كەشە مەملەكەت باسشىسى قاسىم-جومارت توقاەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ ەكىنشى وتىرىسى ءوتتى. پرەزيدەنت ءوز سوزىندە كەڭەس مۇشەلەرى مەملەكەتتىك ورگان وكىلدەرىمەن بىرلەسىپ اۋقىمدى جۇمىس اتقارعانىن, قىزۋ تالقىلانىپ, پىكىرتالاس تۋعىزعان كوپتەگەن ۇسىنىستار مەن باستامالاردىڭ ەسكەرىلگەنىن جەتكىزدى. كەڭەستىڭ باستى ماقساتى ەلىمىزدەگى ەكونوميكالىق جانە ساياسي ماسەلەلەر بويىنشا جۇيەلى, ۇزاقمەرزىمدى, ءتيىمدى شارالار ازىرلەۋ ەكەنىن ايتتى.
مەملەكەت باسشىسىنىڭ ايتۋىنشا, بۇگىندە بالاما كوزقاراستان قورىقپاۋ پروتسەسى جۇرۋدە. ۇلتتىق قوعامدىق سەنىم كەڭەسىندە پرەزيدەنتتىڭ «ءارتۇرلى كوزقاراس – ءبىر ۇلت» فورمۋلاسى تىكەلەي ىسكە اسىپ جاتىر.
– مەن «حالىق ۇنىنە قۇلاق اساتىن مەملەكەت» تۇجىرىمداماسىن جاريا ەتتىم. مۇنى جاقسى بىلەسىزدەر. ءبىز ءوز قىزمەتىمىزدە, ەڭ الدىمەن, قاراپايىم ازاماتتاردىڭ سۇرانىسى مەن مۇڭ-مۇقتاجىن باسشىلىققا الۋىمىز كەرەك. حالىقتان جوعارى جانە حالىقتان بيىك تۇرعان ەشكىم دە, ەشتەڭە دە جوق. ۇلتتىق كەڭەس, ءبىرىنشى كەزەكتە, قوعامدىق ديالوگ پەن سەنىم الاڭى رەتىندە قۇرىلدى. ءبىز وسى سەنىمدى اقتاۋعا ءتيىسپىز. ارينە, ازاماتتاردى الاڭداتقان تۇيتكىلدى ماسەلەنىڭ ءبارىن بىرنەشە ايدا شەشىپ تاستاۋ مۇمكىن ەمەس. دەگەنمەن بىرقاتار ماسەلە بويىنشا العا ىلگەرىلەپ, شۇعىل شەشىمدەر قابىلدادىق. جۇمىس جۇيەلى تۇردە جۇرگىزىلىپ كەلەدى. ونىڭ قارقىنىن باسەڭدەتپەيمىز. كوكەيتەستى ماسەلەنىڭ ءبىرى – جەر جانە ونى ءتيىمدى پايدالانۋعا قاتىستى. جاقىندا اقمولا وبلىسىنا جاساعان ساپارىمدا اۋىل شارۋاشىلىعى ماقساتىنداعى جەردى ءتيىمسىز پايدالانۋ جايىنا نازار اۋداردىم. بۇل باعىتتا, مەنىڭ ۇستانىمىم – بەكەم: جەردى يگەرە الاتىن ادام عانا ونىڭ يەسى بولۋعا لايىق, – دەدى ق.توقاەۆ.
قاسىم-جومارت توقاەۆ الەۋمەتتىك رەفورمالار تۋرالى ايتا كەلىپ, كوپبالالى وتباسىلارعا بەرىلەتىن اتاۋلى الەۋمەتتىك كومەك ماسەلەسى ءالى دە وزەكتى بولىپ وتىر دەپ سانايدى. ۇكىمەتتىڭ الدىنا اشىق ءارى ءادىل اتاۋلى كومەكپەن قامتاماسىز ەتۋ مىندەتى قويىلدى. پرەزيدەنت مەملەكەتتىڭ تەك مۇقتاج جاندارعا عانا جاردەم بەرۋى ءتيىس ەكەنىن ايتتى.
– كوپبالالى وتباسىلارعا جاڭا مەملەكەتتىك جاردەماقىنى ديففەرەنتسيالدى, ياعني ايلىق ەسەپتىك كورسەتكىشتىڭ 42,5 مىڭ تەڭگەدەن 74 مىڭ تەڭگەگە دەيىنگى ەسەلەنگەن ولشەمىمەن بەرۋ ۇسىنىلادى. سونىمەن قاتار جاعدايى تومەن وتباسىلاردىڭ بالالارىنا كەپىلدەندىرىلگەن الەۋمەتتىك پاكەت جاساقتالادى. مەكتەپ جاسىنا دەيىنگى بالالار ازىق-تۇلىكپەن جانە ەڭ قاجەتتى دەگەن قۇرال-جابدىقتارمەن قامتىلادى. وقۋشىلار مەكتەپتە ىستىق تاماقتى تەگىن ىشەدى, مەكتەپكە بارىپ-قايتۋ جولاقىسى, سونداي-اق, مەكتەپ فورماسى مەن وقۋ قۇرالدارى تەگىن بولادى, – دەپ مالىمدەدى پرەزيدەنت.
مۇمكىندىگى شەكتەۋلى ادامدار دا نازاردان تىس قالمايدى. جۇمىس بەرۋشىلەر ولاردى جۇمىسقا قابىلداۋ ءۇشىن ارنايى كۆوتا ءبولۋى ءتيىس. سونىمەن قاتار قاسىم-جومارت توقاەۆ جۇمىس بەرۋشىلەردىڭ مىندەتتى 5 پايىزدىق زەينەتاقى جارناسىن تولەۋدى ەنگىزۋ مەرزىمىن كەيىنگە شەگەردى.
– جۇمىس بەرۋشىلەردىڭ مىندەتتى 5 پايىزدىق زەينەتاقى جارناسىن تولەۋگە قاتىستى داۋ-داماي باسىلار ەمەس. مۇنى 2020 جىلدىڭ 1 قاڭتارىنان باستاۋ كوزدەلگەن بولاتىن, الايدا ءالى كۇنگە دەيىن بارشاعا ورتاق ۇستانىم جوق. سوندىقتان جۇمىس بەرۋشىلەردىڭ مىندەتتى زەينەتاقى جارناسىن ەنگىزۋ مەرزىمى 2023 جىلعا دەيىن شەگەرىلدى, – دەدى قاسىم-جومارت توقاەۆ.
مەملەكەت باسشىسى قازاق ءالىپبيىن لاتىن گرافيكاسىنا كوشىرۋ ىسىندە اسىعىستىققا سالىنباۋ كەرەكتىگى تۋرالى ايتتى. بۇل جۇمىستى جان-جاقتى ساراپتاپ, ناقتى شەشىم شىعارۋ قاجەتتىگىن اتاپ ءوتتى.
– ۇسىنىلعان لاتىن گرافيكاسىنداعى ءالىپبيدىڭ ءۇش نۇسقاسىندا دا شيكىلىكتەر انىقتالدى. سوندىقتان بۇعان شىنايى عىلىمي تۇرعىدان كەلۋ كەرەك. بۇل جەردە ماسەلە كيريللدەن لاتىنعا اۋىسۋدا عانا تۇرعان جوق, قازاق ءتىلىنىڭ رەفورماسى, ونىڭ جاڭعىرۋى كەرەك, – دەدى مەملەكەت باسشىسى.
ءسوزىنىڭ سوڭىندا حالقىمىزدىڭ ساياسي ءارى قۇقىقتىق مادەنيەتىنىڭ ارتقانىن ايتقان پرەزيدەنت ماسەلە تەك ساياساتتا عانا ەمەس ەكەنىن, كوپ نارسە ادامدار اراسىندا, وتباسىندا, ياعني كۇندەلىكتى ومىردە ۇستاناتىن قاراپايىم قۇندىلىقتارعا بايلانىستى بولاتىنىن اتاپ ءوتتى.
