ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق- دراما تەاترىندا ونەر وشاعىنىڭ ارتىستەرى مەن سيمفونيالىق وركەسترىنىڭ (باس ديريجەرى – مادەنيەت سالاسىنىڭ ۇزدىگى ەرلان بەيسەمباەۆ) «تىڭدا» اتتى كونتسەرتى ءوتتى.
پوەزيا مەن مۋزىكا قاتار وربىگەن كەشتە كورنەكتى اقىن جاراسقان ءابدىراشۇلىنىڭ ولەڭدەرى, اباي اندەرى, قازاق جانە كەڭەس كومپوزيتورلارىنىڭ تۋىندىلارى, بۇگىنگى سازگەرلەردىڭ شىعارمالارى, «تاقيالى پەرىشتە» فيلمىندەگى اندەر شىرقالدى. كەش مىڭ بۇرالعان بيمەن كوركەمدەلدى.
اتاپ ايتقاندا, ەركەعالي راحماديەۆتىڭ «دايراباي», نۇرعيسا تىلەنديەۆتىڭ «سارىجايلاۋ», استور پياتستسوللانىڭ «Libertangو», ءشامشى قالداياقوۆتىڭ «انا تۋرالى جىر», اباي قۇنانبايۇلىنىڭ «كوزىمنىڭ قاراسى», الەكساندرا پاحمۋتوۆانىڭ «مەلوديا», قۋات شىلدەباەۆتىڭ «وتان-انا» تۋىندىلارىمەن قاتار باتىرحان شۇكەنوۆ رەپەرتۋارىنداعى اندەردەن پوپۋرري ورىندالدى.
كونتسەرتتە «دارىن» مەملەكەتتىك جاستار سىيلىعىنىڭ لاۋرەاتى جاسۇلان ەربولات, «سەرپەر» جاستار وداعى سىيلىعىنىڭ يەگەرى شاح-مۇرات ورداباەۆ, اكتەر نۇرسۇلتان ەسەن, اكتريسا ديانا جولدىبەك, اكتەر ءبىرجان ءجۇنىسوۆ ونەر كورسەتتى.
ءاسيا نۇربەكقىزى
