كەشە ەلوردادا دۇنيەجۇزى قازاقتارىنىڭ «وتانداستار فورۋمى» ءوتتى.
سالتاناتتى شارا مەملەكەت باسشىسى قاسىم-جومارت توقاەۆتىڭ قۇتتىقتاۋىمەن اشىلدى. قازاقستان پرەزيدەنتىنىڭ كەڭەسشىسى مالىك وتارباەۆ جەتكىزگەن قۇتتىقتاۋ حاتتا «وتانداستار فورۋمى – حالقىمىز ءۇشىن ايرىقشا ءمانى بار باسقوسۋ. قازاقتا «كەڭەسپەن پىشكەن تون كەلتە بولماس» دەگەن ءسوز بار. اتا-بابامىز قاشان دا ەلدىك ماسەلەلەردى القالى جيىندا اقىلداسىپ شەشكەن. وسى ورايدا, شەتەلدەگى قازاقتارمەن جان-جاقتى بايلانىستى نىعايتۋ, ۇلتتىق قۇندىلىقتاردى دارىپتەۋ جانە باسقا دا وزەكتى ماسەلەلەردى وزدەرىڭىزبەن بىرگە تالقىلاۋدىڭ ماڭىزى زور» دەلىنگەن.
سونداي-اق پرەزيدەنت ازاماتتاردىڭ قاي مەملەكەتتە مەكەن ەتكەنىنە قاراماستان, ءبىر عانا تاريحي وتانى بار ەكەنىن ايىرىقشا اتاپ ءوتتى. «قازاقستان ازاماتتىعىن جانە «قانداس» مارتەبەسىن الۋ ءتارتىبى جەڭىلدەتىلدى. شەتەلدەگى قازاق كاسىپكەرلەرى ءۇشىن «اتا جولى» كارتاسى ەنگىزىلدى. باسقا دا ماڭىزدى جۇمىستار اتقارىلىپ جاتىر. بۇگىنگى جيىنعا الەمنىڭ ءار تۇكپىرىنەن ارنايى كەلگەن قانداستارىمىز بەن مارتەبەلى مەيماندارعا شىنايى ريزاشىلىعىمدى بىلدىرەمىن. باسقوسۋدا الىستاعى اعايىنمەن بايلانىستى نىعايتۋعا سەپتىگىن تيگىزەتىن ساليقالى وي, سالماقتى پىكىر ايتىلادى دەپ سەنەمىن» دەپ جازىلعان پرەزيدەنتتىڭ قۇتتىقتاۋ حاتىندا.
شەتەلدەگى ەتنيكالىق قازاقتارمەن قارىم-قاتىناستى دامىتۋ جانە ولاردى ەلىمىزدىڭ تۇراقتى دامۋىنا ۇلەسىن قوسۋعا جول اشۋ ماقساتىندا وتكەن بۇل فورۋمعا شەتەلدەگى 200-دەن استام قازاق ۇيىمدارىنىڭ باسشىلارى, بەلسەندى جانە تانىمال تۇلعالارمەن قاتار, وتاندىق عىلىم, ءبىلىم, مادەنيەت, سپورت, بيزنەس, مەديا, ساياسات, قوعامدىق ۇيىمدار جانە باسقا دا سالالاردىڭ وكىلدەرى قاتىستى.
– فورۋمعا 40-قا جۋىق مەملەكەتتەن 200-گە جۋىق دەلەگات كەلدى. بۇل فورۋم ەكىنشى رەت ءوتىپ وتىر. بۇعان دەيىن 2019 جىلى وتكەن. فورۋمنىڭ باستى ەرەكشەلىگى – اۋقىمدىلىعى, دەلەگاتتار سانىنىڭ كوپتىگى, – دەدى «وتانداستار» قورىنىڭ پرەزيدەنتى ابزال ساپاربەكۇلى.
