدى اڭساپ, قالانى بوتەنسىپ ءجۇردىم. سونداي شاقتاردا ۆوكزالعا بارىپ, اۋىلعا دەگەن ساعىنىشىمدى باسىپ قايتاتىنمىن.
ودان بەرى دە قانشاما جىلدار ءوتتى. سوندا دا وسى ءبىر قۇتتى ورىن ماعان قاتتى ىستىق كورىنەدى.
ەلورداعا كەلگەن ادام الدىمەن ۆوكزالعا ات باسىن تىرەيدى. سوندىقتان, ءبىرىنشى كەزەكتە عيماراتتىڭ ىشكى-سىرتقى سيپاتى, اۋماعىنىڭ كورىكتىلىگى, جولاۋشىلارعا قىزمەت كورسەتۋ دەڭگەيى مەن اۆتوكولىكتەردىڭ ءتارتىپتى ءجۇرىپ-تۇرۋىنىڭ ءوزى باس قالاعا ءتان ۇلكەن مادەنيەتتىلىكتى ۇلگى ەتەدى.
بۇگىنگى تاڭدا استانا ۆوكزالى جولاۋشىلارعا حالىقارالىق دەڭگەيدە قىزمەت كورسەتەدى. ۋاقىت تالابىنا ساي ەلەكتروندىق كاسسا زالى جۇمىس ىستەيدى. ۆوكزالدا بىرنەشە كورسەتكىش تابلولار ورناتىلعان, ەكراننان جاڭا بەينەماتەريالداردى كورۋگە بولادى, سونداي-اق, كۇن مەن اي, جىل, ۋاقىتتى كورسەتەتىن, اۋا رايىنان ماعلۇمات بەرەتىن تابلولار ءارتۇرلى تۇستە كورسەتىلەدى. قىسقاسى, جولاۋشىلارعا بارلىق جايدان اقپارات بەرىپ تۇرادى. جولاۋشىلارعا ارنالعان جوعارى تالاپتى بيزنەس-كلاسس دارەجەسىندەگى VIP-زال بار. عيمارات ينتەرنەت جۇيەسىنە قوسىلعان. ۆوكزالدا ەكسپرەسس پوشتا ىسكە قوسىلعان. بۇرىن ەلدەگى جاقىن تۋىسقانعا حات نەمەسە زات جىبەرۋ ءۇشىن جولسەرىكتى جاعالايتىن ەدىك. ەندى كەز كەلگەن دۇنيەنى ەكسپرەسس پوشتا ارقىلى جىبەرۋگە مۇمكىندىك تۋعان. قىزمەتى دە قاراپايىم. ارنايى تاريف بويىنشا پوشتانى جونەلتۋ باعاسىن تولەسەڭىز بولدى, كونۆەرت دەر كەزىندە الۋشىنىڭ قولىنا تيەدى. سونداي-اق, بۇل پوشتامەن اۋىر جۇكتەردى دە جىبەرۋگە بولادى. ول ءۇشىن ارنايى اگەنتتەر جۇمىس ىستەيدى. ديسپەتچەر ارقىلى حابارلاسساڭىز, اگەنتتەر ۇيىڭىزگە بارىپ, بارلىق زاتتارىڭىزدى قابىلداپ الىپ, ۆاگونگا تيەپ جىبەرەدى. ول جۇكتەر قولدى بولماۋ ءۇشىن ساقتاندىرۋ جۇيەسى ىسكە قوسىلعان.
– استانا ۆوكزالىن حالىقارالىق ستاندارتتارعا سايكەستەندىرۋ ءۇشىن ايتارلىقتاي جۇمىستار اتقارىلدى. سەرۆيستىك قىزمەتتىڭ دەڭگەيى ءوستى. زاماناۋي قۇرالدارمەن جابدىقتالدى. جولاۋشىلار پويىزىنىڭ سانى ءوستى. بۇگىنگى كۇندە ءبىزدىڭ ۆوكزال ارقىلى 95 جولاۋشىلار پويىزى وتەدى. ونىڭ ىشىندە حالىقارالىق, ايماقتار اراسىندا جۇرەتىندەرى بار. قالا ماڭىندا جۇرەتىن پويىزدار دا سولاردىڭ قاتارىنا كىرەدى. تاۋلىگىنە 20-25 پويىزدى كۇتىپ الىپ, شىعارىپ سالامىز. ءبىزدىڭ ماماندار اۋىسىممەن جۇمىس ىستەيدى. ءبىر تاۋلىكتە 20 مامان قىزمەت كورسەتەدى. ۆوكزالدا قوناق ءۇي, انا مەن بالاعا ارنالعان بولمە ەسىگى قاشاندا اشىق. ترانزيتتىك جولاۋشىلار كەلەسى پويىزى كەلگەنشە, سول بولمەگە بارىپ بالاسىمەن دەمالۋعا بولادى. مۇگەدەكتەرگە ارنالعان اقىسىز بولمە ەسىگى قاشاندا اشىق. ودان بولەك, ارنايى مەدپۋنكت, پوليتسيا بولىمشەسى جۇمىس ىستەيدى. اسكەريلەندىرىلگەن تەمىرجول كۇزەتى قىزمەتكەرلەرى ءتارتىپتى قاداعالايدى. بيلەت ساتاتىن كاسسالار دا ۋاقىت تالابىنا ساي جاڭارتىلعان. ايتا بەرسە, جاقسىلىقتار كوپ. مەن ءوزىم وسى سالاعا 23 جاسىمدا كەلدىم. سودان بەرى 38 جىل ءوتتى. بارلىق عۇمىرىم ەلوردا ۆوكزالىمەن تىعىز بايلانىستى. سوندىقتان, بۇل مەن ءۇشىن قۇتتى ورىن, – دەيدى استانا ۆوكزالى باسشىسىنىڭ ورىنباسارى ورىنباسار ىنتىقباەۆا.
كەزەكشىلەر مىندەتى – قىراعىلىق
ءبىز ۆوكزالعا كەلگەندە اقشام ۋاقىتى بولعانمەن, ءيىن تىرەسكەن ادامنان اياق الىپ ءجۇرۋ مۇمكىن ەمەس. اۋپىرىمدەپ, عيماراتتىڭ ەكىنشى قاباتىنداعى ترانزيتتىك زالعا كوتەرىلدىك. وندا 300-دەي ادام ورنالاسقان. شاعىن دۇڭگىرشەكتەر جۇمىس ىستەيدى. عيماراتتىڭ كەز كەلگەن نۇكتەسىندە كەزەكشىلەر ءجۇر. مۇمكىندىگى شەكتەۋلى جاندارعا ارنالعان 4 قولاربا مەن ارنايى 2 ليفت قوسىلعان. بۇل جۇمىستاردى وسىنداعى ۆوكزال كەزەكشىلەرى اتقارادى. ۆوكزالداعى بارلىق 10 ەسكالاتور تۇگەل جۇمىس ىستەيدى, ولار تۇرىپ قالعان جاعدايدا ماماندار دەرەۋ ىسكە قوسىپ وتىرادى. ءار ەسكالاتوردى كەزەكشىلەر قاداعالايدى.
– ءبىزدىڭ جۇمىسىمىز تاڭعى 8.30-دا باستالادى. الدىمەن لەزدەمە بولادى. سودان كەيىن ءار كەزەكشى ءوز قىزمەتىن قابىلداپ الادى. ءبىر اۋىسىمعا 11 قىزمەتكەر شىعامىز. مەن ءوزىم پويىزداردى كۇتىپ الىپ, شىعارىپ سالامىن. پويىزدان كەشىگىپ قالعان جولاۋشىلار بولسا, ولارعا كومەك كورسەتەمىز. ءار كەزەكشى ءوز مىندەتىن مۇقيات اتقارۋى قاجەت. تەمىرجول بويىنداعى قاۋىپسىزدىكتى قاداعالايمىز. جولاۋشىلار وتكەلگە شىعىپ كەتپەۋى كەرەك. سوندىقتان, كەزەكشى الدىمەن قىراعى بولۋى قاجەت, – دەيدى ۆوكزال كەزەكشىسى روزا قاليحانقىزى.
عيماراتتىڭ ءار بۇرىشىنا بەينەباقىلاۋ قوندىرعىسى ورناتىلعان. ول قىزمەتكەرلەر ءۇشىن دە, جولاۋشىلار ءۇشىن دە وتە ءتيىمدى. ءبىر كەلەڭسىز جاعداي بولعاندا سوعان جۇگىنەدى. ۆوكزالدىڭ بارلىق بەينەسى ءبىر وپەراتوردىڭ كوز الدىندا تۇرادى. عيماراتتا ءبىر جاعداي ورىن العاندا وپەراتور ءتارتىپ ساقشىلارى مەن كەزەكشىلەرگە باياندايدى.
ۆوكزالداعى انىقتاما بەرۋ ماماندارىنىڭ قىزمەتى دە اۋقىمدى. ءبىز وسى سالادا ون جىلدان اسا جەمىستى جۇمىس ىستەپ كەلە جاتقان ءلاززات يمانعاليەۆانى سوزگە تارتتىق.
– ءبىر قاراعاندا, ءبىزدىڭ جۇمىس وڭاي كورىنۋى مۇمكىن. نەگىزى, جولاۋشىلارمەن جۇمىس ىستەۋ جەڭىل ەمەس. ءار ادامنىڭ ءتۇرلى مىنەزى بار. اسىرەسە, ۇلكەن كىسىلەر كوپ مازالايدى. كۇنىنە شامامەن 1000-عا جۋىق ادامعا قىزمەت كورسەتەمىن. ۇيگە بارعاندا سويلەۋگە شامام كەلمەيدى. تىنىشتىقتى قالاپ تۇرامىن. كەيدە جولاۋشىلار العىس ايتىپ جاتقاندا, بارلىق شارشاعانىم ۇمىتىلىپ كەتەدى, – دەپ اعىنان جارىلا جاۋاپ بەردى ول.
ديكتوردىڭ جاعىمدى داۋىسى
ديكتور دەگەندە كوبىنەسە ويىمىزعا الدىمەن تەلەارنادا جۇمىس ىستەيتىن ارىپتەستەرىمىز كەلەدى. سويتسەك, ۆوكزالدىڭ دا داۋىسى اۋەزدى ءوز ديكتورلارى بار. بىراق, ولارعا قويىلاتىن مىندەت وتە جاۋاپتى. ءۇش تىلدە ەركىن سويلەۋ كەرەك. مۇقيات, ۇقىپتى بولۋ قاجەت.
– وسى قىزمەتتى 12 جىلدان بەرى اتقارىپ كەلەمىن. ءوز ماماندىعىمدى ماقتان تۇتامىن. وتە ۇنايدى. مىندەتىمىز: پويىزداردى قابىلداپ, ولار قانداي توراپقا توقتايدى, قانداي جولدان جۇرەدى… بارلىعىن جولاۋشىلارعا جەتكىزىپ وتىرامىز. ءۇش تىلدە حابارلاپ وتىرامىن. ءبىزدىڭ كابينەتكە بوتەن ادام كىرمەيدى. جالعىز وتىرامىز. ويتكەنى, بوگدە شارۋاعا ويىمىز بولىنبەۋ كەرەك. ءار مينۋتىمىز ەسەپتەۋلى. استانا ۆوكزالىندا 4 ديكتور جۇمىس ىستەيدى. اسىرەسە, تۇنگى ۋاقىتتاردا ەپتەپ شارشايمىز. سونداي كەزدەردە مۇقياتتىلىق قاجەت. قاتەلىك دەگەن كاپەلىمدە. ۋاقىتتان شاتاسىپ كەتپەۋ كەرەك. ءبىز ءۇشىن ءاربىر مينۋت ەسەپتەۋلى, – دەيدى داۋىسى جاعىمدى ديكتور نازگۇل بايبەكوۆا.
قازىرگى تاڭدا استانا ۆوكزالىندا ءتۇرلى تولەم جاسايتىن ەلەكتروندىق قۇرىلعىلار, اقشا ايىرباستاۋ پۋنكتتەرى مەن مەدپۋنكتتەر, ءدارىحانا, گازەت-جۋرنال كيوسكىلەرى, تاماقتانۋ نۇكتەلەرى مەن جۇك-باگاج ساقتاۋ كامەرالارى, سانيتارلىق-تۇرمىستىق قاجەتتىلىكتەردى وتەيتىن بارلىق قىزمەت تۇرلەرى جۇمىس ىستەيدى. ءتىپتى, تەلەفون, سمارتفون, نوۋتبۋك سىندى اقپاراتتىق-بايلانىس قۇرالدارىن دا جالعا بەرۋ قىزمەتتەرى بار. سوڭعى جىلدارى ۆوكزالداعى كوپ وزگەرىستەر ورىن العان. سونىڭ بارلىعى جولاۋشىلاردىڭ جايلىلىعى ءۇشىن ىسكە اسىپ جاتقانىن كورىپ قۋاندىق.
ا. ەسەنجول, astana-akshamy.kz
