قالالىق ءماسليحاتتىڭ تۇراقتى كوميسسيالارىنىڭ بىرلەسكەن ءماجىلىسىندە الەۋمەتتىك كومەك كورسەتۋ, ونىڭ مولشەرلەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىنە وزگەرىستەر ەنگىزىپ, ۆەدومستۆوارالىق ەكى كوميسسيانىڭ قۇرامى تۋرالى ءماسليحات شەشىمدەرىن وزگەرتۋلەرمەن تولىقتىردى.
سونىمەن بىرگە, استانا قالاسى ءماسليحاتىنىڭ 2017 جىلعا ارنالعان جۇمىس جوسپارىن تالقىلادى. دەپۋتاتتار جاڭا جىلداعى ءماسليحات سەسسياسىنا قاراۋعا ەنگىزىلەتىن نەگىزگى ماسەلەلەردى ايقىندادى.
ءبىرىنشى ماسەلە بويىنشا استانا قالاسى جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابيلدينوۆ بايانداما جاسادى. ول ەل تاۋەلسىزدىگىنىڭ 25 جىلدىعىنا وراي 1986 جىلعى 17-18 جەلتوقسان وقيعالارى كەزىندە زارداپ شەككەندەرگە 70 مىڭ تەڭگە كولەمىندە ءبىر رەتتىك الەۋمەتتىك كومەك كورسەتۋ تۋرالى ۇسىنىسىن ايتتى.
كەشە وسى ماسەلە بويىنشا قالالىق قوعامدىق كەڭەستە دە تىڭداۋ ءوتتى. جەلتوقسان وقيعاسىنا قاتىسىپ ساياسي قۋعىن-سۇرگىنگە تۇسكەن, بۇگىندە استانا قالاسىندا تۇرىپ جاتقان 19 ادامعا بىرجولعى الەۋمەتتىك تولەم تولەۋ تۋرالى ۇسىنىستى كەڭەس مۇشەلەرى ءبىراۋىزدان قولدادى.
ايگۇل ۋايسوۆا
