دانا حالقىمىز «جاس كەزىمدە بەينەت بەر, قارتايعاندا زەينەت بەر» دەپ ءومىر وتكەلدەرىنىڭ تەگىس بولمايتىنىن سارالاپ, وسىنداي ۇلاعاتتى وي تۇيگەن.
قازىر 90-100-گە جەتكەندەردى ايتپاعاندا, 70-80-گە كەلگەن اقساقالدارىمىز بەن اجەلەرىمىزدىڭ جاستىق شاعى ويىن-ساۋىقپەن وتپەگەنى بەلگىلى. اعا بۋىننىڭ الدى ەل باسىنان وتكەن بارلىق ناۋبەتتى باستان وتكەردى. «32-ءنىڭ اشتىعى», «37-ءنىڭ زوبالاڭى», «41-ءدىڭ قاسىرەتىن» كوردى. ال ولاردىڭ ۇرپاعى دا قوعام دامۋىنىڭ كەزەڭدەرىندە قيىندىقتىڭ ءبارىن كوردى, ءتوزدى. ولاردىڭ بالالىق شاعى ۇلى وتان سوعىسىنىڭ قيىن-قىستاۋ جىلدارىنا تاپ كەلدى. ولار بۇعاناسى قاتپاي جاتىپ ەڭبەككە ارالاستى. تىلداعى اۋىرتپالىق قارتتار مەن ايەلدەرگە, بالالارعا ءتۇستى. اۋىل شارۋاشىلىعىنىڭ بارلىق سالاسىنداعى ناۋقاندىق جۇمىستارعا قول ۇشىن بەردى. سوقامەن جەر جىرتىپ, ەگىن باستىردى. قول وراقپەن ءشوپ شاپتى, قوي قىرىقتى. ءتىپتى شاحتاعا ءتۇسىپ, كەن قازعاندار دا بولدى. قانشاما اۋىر تۇرمىستى كورسە دە, ولاردىڭ بىلىمگە, ەڭبەككە دەگەن قۇشتارلىعى زور بولدى. وقۋعا, بىلىمگە تالپىندى. ءسويتىپ ءجۇرىپ شىڭدالدى, ءوستى, جەتىلدى. سوعىستان كەيىنگى حالىق شارۋاشىلىعىن قالپىنا كەلتىرۋدە جاساعان ەڭبەكتەرىنىڭ ارقاسىندا ەلىمىز قايتادان ەڭسە كوتەرىپ, مەملەكەتىمىز بويىن تىكتەدى.
مىنە, سول قوعامعا وراسان ەڭبەك سىڭىرگەن الدىڭعى بۋىن اعالارىمىز بۇگىندە شاۋ تارتتى. جاسىنا قاراي ەڭبەك دەمالىسىنا شىقتى. زەينەتكەر اتاندى. جاستىق شاعىندا بەينەت كورگەن قارتتارىمىزدىڭ قارتايعاندا راحات كورەتىن كەزى كەلدى. ولاردىڭ تالاپ-تىلەگىنە, مۇڭ-مۇقتاجىنا, الەۋمەتتىك, مورالدىق جاعدايىنا نازار اۋداراتىن ءتيىستى ورىندار بار ما؟
بۇل ورايدا استانا قالاسىندا تۇراتىن زەينەتكەرلەر مەن ارداگەرلەرگە جاسالىپ وتىرعان قامقورلىق جاقسى دەپ ايتۋعا بولادى. بۇرىن زەينەتكەرلەر ۇمىت بوپ قالعانداي, ەشبىر دەڭگەيگە قوسىلا الماي دەل-سال كۇي كەشكەنى راس. ولاردىڭ باس قوسىپ, اڭگىمە-دۇكەن قۇراتىن, پىكىر الىسىپ, وي بولىسەتىن ورنى بولماي, ءار اۋلادا ءبىر شوعىر بوپ بەرەكەسى بولماي ءجۇردى. ءتيىستى ورىندارعا بارىپ ءوتىنىش جاساپ, «قارنىنىڭ اشقانىنا ەمەس, قادىرىنىڭ قاشقانىنا» قاپا بولىپ جۇرگەنىن جاسىرمادى. ارينە, رەسپۋبليكالىق ارداگەرلەر كەڭەسى مەن قالالىق اكىمدىك بىرلەسە وتىرىپ, بۇل ماسەلەنى تۇبەگەيلى شەشىپ بەردى.
بۇل كۇندەرى استانا قالاسىنىڭ ءار اۋدانىندا بەلسەندى ۇزاق ءومىر ءسۇرۋ ورتالىعى جۇمىس ىستەپ تۇر. قارتتاردىڭ جاسىن ۇزارتىپ, دەنساۋلىعىن جاقسارتۋ, بەلسەندى ءومىر ءسۇرۋ قاعيدالارىن قالىپتاستىرۋ ماقساتىندا اشىلعان ورتالىقتاردا ءتۇرلى ۇيىرمە مەن سەكتسيا بار. ەسىل اۋدانىنىڭ وزىندە 17 ۇيىرمە, 8 شىعارماشىلىق بىرلەستىك بار. قازاق ءتىلى مەن اعىلشىن ءتىلى, اراب ءتىلى كۋرسى وقىتىلادى. لفك, ترەناجەر زالى, يوگا, تسيگۋن, التسگەيمەر اۋرۋىنىڭ الدىن الۋ, ويلاۋ, ەستە ساقتاۋ قابىلەتىن ارتتىرۋ ماقساتىندا توعىزقۇمالاق, شاحمات, دويبى ۇيىرمەلەرى جۇمىس ىستەيدى. ينتەرنەتتى مەڭگەرەمىن دەيتىندەرگە كومپيۋتەر سىنىبى بار. ورتالىقتىڭ ءبولىم مەڭگەرۋشىسى جانار نۇركەشقىزى جانە اقسۇلۋ شايدوللاقىزى, ماقپال تۇراقپايقىزى, مادەني ءىس-شارالاردى ۇيىمداستىرۋشى ءلاززات دۇسەبايقىزى ورتالىققا كەلەتىن زەينەتكەرلەرگە قالتقىسىز قىزمەت جاساپ, بارلىق تالاپ-تىلەگىن ورىنداۋعا كۇش سالادى.
ءتۇرلى مادەني شاراعا, كونتسەرت, تەاتر, مۇراجايعا اپارىپ, رۋحاني جاعىنان دا جان دۇنيەنى بايىتىپ وتىرادى. سونىمەن بىرگە قوعامداعى بولىپ جاتقان جاڭالىقتاردان حاباردار ەتىپ, جيىن وتكىزەدى.
سونىمەن بىرگە بەلسەندى ۇزاق ءومىر ءسۇرۋ ورتالىعىن اشۋدا تاباندىلىق پەن بەلسەندىلىك تانىتىپ, زور ەڭبەك سىڭىرگەن, بۇگىندە وسى ورتالىقتىڭ ديرەكتورى بوپ جۇرگەن مۇحتار ەركەتاەۆقا ايتار العىسىمىز زور.
قارتتارعا قامقورلىق كورسەتۋدە قاشاندا الدىڭعى شەپتە بەلسەندىلىك تانىتاتىن, اسىرەسە سوعىس ارداگەرلەرى مەن تىل ەڭبەككەرلەرىن نازاردان تىس قالدىرمايتىن ەسىل اۋدانى ارداگەرلەر كەڭەسىنىڭ ءتورايىمى رىستى اتىعاەۆاعا دا ارداگەرلەر ءدان ريزا. جالپى استانا قالاسىنىڭ زەينەتكەرلەرى وزىنە جاسالىپ جاتقان قامقورلىققا ءدان ريزا دەپ ويلايمىن.
ونىڭ ءبىر اتاپ ايتار تۇسى – زەينەتكەرلەردىڭ قوعامدىق كولىكتە تەگىن ءجۇرۋى. بۇل – ەشبىر قالادا جاسالماعان قامقورلىق, قالا اكىمدىگىنىڭ قالا بيۋدجەتىنەن قاراستىرعان شاراسى. سونداي-اق الداعى ۋاقىتتا دارىگەرگە قارالۋدىڭ دا ماشاقاتى وڭتايلى شەشىلمەك, جىلىنا ءبىر رەت دەمالىس-ساناتوريگە تەگىن جولداما بەرىلەتىنىن دە قۋانا جەتكىزگىم كەلەدى.
ەسىل اۋدانى ورتالىعى عيماراتىنىڭ بولمەلەرى كەلۋشىلەرگە تار بولعاندىقتان, ونى كەڭەيتۋدىڭ دە جولدارى قاراستىرىلۋدا. مۇنىڭ ءبارى, ارينە, قارتتارعا جاسالعان زور قۇرمەت, قامقورلىق دەپ بىلەمىز.
قوعامنىڭ بەت-بەينەسى, اقىل-ويى, ونەگە-ۇلگىسى, تاربيە مەكتەبى – قارتتارىمىز امان-ساۋ ءجۇرسىن!
قارلىعاش قۇسپانوۆا,
قر جۋرناليستەر وداعىنىڭ مۇشەسى
