قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ رەپەرتۋارى «اققۋدىڭ كوز جاسى» اتتى ليريكالىق درامامەن تولىقتى. پرەمەرانىڭ ەكىنشى, ءۇشىنشى كۇنىندە سپەكتاكلدى كوپشىلىكپەن بىرگە ءبىز دە تاماشالادىق.
كوكتەمنىڭ تەزدەتىپ كەلۋىن اڭسايتىنىمىزعا ۇقساس قاللەكي ساحناسىنداعى تۇساۋكەسەردى دە تاعاتسىزدانا كۇتكەن ەدىك. ماحاببات تاقىرىبى ءوز الدىنا, كۇن ەرتە ەلەڭ ەتكىزگەنى – رەجيسسەر تالعات تەمەنوۆتىڭ اتالمىش درامانى زاڭعار جازۋشى شىڭعىس ايماتوۆتىڭ ايگىلى قوس تۋىندىسى نەگىزىندە ساحنالاۋى. قازاق تەاتر تاريحىندا العاش رەت «بوراندى بەكەت» رومانىنداعى رايمالى جايلى اڭىز بەن «ءجاميلا» پوۆەسى ءبىر ينستسەنيروۆكاعا بىرىكتى. ونىڭ ۇستىنە, كورەرمەنگە عاشىقتىق سەزىمىن بوياماسىز جەتكىزە بىلەتىن ت.تەمەنوۆتىڭ رومانتيكالىق قولتاڭباسىنا رياسىز سەنىمىمىز تاعى بار…
كەشكى ساعات التى جارىم. قويىلىم تاماشالاۋعا دايىن زال تىنىشتىعىن تەمىرجول ۆوكزالىنداعى حابارلاندىرۋ ءبولىپ, ساحنا شىمىلدىعى ءتۇرىلدى.
«ءجاميلا» جەلىسى ۇزدىكسىز بايانداۋ ارقىلى ءوربيتىنى كوزى قاراقتى وقىرمانعا بەلگىلى. سپەكتاكلدەگى وقيعانىڭ ءون-بويىنا دا اۆتور (جانىبەك مۇساەۆ, اقىش ومار) مونولوگى جەتەلەيدى – ەرەسەك سەيىتتىڭ وتكەن كۇن ەستەلىگى بالا سەيىت ارقىلى بەرىلەدى. الايدا, رەجيسسەر دراما جانرى كوتەرمەيتىن كوپسوزدىلىككە ۇرىنباۋدىڭ ۇتىمدى جولىن تاپقان. سپەكتاكلدەگى سەيىتتى 15 جاسار بوزبالا ەمەس, كوپىردەن قۇلاپ, قورقىنىشتان ءتىلى بايلانىپ قالعان ون-ون بىردەگى كىشكەنتاي بالا رەتىندە بەينەلەيدى.
مازمۇنىن بايانداۋدان ءبىز دە قاشايىق. «اققۋدىڭ كوز جاسى» ايتماتوۆتىڭ اتاقتى ەكى شىعارماسى نەگىزىندە قويىلعاندىقتان, سپەكتاكلدىڭ باس-اياعىنان پوۆەستەگى ءجاميلا مەن دانياردى ىزدەيتىنىمىز تۇسىنىكتى. ساحنالانعان نۇسقاسى دا رەجيسسەر قيالىنا سايكەس تۇپنۇسقا شىعارمادان ءبىرشاما وزگەرەتىندىگى, ول دا – زاڭدىلىق. دەگەنمەن, پوۆەستە دە سپەكتاكلدەگى جاعداي ءبىر بولعانىمەن, كەيىپكەرلەردىڭ ىشكى دۇنيەسى, وي-ارمانى ءوزارا ۇيلەسىمنەن الشاق. ءجاميلا تەز ارادا دانيارعا كوڭىلى اۋىپ, سوعىستاعى كۇيەۋىن ۇمىتقان جەڭىلتەك جان بولىپ قالدى. «سەن مەنىڭ ءتانىمدى يەمدەنسەڭ دە, جانىمدى تۇسىنە الماي ءجۇرسىڭ-اۋ» دەگەن اشىنا ايتقان سوزدەرىنىڭ دالەلى بولۋ ءتيىس – مەيىرىم مەن ىڭكار سەزىمگە ءزارۋ ايەل دۇنيەسىن تۇسىنبەيتىن سادىقتىڭ (ولجاس جاقىپبەك) بەيجاي قىلىقتارى سەندىرمەيدى. اكتەر جانات وسپانوۆ دانياردىڭ ءجاميلانى عاشىق ەتكەن مۇڭلى كوز, تەرەڭ ويلى, ءجۇرىس-تۇرىسى سالماقتى كەيپىنەن ەداۋىر الىس. قوس عاشىقتىڭ شىنايى سەزىمى, ناعىز ماحابباتىن كورسەتۋى ءتيىس ساحناداعى ءومىر ۇدەسىنەن شىقپاي, كوڭىلىمىزدى قالدىرعان ەدى. الايدا, ءۇمىتىمىز ءالى دە ۇزىلمەي, ءبىرىنشى قۇرام اكتەرلەرى وينايتىن ەرتەڭگى پرەمەراعا دا باراتىن بولدىق. قويىلىمنىڭ ءبىرىنشى قۇرامىنان قۇر قالماعانىمىز سەنىمىمىزدى اقتادى. ەكى قۇرام كوزقاراسىمىزدى تۇبەگەيلى وزگەرتكەن – ەكى بولەك دۇنيە بولىپ شىقتى…
وسى جولى ءبىر دەممەن كورىپ شىقتىم. اكتەرلەر ويىنى بەرىك بايلانىسقان, ءاربىر ميزانستسەنا ەش ءۇزىلىسسىز شىنايى جالعاسىپ وتىردى. ءبىر سوزبەن ايتقاندا, ويناعان ەشكىم جوق, كەيىپكەرلەر ساحنادا ءومىر ءسۇردى! سادىق ء(ابىلمانسۇر سەرىكوۆ), دانيار (قۋاندىق قىستىقباەۆ), ءجاميلا (اقمارال تاناباەۆا) – ۇشتىكتىڭ ۇيلەسىمدىلىگىندە ءسوز جوق.
قويىلىم بارىسىندا ادام جۇرەگىندەگى ەڭ اسىل سەزىم – ماحابباتتىڭ تازا سىرى شەرتىلەدى. ارالارىندا كوڭىل بىرلىگى جوق سادىققا امالسىزدان باسى بايلانعان ادال جار, ۇلگىلى كەلىن ءجاميلا مەن نازىك بولمىسى مەن شىن عاشىعىنىڭ سۇيىكتىسى بولۋدى قالاپ, دانيارمەن ءومىر كەشۋگە ىنتىق قىزدىڭ ىشكى كۇرەسى, تالاس-تارتىسى سەزىلەدى. 18-گە ەندى جەتكەن بەگىماي مەن الپىستىڭ القىمىنا شىققان رايمالى جىراۋدىڭ ماحابباتى جۇرەك تەبىرەنتەدى.
ەكى جۇپ تا بەيۋاقىتتا جولىقتى. جۇرتتىڭ قاڭقۋ سوزىنە, قورلاۋشىلار مەن قالىپتاسقان كەدەرگىلەرگە قاراماي, سەزىم ءۇشىن ايانباي كۇرەستى. وزگەنى بىلمەيمىن, ءوز باسىم ءجاميلانىڭ دا, رايمالىنىڭ دا قورعاۋشىسى, جاناشىرى بولىپ وتىردىم.
بەگىمايدىڭ ءرولىن سومداعان ينابات ابەنوۆا ونەرىمەن ءتانتى ەتتى. بۇل قازاق ۇلتتىق ونەر ۋنيۆەرسيتەتىنىڭ 3 كۋرس ستۋدەنتى يناباتتىڭ تەاترداعى العاشقى قادامى ەكەن. بەگىماي سۇلۋدىڭ رولىنە ءساتتى تاڭدالعانىمەن كەلىسپەسكە بولماس. ال, اقمارال تاناباەۆا كوز الدىمىزدا ءوسىپ جاتىر. «تىراۋلاپ ۇشقان تىرنالار» ليريكالىق دراماسىنداعى ينگا ءرولى ءۇشىن «زولوتوي ۆيتياز» 2015 حالىقارالىق تەاتر فورۋمىنىڭ التىن ديپلوم يەگەرى, قاللەكي تەاترىنىڭ قىزدارى ىشىندەگى جۇلدىزى جانىپ تۇرعان تالانتتى اكتريسا بولاشاعىنان زور ءۇمىت كۇتتىرەدى.
ت.تەمەنوۆتىڭ ءجاميلاسى باسقا دەمەسەڭىزدەر, جالپى رەجيسسەردىڭ باتىل وزگەرىس قادامدارى كەرەمەت اسەر سىيلايدى. «تىراۋلاپ ۇشقان تىرنالار» قويىلىمى سياقتى, «اققۋدىڭ كوز جاسىن» دا جالىقپاي كورۋگە بولادى. ايتپاقشى, «اققۋدىڭ كوز جاسىنان» جىلاپ شىعار ادام جوق, ودان ارتىق – جان-جۇرەگى جۇمسارىپ, ناعىز ماحابباتتىڭ بيىك ۇلگىلەرىنەن شابىت الىپ, قاناتتاناتىنى انىق دەسەم قاتەلەسپەيمىن.
ءمادينا جاقىپ
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
