بىرەۋگە قارىزعا اقشا بەرىپ, الا الماي ءجۇرسىز بە؟ نەمەسە الدىن الا تولەم جاساعانىڭىزبەن, سىزگە دۇرىس قىزمەت كورسەتىلمەدى مە؟ تولىق اتقارىلعان جۇمىسىڭىزعا ەڭبەكاقى تولەنبەدى مە؟ ونى ءوندىرىپ الۋدىڭ جاڭاشا جولدارى قانداي؟ مىنە, وسى ماسەلەلەر توڭىرەگىندە زاڭداعى كەيبىر وزگەرىستەردى اڭگىمەلەگەن مامان ماقالاسىن ۇسىنامىز.
كەيىنگى كەزدە پيعىلى تەرىس, ويى بوتەن ادامداردىڭ الداۋىنا ءتۇسىپ قالىپ, قارىزىن قايتارا الماي جۇرگەن ادامدار از ەمەس. ولاردىڭ كوبى الاياقتاردان ەشتەڭە وندىرە المايتىنىن سەزگەن سوڭ, ءىستى جىلى جاۋىپ قويىپ جاتاتىنى دا بار. مىنە, زامان تالابىنا وراي وسىنداي ادامداردىڭ ءۇمىتىن وياتاتىن مۇمكىندىكتەر تۋىپ وتىر.
بۇدان بىلاي, قولىڭىزدا بورىشكەردىڭ قارىزدارىن دالەلدەيتىن ناقتى قۇجاتتارىڭىز بولسا, ءارى قۇقىڭىزدىڭ بۇزىلعانىنا ءۇش جىل وتپەسە, الاشاعىڭىزدى ءوندىرىپ الۋ ءۇشىن نوتاريۋستاردان اتقارۋشىلىق جازبا الۋىڭىزعا بولادى.
اتقارۋشىلىق جازبا دەگەنىمىز نە؟ بۇل – اقشا نەمەسە باسقا دا جىلجىمالى مۇلىكتى داۋسىز تالاپ ەتكەن قارىز ءوندىرۋشىنىڭ شاعىمى بويىنشا سوت وتىرىسىنسىز, بورىشكەردىڭ قاتىسۋىنسىز نوتاريۋس بەرەتىن قۇجات.
«اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭعا سايكەس اتقارۋشىلىق جازبا نەمەسە ءتيىستى قاۋلى نەگىزىندە مىناداي داۋسىز تالاپتار بويىنشا:
نوتاريات كۋالاندىرعان مامىلەگە نەگىزدەلگەن مىندەتتەمەنى;
ورىنداۋ مەرزىمى باستالعان جانە مىندەتتەمەنىڭ ورىندالماۋىن بورىشكەر مويىنداعان, ونىڭ ىشىندە داۋدى سوتقا دەيىن رەتتەۋ تارتىبىمەن ءوندىرىپ الۋشىعا جىبەرىلگەن نارازىلىققا جاۋاپتا مويىنداعان, جازباشا مامىلەگە نەگىزدەلگەن مىندەتتەمەنى;
نوتاريۋس جاساعان, تولەم جاسالماۋىنا, اكتسەپتىنىڭ بولماۋىنا جانە اكتسەپت كۇنىنىڭ بەلگىلەنبەۋىنە ۆەكسەل نارازىلىعىنا نەگىزدەلگەن مىندەتتەمەنى; ليزينگ شارتىنا نەمەسە قازاقستان رەسپۋبليكاسىنىڭ زاڭدارىنا سايكەس ليزينگ نىساناسىن تالاپ ەتۋدى; لومبارد كەپىل بەرۋشى-بورىشكەرگە قويعان, كرەديتتى قايتارۋ مەرزىمى وتكەن سوڭ كەپىل نىساناسىنا ءوندىرىپ الۋدى قولدانۋدى;
قوسىمشا شىعىستاردى ءوندىرىپ الۋ تۋرالى تالاپتاردى قوسپاعاندا, «تۇرعىن ءۇي قاتىناستارى تۋرالى» قازاقستان رەسپۋبليكاسىنىڭ زاڭىندا بەكىتىلگەن كوندومينيۋم وبەكتىسىنىڭ ورتاق مۇلكىن كۇتىپ-ۇستاۋعا ارنالعان مىندەتتى شىعىستارعا قاتىسۋدان جالتاراتىن ءۇي-جايلار (پاتەرلەر) مەنشىك يەلەرىنەن بەرەشەكتى;
تولەۋ مەرزىمى باستالعان, جاريا شارتتار نەگىزىندە ناقتى تۇتىنىلعان كورسەتىلەتىن قىزمەتتەر (ەلەكترمەن, گازبەن, جىلۋمەن, سۋمەن جابدىقتاۋ جانە باسقالارى) ءۇشىن, سونداي-اق وزگە دە شارتتار نەگىزىندە بەلگىلەنگەن تاريفتەرگە سايكەس كورسەتىلەتىن قىزمەتتەر ءۇشىن بەرەشەكتى;
جالداۋ تولەمدەرىنىڭ جالداۋ شارتىندا بەلگىلەنگەن مەرزىمدەردە تولەنبەۋىنە بايلانىستى بەرەشەكتى;
جۇمىسكەرگە ەسەپكە جازىلعان, بىراق تولەنبەگەن جالاقى مەن وزگە دە تولەمدەر جونىندەگى بەرەشەكتى ءوندىرىپ الۋعا بولادى.
اتقارۋشىلىق جازبا جاساعاننان نەمەسە ءتيىستى قاۋلى شىعارعاننان كەيىن نوتاريۋس كەلەسى جۇمىس كۇنىنەن كەشىكتىرمەي بورىشكەرگە ولاردىڭ كوشىرمەسىن تابىس ەتەدى نەمەسە جەتكىزىلگەنىن تىركەۋدى قامتاماسىز ەتەتىن بايلانىس قۇرالدارىن پايدالانا وتىرىپ, بورىشكەردىڭ ەلەكتروندىق پوشتا مەكەنجايى بويىنشا نەمەسە بەلگىلى تۇرعىلىقتى جەرى بويىنشا جىبەرەدى.
بورىشكەر اتقارۋشىلىق جازبانىڭ نەمەسە ءتيىستى قاۋلىنىڭ كوشىرمەسىن العان كۇننەن باستاپ ون جۇمىس كۇنى ىشىندە اتقارۋشىلىق جازبانى جاساعان نەمەسە ءتيىستى قاۋلىنى شىعارعان نوتاريۋسقا قويىلىپ وتىرعان تالاپپەن كەلىسەتىن, كەلىسپەيتىندىگىن جازباشا تۇردە مالىمدەۋى ءتيىس.
بۇگىنگى تاڭدا اتقارۋشىلىق جازبا – داۋسىز سيپاتتاعى تالاپتاردىڭ جەدەل ءارى ءتيىمدى شەشىلۋىن قامتاماسىز ەتەتىن ايىرىقشا قۇقىقتىق ءتاسىل ەكەنى دالەلدەنىپ وتىر.
سالتانات جولامانوۆا,
استانا قالاسىنىڭ
نوتاريۋسى
