استانالىق بازارلاردا تۇراقتاندىرۋ قورىنان بولىنگەن ازىق-تۇلىك ونىمدەرى ساتىلا باستادى. ونىڭ ىشىندە حالىق كوپ باراتىن ساۋدا ورىندارىندا بۇگىندە توساپ قايناتۋعا بايلانىستى سۇرانىسقا يە بولىپ وتىرعان قانت قۇمشەكەرىنىڭ ءبىر كەلىسى 260 تەڭگەدەن ساتىلۋدا.
«شاپاعات» كوممۋنالدى بازارىندا قۇمشەكەردىڭ باعاسى 10 تەڭگەگە ارزان» دەيدى «Astana» اكك» ۇك» اق اكتيۆتەردى باسقارۋ دەپارتامەنتىنىڭ باس مەنەدجەرى اۋەز قارابالاەۆ. ونىڭ ايتۋىنشا, كوممۋنالدى بازاردا ساۋدا ورنىن جالعا الۋشىلار ازىق-تۇلىك ءونىمىن ارزانداتىپ ساتادى.
بيىل كوكتەمدە الەۋمەتتىك ماڭىزى بار ازىق-تۇلىك ونىمدەرىنىڭ تىزبەسىن بەكىتۋ جونىندە ۇكىمەتتىڭ ۇيعارىمىنا وزگەرىستەر ەنگىزىلگەن بولاتىن. وسى رەتتە «شاپاعات» كوممۋنالدى بازارىندا الەۋمەتتىك ماڭىزى بار ازىق-تۇلىك ءونىمىنىڭ 19 ءتۇرى قولجەتىمدى باعامەن ساتىلىپ كەلەدى. كوممۋنالدى بازاردا باعا تومەن بولعاننان كەيىن جۇرتشىلىق وعان كوپ بارادى. مۇندا كۇنىنە 5 مىڭعا دەيىن ادام باس سۇقسا, دەمالىس جانە مەرەكە كۇندەرى تۇتىنۋشىلار قاتارى 2-3 ەسە وسەدى.
باس قالادا ەكسپو كورمەسى كەزىندە كەلۋشىلەرگە ىڭعايلى بولۋ ءۇشىن كوممۋنالدى بازاردىڭ جۇمىس كەستەسى وزگەرگەن. بازار تاڭەرتەڭگى 10.00-دەن تۇنگى 23.00-گە دەيىن جۇمىس ىستەيتىن بولىپ وتىر. ەگەر بۇل جۇمىس كەستەسى ءوز تيىمدىلىگىن كورسەتسە, وندا كوممۋنالدى بازاردىڭ جۇمىس ۋاقىتى كورمە اياقتالعان سوڭ دا وسى قالىپتا جالعاساتىن بولادى.
