جۋىردا ارقاداعى ءبىلىم مەن عىلىمنىڭ قارا شاڭىراعى – اكادەميك ە. بوكەتوۆ اتىنداعى قاراعاندى ۋنيۆەرسيتەتىنىڭ فيلولوگيا فاكۋلتەتىندە جۋرناليستيكا كافەدراسىنىڭ 30 جىلدىق مەرەيتويىنا ارنالعان «مەديا ءبىلىم بەرۋ جاعدايىنداعى جۋرناليستيكا جانە PR» اتتى فورۋم ءوتتى. القالى جيىنعا الىس-جاقىننان كەلگەن مارتەبەلى مەيماندار: م. قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, قازاقستان جوعارى مەكتەبىنىڭ اكادەميگى, وسى كافەدرانىڭ نەگىزىن قالاۋشى زارقىن تايشىباي باستاعان وقىتۋشى-پروفەسسورلار, ۋنيۆەرسيتەت جانە باق باسشىلارى, ءار جىلدارى وقۋ بىتىرگەن تۇلەكتەر قاتىستى.
فورۋمدى اشىپ, ءسوز سويلەگەن ە. بوكەتوۆ اتىنداعى قاراعاندى ۋنيۆەرسيتەتىنىڭ باسقارما توراعاسى – رەكتور نۇرلان دۋلاتبەكوۆ كافەدرا ۇجىمى مەن تۇلەكتەرىن مەرەيتويمەن قۇتتىقتاپ, وقۋ ورداسىنىڭ جۋرناليست-تۇلەكتەرىنىڭ بۇقاراعا تانىمال بولۋىنىڭ ءوزى ساپالى ءبىلىم دەڭگەيىنىڭ ءبىر كورسەتكىشى ەكەنىن اتاپ ءوتتى. «جاقىندا ۇزدىك تۇلەكتەرىمىزدىڭ ءبىرى – ۆلاد ۆودنەۆ شەتەلدەن سالەمىن جەتكىزىپ, مەرەيلى داتامەن قۇتتىقتادى. ول ۋنيۆەرسيتەتتە العان ءبىلىمى ارقىلى ومىردە كوپ تابىسقا جەتكەنىن زور ماقتانىشپەن جەتكىزدى. بۇل – ءبىز ءۇشىن ۇلكەن قۇرمەت, بارلىق جۋرناليستەرگە تابىس تىلەيمىن!» دەدى ۋنيۆەرسيتەت رەكتورى.
ودان كەيىن قۇتتىقتاۋ ءسوز سويلەگەن ورتالىق جانە سولتۇستىك قازاقستاندا ءتول جۋرناليستيكا مەكتەبىن قالىپتاستىرىپ, ۇلتتىق جۋرناليستيكانىڭ جۇزدەگەن, مىڭداعان مىقتى ماماندارىن دايارلاعان زارقىن تايشىباي 30 جىل بۇرىن وسى كافەدرانى اشۋ باقىتىنا يە بولعانىن, العاشقى وقىتۋشىلار مەن ستۋدەنتتەردى قالاي قابىلداعانىن ەسكە الىپ, تاريحي وقيعالاردى اسەرلى راۋىشپەن جەتكىزدى. «1993 جىلى جۋرناليستيكانى وسى ۋنيۆەرسيتەتتە اشۋ كەرەك دەگەندە ءبىز ءبىلىمنىڭ, مادەنيەتتىڭ وشاعى رەتىندەگى كەلەشەگىنە سەنگەن ەدىك. قاراعاندى ۋنيۆەرسيتەتى سول سەنىمدى ۇلكەن قۇرمەتپەن اقتاپ كەلەدى» دەي كەلە, تاۋەلسىزدىگىمىزدىڭ ەڭ ءبىرىنشى ساپىنداعى كۇرەسكەرلەرى – جۋرناليستەرگە ساتتىلىك تىلەدى.
فورۋمدا كافەدرانىڭ تاريحى تۋرالى قىسقامەتراجدى فيلم كورسەتىلىپ, مارتەبەلى مەيماندار – قاراعاندىداعى جۇمىس بەرۋشى باق باسشىلارى, 25 جىلدا ءبىلىم وشاعىنان تۇلەپ ۇشقان تۇلەكتەر جۇرەكجاردى لەبىزدەرىن ايتىپ, ۇلاعاتتى ۇستازدارىن ەسكە الىپ, ساعىنىشقا اينالعان جىلدارداعى جىپ-جىلى ەستەلىكتەرىمەن ءبولىستى. اسىرەسە, تۇلەكتەر جالىنداعان جاستىق شاعىندا جۋرناليست بولۋعا باۋلىعان مارقۇم قۋاندىق شاماحايۇلى, ماعاۋيا سەمباي, كارىم ساۋعاباي, مارتبەك توقمىرزا سياقتى تۇعىرلى تۇلعالاردان وشپەس ونەگە العانىن تەبىرەنىسپەن ايتتى. الماتىدان ارنايى كەلگەن تۇلەكتەردىڭ ءبىرى, «Alatau-Aqparat» مەدياحولدينگىنىڭ باس ديرەكتورى ەرجان قالىمبايۇلى: «قازىر جۋرناليستەر مەملەكەتتىك سانانىڭ ورنىعۋىنا, اقپاراتتىق سالانىڭ دامۋىنا قالامىمەن زور ۇلەس قوسىپ ءجۇر. ارىپتەستەرىمىز ەلىمىزدە عانا ەمەس, شەتەلدەردە دە جەمىستى ەڭبەك ەتۋدە. ءبىز بوكەتوۆ ۋنيۆەرسيتەتىنىڭ تۇلەگى ەكەنىمىزدى ارقاشان ماقتان ەتەمىز. الداعى ۋاقىتتا ءبىلىمنىڭ قارا شاڭىراعىنان ءبىلىمدى, بىلىكتى ماماندار كوپ شىعاتىنىنا سەنىمىمىز مول» دەگەن تاماشا قۇتتىقتاۋىن جەتكىزدى. جاعىمدى جاڭالىقتىڭ ءبىرى – سول كۇنى ە. بوكەتوۆ ۋنيۆەرسيتەتى مەن «Alatau-Aqparat» مەدياحولدينگى اراسىندا ىنتىماقتاستىق تۋرالى مەموراندۋمعا قول قويىلدى. سونىڭ نەگىزىندە كافەدرانىڭ ستۋدەنتتەرى مەدياحولدينگ قۇرامىنداعى باسىلىمداردا وندىرىستىك تاجىريبەدەن ءوتىپ, وقۋىن تامامداعان سوڭ جۇمىسقا ورنالاسۋىنا جول اشىلادى.
سوڭىنان ءسوز تىزگىنىن العان فيلولوگيا فاكۋلتەتىنىڭ دەكانى ەلدوس تۇيتە كافەدرا-تۇلەكتەر-جۇمىس بەرۋشى اراسىنداعى ۇزدىكسىز بايلانىستى ورناتۋعا نازار اۋدارىپ, باق باسشىلارىن العىس حاتتارمەن, ەستەلىك سىيلىقتارمەن ماراپاتتادى. فورۋمنىڭ ەكىنشى بولىگى اكادەميك ز. تايشىبايدىڭ جانە ۇلتتىق مەديانىڭ ءارتۇرلى سالاسىندا تابىستى ەڭبەك ەتىپ جۇرگەن ەسىمىن ەل بىلەتىن جۋرناليستەردىڭ شەبەرلىك ساباقتارىمەن جالعاستى. جيىننىڭ قورىتىندى بولىمىندە ءسوز العان جۋرناليستيكا كافەدراسىنىڭ مەڭگەرۋشىسى, قاۋىمداستىرىلعان پروفەسسور, فيلولوگيا عىلىمدارىنىڭ كانديداتى جانار رامازانوۆا مەرەيى ۇستەم بولعان مەديا ۇستاحانانىڭ 30 جىلدىق تويىنا كەلگەن مەيماندارعا, ءوز ارىپتەستەرىنە, ستۋدەنتتەرىنە العىسىن ايتىپ, جوعارى وقۋ ورنى مەن تۇلەكتەر اراسىنداعى ىقىلاستى ىنتىماقتاستىقتىڭ ۇزىلمەيتىنىنە سەندىردى. مەيمانامىز تاسىپ, ابىرويىمىز اسقان كۇنى ۇشقان ۇيامىزدا قاۋىشقان ۇلاعاتتى ۇستازدارىمىزعا, بارشا ارىپتەستەرىمىزگە اماندىق-ساۋلىق, ساتتىلىك پەن تابىس تىلەيمىز!
