ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ءححVىىى ماۋسىمى «كابارە جۇلدىزى» مۋزىكالىق كومەدياسىنىڭ پرەمەراسىمەن جابىلدى. سپەكتاكلدى الەمگە ايگىلى ۆەنگريا كومپوزيتورى يمرە كالماننىڭ «سيلۆا» وپەرەتتاسى نەگىزىندە قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ ساحنالادى. قازاق تىلىنە اۋدارعان – قازاقستاننىڭ ەڭبەك سىڭىرگەن ونەر قايراتكەرى ەسىم سەگىزباەۆ. مۋزىكانى وڭدەگەن – قازاقستاننىڭ حالىق ءارتىسى حورلان قاليلامبەكوۆا.
اتالمىش تۋىندى العاش رەت «چارداش حانشايىمى» اتاۋىمەن وسىدان ءبىر عاسىر بۇرىن ۆەنا قالاسىندا كورەرمەنگە جول تارتتى. ودان كەيىن الەمدى شارلاپ كەتتى. شىعارما جەلىسىمەن بىرنەشە مارتە كوركەم فيلمدەر ءتۇسىرىلدى. ال قاللەكي تەاترىن بۇل وپەرەتتا نەسىمەن قىزىقتىردى؟ «مۋزىكالىق دراما تەاترى بولعاندىقتان وسىنداي جانرداعى شىعارمالاردى ساحنالاۋ – مىندەتىمىز. يوگانن شتراۋستىڭ «جارعانات» وپەرەتتاسىن «جۇبايلار جۇمباعى» اتاۋىمەن قويعانىمىزدا دا جەتى-سەگىز جىل بولىپ كەتتى. سودان بەرى تەاتردا بۋىن الماسۋ ءجۇرىپ, جاس اكتەرلەر كەلدى. سولاردىڭ مۇمكىندىگىن اشاتىن مۋزىكالىق شىعارمانى ىزدەدىك. باستىسى وركەسترىمىز بار, حورىمىز بار, باسقا دا قاجەتتى ماماندارىمىز جەتكىلىكتى. سودان سوڭ «سيلۆاعا» توقتادىق. بۇل الەم مويىنداعان, ادامنىڭ جان دۇنيەسىن تەبىرەنتەتىن, اكتەرلىك جانە انشىلىك شەبەرلىكتى تالاپ ەتەتىن تۋىندى عوي. وسى تۇرعىدان العاندا, «كابارە جۇلدىزى» ءبىر جاعىنان جاس اكتەرلەرىمىزگە سىناق بولدى. ول سىناقتان جاستارىمىز ابىرويمەن ءوتتى دەپ ويلايمىن» دەيدى بۇل تۋرالى ن.جۇمانيازوۆ.
كابارە ءانشىسى سيلۆا (گاۋھار ءجۇسىپوۆا) جانە اقسۇيەكتەر تۇقىمىنان شىققان ەدۆين (جاسۇلان ەربولات) اراسىنداعى ماحابباتتان سىر شەرتەتىن تۋىندىدا ەكەۋىنىڭ قوسىلۋىنا الەۋمەتتىك تەڭسىزدىك كەدەرگى بولادى. ەدۆيننىڭ اكەسى لەوپولد (داستان ءالىموۆ) ۇلىنىڭ قايداعى جوق ءانشىنى جار ەتىپ الۋىنا ءۇزىلدى-كەسىلدى قارسى. ول بالاسىنا ءستاسسيدى (ايشولپان ىبىراەۆا) قولاي كورەدى. بىراق ەدۆين ماحابباتىنان باس تارتپايدى. ستاسسيگە بولسا گراف بوني (شاح-مۇرات ورداباەۆ) عاشىق بولىپ قالادى. كابارە قىزمەتكەرى فەرري (اسىلبەك قاپاەۆ) ولارعا وسى ساحنادا باياعىدا جارقىراعان چارداش حانشايىمى تۋرالى اڭگىمە ايتىپ بەرەدى. سويتسە, ول – باسقا ەشكىم ەمەس ەدۆيننىڭ اناسى انگيلدا (قازاقستاننىڭ ەڭبەك سىڭىرگەن قايراتكەرى التىناي نوگەربەك). لەوپولد ول جاعىنان مۇلدە حابارسىز ەكەن. جارى دا كابارە ءانشىسى بولعانىن بىلگەن ول ەدۆينگە سيلۆامەن قوسىلۋعا رۇقسات بەرەدى.
وسىلايشا قۋانىشتى نوتادا اياقتالاتىن وپەرەتتادا تەاتر حورمەيستەرى, قازاقستاننىڭ ەڭبەك سىڭىرگەن قايراتكەرى امانتاي جۇماشەۆتىڭ, حورەوگراف سالتانات جولىمباەۆانىڭ, كونتسەرتمەيستەر تاتيانا رازۆينانىڭ, قويۋشى-سۋرەتشى – قازاقستاننىڭ مادەنيەت قايراتكەرى قانات ماقسۇتوۆتىڭ ەڭبەكتەرىن اتاپ ءوتۋ كەرەك.
قاللەكي تەاترىنىڭ ديرەكتورى ايبولات سەكسەنباەۆتىڭ ايتۋىنشا, ماۋسىم جابىلعانىمەن, تەاتر ۇجىمى الداعى دۇيسەنبى كۇنى ەلوردادا باستالاتىن «سامعاۋ» ءVىى حالىقارالىق تەاتر فەستيۆالىنە «ءلايلى-ءماجنۇن» سپەكتاكلىمەن قاتىسادى. ودان كەيىن ورىنبور قالاسىنا «گوستيننىي دۆور» فەستيۆالىنە «وتەللو» دراماسىمەن اتتانادى.
