كەشە استانانىڭ ەسىل اۋدانىندا قارتتاردىڭ بوس ۋاقىتتارىن وتكىزۋگە ارنالعان شاعىن ورتالىق اشىلدى. «ارمان قالا» تۇرعىن ءۇي كەشەنىندە ورنالاسقان اۋدانداعى وسىنداي بەسىنشى ورىن بولىپ وتىر. سالتاناتتى شارادا قازاقتىڭ داستۇرىمەن شاشۋ شاشىلىپ, قونىس قۇتتى بولسىن ايتا كەلگەن قالالىق ارداگەرلەر كەڭەسى باستاعان ءتۇرلى ۇيىمداردىڭ اتىنان سىيلىقتار جاسالدى.
شاعىن ورتالىق ەكى بولمەدەن تۇرادى. قارتتار وندا شاحمات, دويبى, توعىزقۇمالاق, باسقا دا ويىنداردى ويناپ, قاتارلاستارىمەن تۋعان كۇندەرىن اتاپ وتە الادى.
«قارتتاردىڭ ارقايسىسى ءوزىنىڭ قاتارىن ىزدەپ تۇرادى. ماسەلەن, ءوزىم 71 جاسقا كەلدىم. دالاعا شىقسام, تىلدەسەتىن, پىكىر الىساتىن قاتارىمدى ىزدەپ تۇرامىن. وسىنداي شاعىن ورتالىقتار سوعان مۇمكىندىك بەرەدى. قارتايعاندا قۇربى-قۇرداسپەن قاۋقىلداسىپ وتىرعان ءبىر عانيبەت قوي. بالالار جۇمىستا, نەمەرەلەر بالاباقشا, مەكتەپتە بولعاندا كۇنى بويى جالعىز وتىرعانشا, وسىنداي ورتاعا كەلىپ, سەرگيسىڭ. قازىر اۋدانىمىزدا 8 ۇلى وتان سوعىسى ارداگەرى, 280 تىل ەڭبەككەرى, ال جالپى العاندا 17500 قاريا تىركەۋدە تۇر. قازىرگى شاعىن ورتالىقتاردىڭ سانى ازدىق ەتەدى. تاعى 2 ورتالىق اشۋدى جوسپارلاپ قويدىق. سونى بيىلدان قالدىرماي ىسكە اسىرساق دەپ وتىرمىز» دەيدى
اۋداندىق ارداگەرلەر كەڭەسىنىڭ ءتورايىمى رىستى اتىعاەۆا.
اتالمىش ورتالىقتىڭ اشىلۋىنا «ءۆى GROUP» قۇرىلىس كومپانياسىنا قاراستى «استانا جيلسەرۆيس» جشس-ءنىڭ كومەگى ءتيدى. وسىدان بۇرىن بۇل سەرىكتەستىك الماتى اۋدانىندا قارتتارعا بەس ورتالىق اشىپ بەردى. بولاشاقتا ولاردىڭ سانىن ارتتىرىپ, بالالارعا ارنالعان اۋلا كلۋبتارىنا دا بەت بۇرماق. ول تۋرالى سەرىكتەستىكتىڭ ديرەكتورى رۋستام
ايتجانوۆتان بىلدىك. ونىڭ ايتۋىنشا, بۇل جۇمىستى شيراتۋ ءۇشىن بارلىق ينفراقۇرىلىممەن قامتاماسىز ەتىلگەن تۇرعىنجايلار قاجەت.
