استانا ەلىمىزدىڭ باس قالاسى بولعاندىقتان, مۇندا قىدىرىپ كەلەتىن جۇرتتىڭ قاتارى قالىڭ. تيىسىنشە قالانىڭ كىرشىكسىز بولۋى ىلعي نازاردا تۇرماق. جاقىندا ەلوردا كوشەلەرىن ءبىر شولىپ, قازاقتىلدى اتاۋلار مەن جازۋلارعا كوز جۇگىرتىپ شىقتىق. ءبىر وكىنىشتىسى, باسىم بولىگىن ءورىستىلدى نۇسقاسىنا قاراماي تۇرىپ ءتۇسىنۋ قيىنداۋ. وسى تۇستا ءبىز كوزگە تۇرپىدەي تيگەن بىرنەشە اتاۋدى بەلىنەن سىزىپ, بەلگىلەپ كورسەتۋدى ءجون ساناپ وتىرمىز.
بۇرىنعى ۆوكزال ماڭىنداعى كولىك تۇراعىنا بيىلدان باستاپ اقىلى جۇيە ەنگىزىلگەنى كوپكە ايان. اياڭداپ باسىپ, تۇراق الاڭىنا كىردىك. كىرەبەرىستە-اق كوزىمىزگە «ورىنتۇراقتى پايدالانۋ قاعيداسى» دەگەن جازبا ۇشىراي كەتتى. «ورىنتۇراق» دەگەن ءسوزدى ىشتەي ءبىر-ءبىر قايتالاپ الدىق تا ماعىناسىن ويلاي باستادىق. بىلاي الىپ قاراساق, «ورىن» مەن «تۇراق» ەكەۋى بىرىگىپ, ءبىر ماعىنا بەرىپ تۇرعانى انىق. ال ونى كۇردەلەندىرمەي-اق «كولىك تۇراعىن پايدالانۋ قاعيداسى» دەپ پايدالانسا, وقۋ دا, ءتۇسىنۋ دە الدەقايدا جەڭىلىرەك بولار ەدى. مۇنداي تاقتايشا تۇراق الاڭىنىڭ بىرنەشە جەرىنە ىلىنگەنىن ايتا كەتەيىك.
بۇدان ارى قاراي ءبىزدى «قىزمەتتىك كىرۋ» دەگەن جازبا قارسى الدى. ءورىستىلدى نۇسقاسىندا «سلۋجەبنىي ۆەزد» دەگەنىن وقىدىق. وسى تۇستا سوزبە-ءسوز اۋدارىلعانىن بىردەن اڭعاردىق. العاش كورگەن ادام ورىسشاسىنا نازار اۋدارماي تۇرىپ, ماعىناسىن تۇسىنە قويۋى ەكىتالاي. ال تۇسىنىكتىلەۋ بولۋ ماقساتىندا «قىزمەت كولىكتەرى ءۇشىن» دەگەن نۇسقاسى دۇرىس بولار دەگەن ويعا كەلدىك. الايدا جازبانىڭ جوعارى جاعىنداعى كوك باعانادا كورسەتىلگەن باعىتى «ءۇشىن» دەگەن ءسوزدىڭ ورنىن الماستىرىپ تۇرعانى انىق. سوندىقتان قاراپايىم عانا «قىزمەت كولىكتەرى» دەپ جازسا, ۇعىنىقتىراق بولار ەدى!
ايتا كەتەر تاعى ءبىر جايت, وسىعان ۇقساس كالكا اۋدارمالار بىزدە كوپتەپ كەزدەسەدى. ماسەلەن, قوعامدىق كولىكتە ەلەكتروندى تولەم جاسايتىن كارتامىزدا «كولىكتىك كارتا» دەپ كورسەتىلگەن, سونداي-اق قالامىزداعى «ستۋدەنتتىك ساياباق» دەگەن اتاۋ بار. ۋاقىت وتە كەلە كوزىمىز ۇيرەنبەسە, ءبىر كورگەندە وعاشتاۋ كورىنەرى جاسىرىن ەمەس. ونى «كولىك كارتاسى» جانە «ستۋدەنتتەر ساياباعى» دەگەن اتاۋمەن الماستىرسا, نۇر ۇستىنە نۇر بولار ەدى.
ۆوكزال ماڭىنداعى «جورىعىمىزعا» قايتا ورالايىق. بەس قاباتتى ۇيلەردىڭ ءبىرىنشى قاباتى ساۋدا نۇكتەلەرىنە تولىپ تۇر. سولاردىڭ بىرىندە «زەرگەرلىك ساتۋ», «گاۋھار زەرگەرلىك باعالاۋ» دەگەن اتاۋلارعا كەز بولدىق. قانداي ماعىنادا اۋدارىلعانىن ءبىلۋ ءۇشىن ورىسشاسىنا ءمان بەرىپ ەدىك «پروداجا يۋۆەليرنىح يزدەلي» جانە «وتسەنكا يزدەلي س بريلليانتامي» دەپ جازىلىپتى. ساۋدا ورنى يەسىنىڭ قازاق تىلىنە تىم سالاقتىعى كىمدى دە بولسىن قىنجىلتارى ءسوزسىز. ولاردىڭ ورنىنا «زەرگەرلىك بۇيىمداردى ساتۋ» جانە «گاۋھار بۇيىمدارىن باعالاۋ» دەپ قولدانعانى ءجون بولار ەدى.
ءجا, ۆوكزال ماڭىنداعى قاتەلەردى تىزە بەرسەك, سانىنا جەتپەسپىز. كولىگىمىزدى تىزگىندەپ ءارى قاراي ۇزاي بەرگەنىمىزدە ى.التىنسارين, 16 مەكەنجايىندا ورنالاسقان عيماراتتاعى قاتەگە تاپ بولدىق. كادىمگى «ازىق-تۇلىك» قوس سوزىندەگى دەفيسى جوق, قايدا كەتكەنى بەلگىسىز. جەلدى كۇننىڭ بىرىندە ءتۇسىپ قالعان دەپ اقتايىق دەسەك, دەفيسكە ارنالعان ورىننىڭ ءىزى دە بايقالمايدى.
جولىمىزدى ارى قاراي سارىارقا داڭعىلىمەن تۇرانعا قاراي جالعادىق. ەكى ارانىڭ تۇيىسەر تۇسىندا جاسىل باعانا الىستان مەنمۇندالاپ تۇردى. جاقىنداپ بارعانىمىزدا, بۇل جەردەن دە قاتەلەرىنەن اتتاپ كەتە المادىق. «استانا پارك قوناك ءۇيى» دەگەن ۇلكەن جازۋ بار. ىشتەي «قازاقتىڭ قور بولعان ءتول دىبىستارى-اي» دەدىك. ودان تومەن قاراي «مەيرامحانا «chalet» دەگەن اتاۋ تۇر. شاماسى 1-سىنىپتا الىپپە ساباعىندا داۋىستى دىبىستان كەيىن «ي» ءارپىنىڭ توبەسى تۇرتىلەتىنىن وقىماعان بولار-اۋ دەگەن وي قالدىردى.
ال ەندى كۇيشى دينا, 26 مەكەنجايىنداعى جارناماعا ءمان بەرىڭىز, «جاڭا تاۋار ءتۋسىلىم!» دەلىنگەن. نە بايقادىڭىز؟ قازاق تىلىنە ءتان «ءۇ» ءارپى قور بولىپ تۇرعانى ءوز الدىنا, «ءتۇسىلىم» سوزىندە قاتە بارىن ايتا كەتكەن ءجون. دۇرىس نۇسقاسى «ءتۇسىم» بولماق.
تىزە بەرسەك, تاپقان قاتەلەرىمىز جالعاسا بەرەرى ءسوزسىز. بۇل – ءبىزدىڭ نەبارى ءبىر-ەكى ساعاتتىق جۇمىسىمىزدىڭ ناتيجەسى.
ايان ءابدۋالي
