بۇگىنگى تاڭدا استانادا 120 مىڭنان استام قارت ادام تۇرادى. ونىڭ ىشىندە 106 807 ادام جاسى بويىنشا زەينەتكە شىقسا, 13 074 ادام – اسكەري قۇرىلىمدارداعى ەڭبەك ءوتىلى بويىنشا زەينەتكەر اتانعاندار. سونداي-اق ەكىنشى دۇنيەجۇزىلىك سوعىستىڭ 8 ارداگەرى جانە 1473 تىل ەڭبەككەرى بار. مەملەكەت ولارعا قانداي الەۋمەتتىك كومەك پەن قولداۋ كورسەتىپ وتىرعانى تۋرالى ەلوردانىڭ كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىن قالالىق جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەركەبۇلان مالىك مالىمدەدى.
– استانادا جاسى بويىنشا زەينەتكەرلەرگە جىلىنا ءبىر رەت كاتاركول كولىنىڭ جاعاسىنداعى ششۋچە-بۋراباي كۋرورتتىق ايماعىندا «قارتتارعا, مۇگەدەكتىگى بار ادامدارعا جانە مۇگەدەكتىگى بار بالالارعا ارنالعان وڭالتۋ ورتالىعى» شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورنىندا قىزمەت كورسەتىلەدى. جاسى بويىنشا زەينەتكەرلەرگە ساناتورلىق-كۋرورتتىق ەمدەلۋگە جولداما قۇنىنىڭ 25% (56 700 تەڭگە), زەينەتاقىنىڭ ەڭ تومەنگى مولشەرىن الۋشىلار قاتارىنداعى زەينەتكەرلەرگە 18% نەمەسە 40 824 تەڭگە تولەنەدى. سوعىس ارداگەرلەرىنە, سوعىس ارداگەرلەرىنە تەڭەستىرىلگەن ادامدارعا تەگىن. جىل سايىن 3 500-دەن استام زەينەتكەر ساناتورلىق-كۋرورتتىق ەمدەلۋگە تەگىن جىبەرىلەدى. جىل باسىنان بەرى 3 357 ادام جولداما الدى. جالپى, 2023 جىلعا 4 298 ادامدى كۋرورتتىق ەمدەۋمەن قامتاماسىز ەتۋ جوسپارلانعان. بيىل ساناتورلىق-كۋرورتتىق ەمدەلۋگە جازىلۋ وڭالتۋ ورتالىعىمەن جۇرگىزىلەدى, – دەدى ەركەبۇلان مالىك.
سونداي-اق 1 قازاندا اتاپ وتىلەتىن قارتتار كۇنىنە وراي زەينەتكەرلەرگە جاسى بويىنشا 2,5 اەك – 8 625 تەڭگە مولشەرىندە بىرجولعى اقشالاي تولەمدەر تولەنەدى. سونىمەن قاتار, ولارعا ەكى جىلدا ءبىر رەت ءتىس پروتەزدەۋ, ەمدەۋ قىزمەتتەرى كورسەتىلەدى. 2023 جىلى 3 مىڭ ادامعا وسىنداي قىزمەت كورسەتۋ جوسپارلانعان. راسىمدەرگە جازىلۋ ەسەپتى جىلدىڭ ەكىنشى توقسانى ىشىندە جۇرگىزىلەدى.
بۇگىنگى تاڭدا ءتىس پروتەزدەۋ جانە ءتىس ەمدەۋمەن 1 529 ادام قامتىلعان. اتالعان قىزمەتتەرگە تىركەلۋ ەسەپتى جىلدىڭ ەكىنشى توقسانىندا جۇرگىزىلەتىنىن ايتا كەلە, باسقارما باسشىسىنىڭ ورىنباسارى جەر ۇيدە تۇراتىن زەينەتكەرلەرگە كومىر الۋ كەزىندە جەڭىلدىك ۇسىنىلاتىنىن جەتكىزدى. ول ءۇشىن زەينەتكەر تۇراتىن ءۇيدىڭ وتباسىلىق تابىسى جان باسىنا شاققان كەزدە ەڭ تومەن كۇنكورىس دەڭگەيىنىڭ 4 ەسەسىنەن (213 240 تەڭگە) اسپاۋ كەرەك.
– وتەماقى جىلىتۋ ماۋسىمىنا 16 ايلىق ەسەپتiك كورسەتكiش, ياعني 55 360 تەڭگە كولەمىندە جۇرگiزiلەدi. بيىل 99 وتباسىعا وسى كومەك بەرۋ ءۇشىن 5,4 ملن تەڭگە جۇمسالعان. تۇرعىن ءۇيدى گازداندىرۋعا قاراستىرىلعان الەۋمەتتىك كومەكتىڭ مولشەرى 130 ايلىق ەسەپتىك كورسەتكىشتەن اسپايتىن مولشەردە, 448 500 تەڭگە بولۋى كەرەك. ءۇي يەلەرىنە تۇرعىن ءۇي كومەگى اتالعان كومەك كوممۋنالدىق قىزمەتتىڭ ايلىق اقىسى وتباسىنىڭ ايلىق جيىنتىق تابىسىنىڭ 5 پايىزىنان اساتىن بولسا عانا قاراستىرىلادى. تولەمنىڭ ورتاشا مولشەرى ايىنا 25 مىڭ تەڭگەگە دەيىن. زەينەتكەرلەرگە قالالىق جولاۋشىلار كولىگى باعىتتارىندا تەگىن ءجۇرۋ جەڭىلدىكتەرى قاراستىرىلعان, – دەدى ەركەبۇلان مالىك.
2022 جىلدىڭ قاڭتار ايىنان باستاپ ەلوردادا بەلسەندى ۇزاق ءومىر ءسۇرۋ ورتالىعى جۇمىس ىستەيدى. بۇل ورتالىقتا 27 ءتۇرلى باعىتتا ۇيىرمەلەر, سەكتسيالار ۇيىمداستىرىلىپ, سپورت زالى, كومپيۋتەرلىك سىنىپ, ۆوكال, شىعارماشىلىق شەبەرلىك سىنىبىمەن جابدىقتالعان, مادەني ءىس-شارالار, اتاپ ايتساق, پوەزيا كەشتەرى, كىتاپتىڭ تۇساۋكەسەرى جانە ت.ب. تۇراقتى وتكىزىلىپ تۇرادى.
– بۇگىنگى تاڭدا بەلسەندى ۇزاق ءومىر ءسۇرۋ ورتالىقتارىندا 7500-دەن استام زەينەتكەرگە قىزمەت كورسەتىلەدى. قالانىڭ بارلىق اۋداندارىندا وسى ورتالىقتىڭ فيليالدارى بار. ولاردىڭ نەگىزگى ماقساتى – ەگدە جاستاعى ازاماتتاردىڭ ءومىر ءسۇرۋ ساپاسىن جاقسارتۋعا باعىتتالعان جۇيەلى مادەني-دەمالىس شارالارى ءۇشىن ينفراقۇرىلىم قۇرۋ. سونداي-اق استانادا «شاراپات» الەۋمەتتىك قىزمەت كورسەتۋ ورتالىعى قارتتار مەن مۇگەدەكتىگى بار ادامدارعا ساپالى قىزمەت كورسەتۋدىڭ تولىق كەشەنىن ۇسىنادى. الەۋمەتتىك قىزمەت مۇگەدەكتىگى بار ادامدارعا جانە زەينەتكەرلىك جاسقا تولعان, ءوزىن-ءوزى كۇتۋگە قابىلەتسىز جانە دەنساۋلىعىنا بايلانىستى ستاتسيونارلىق جانە ءۇي جاعدايىندا ارنايى الەۋمەتتىك قىزمەتتەردى قاجەت ەتەتىن قارت ادامدارعا كورسەتىلەدى. اعىمداعى جىلى ارناۋلى الەۋمەتتىك قىزمەت تۇرلەرىمەن 1027 ادام قامتىلعان, – دەدى ەركەبۇلان مالىك.
سونىمەن قاتار, قالاداعى مۇگەدەكتىگى بار ادامدارعا جانە زەينەتكەرلىك جاسقا تولعان, ءوز بەتىنشە قىزمەت كورسەتۋگە قابىلەتسىز جانە دەنساۋلىق جاعدايى بويىنشا ستاتسيونار جانە ۇيدە كۇتىم جاساۋ جاعدايىندا ارناۋلى الەۋمەتتىك قىزمەتتەر كورسەتۋگە مۇقتاج قارت ادامدارعا الەۋمەتتىك قىزمەتتەر كورسەتىلىپ كەلەدى.
