جاز كەلىسىمەن بالا اتاۋلى وزەن-كولدەرگە, توعاندارعا شومىلۋعا اسىعىپ تۇرادى. الايدا قارا سۋدىڭ قاۋپىن ەستەن شىعارىپ, ءارتۇرلى وكىنىشتى جاعدايلار بولىپ جاتادى. 5 ماۋسىم كۇنى باق وكىلدەرىمەن جۇزدەسكەن توتەنشە جاعدايلار كوميتەتىنىڭ باسشىسى ۆلاديمير بەككەر جانتۇرشىگەرلىك اقپاراتتى جاريا ەتتى. جىل باسىنان بەرى ەلىمىزدە 76 ادام قارا سۋ باتىپ, كوز جۇمعان. سونىڭ ىشىندە 40-ى بالالار ەكەن.
قۇزىرلى مەكەمەنىڭ بەرگەن مالىمەتىنە سۇيەنسەك, 76 ادامنىڭ 22-ءى شومىلىپ ءجۇرىپ, سۋعا باتىپتى. ونىڭ ەكەۋى سۋعا باتقان جانداردى قۇتقارامىن دەپ, اجال قۇشقان. مۇنداي قايعىلى وقيعانىڭ ءبىرى – ەلوردادا, ەكىنشىسى اتىراۋ وبلىسىندا تىركەلدى. ەكى ادام سۋ قويماسىنان وتەردە 8 بالا ارىقتار مەن سۋعاراتىن ارنالاردا سۋعا باتىپ, قايتىس بولعان. كوپ جاعدايدا جاس بالالاردى اتا-انالارى قاراۋسىز قالدىرعان.
ۆلاديمير بەككەر ەل اۋماعىندا 50 مىڭعا جۋىق سۋ قويمالارى بار ەكەنىن ايتتى. ولارعا ادامدار شومىلادى, بالىق اۋلايدى, شارۋاشىلىق جۇرگىزەدى. الايدا ءبىر تاڭقالارلىعى, سۋداعى قۇتقارۋشىلاردىڭ بار-جوعى – 1 380 ادام. بۇل – ءاربىر 100 سۋ قويماسىنا كەم دەگەندە 3 ادامنان كەلەدى دەگەن ءسوز.
«بۇل سۋ قويمالارىنا ءبىز ءبىر-ءبىر قۇتقارۋشىدان دا قويا المايمىز. وتە كۇردەلى ماسەلەنىڭ ءبىرى – وسى. وتكەن جىلى بۇل ماسەلەنى شەشۋ جولدارىن ءبىلىم جانە عىلىم مينيسترلىگىمەن بىرلەسىپ, اقىلداستىق. ناتيجەسىندە, ورتا ءبىلىم بەرۋ باعدارلاماسىنا دەنە شىنىقتىرۋ ءپانى بويىنشا سۋدا ءجۇزۋدى وقىتۋدى ەنگىزدىك» دەدى باسقوسۋدا
ۆ.بەككەر. دەگەنمەن, تۇيتكىلدى ماسەلەنىڭ تەز شەشىلۋى مۇمكىن ەمەس. قارا سۋدان اجالى كەلگەن 76 ادامنىڭ 27-ءسى – بالىقشىلار. ولار – قىستىگۇنى جانە جازدىگۇنى اۋا رايىنىڭ قانداي بولعانىنان قاراماستان بالىق اۋلاۋعا شىعاتىندار. كوپ جاعدايدا بالىق اۋلاۋعا دەگەن قۇشتارلىق ءارتۇرلى قايعىلى وقيعالارعا ۇرىندىرىپ جاتادى. قۇتقارۋشىلاردىڭ سانى وتە از بولعاندىقتان, ولارعا كومەك قولىن سوزاتىندار سيرەك. توتەنشە جاعدايلار كوميتەتىنىڭ مىنا ءبىر دەرەگى دە جاعاڭدى ۇستاتادى: جىل سايىن ەلىمىزدە 1400-گە جۋىق ادام قارا سۋعا باتادى ەكەن. ولاردىڭ تەك 800-900-ءىن عانا قۇتقارۋعا مۇمكىندىك تۋادى. قۇتقارۋشىلار ەلىمىزدەگى ەڭ قايعىلى وقيعالار كوپ تىركەلگەن جىل 2015 جىل ەكەنىن ايتادى. ول كەزدە 600 ادام ومىرمەن قوش ايتىسىپتى. سۋعا بارعاندا «ساقتانساڭ – ساقتايمىن» دەگەن قاراپايىم قاعيدانى ەستەن شىعارماعان ءجون.
