ول ۇستازدىق ەتكەن مەكتەپتە بۇگىندە ءومىر ءوز ىرعاعىمەن ءجۇرىپ جاتىر. ارىپتەستەرى ول تۋرالى «ءوز جۇمىسىنا جاۋاپتى, ىسكەر ادام بولىپ ەدى» دەۋدەن ارىگە بارا المادى. «بولار ءىس بولدى, ونى ەندى ەسىمە دە العىم كەلمەيدى» دەدى ەكىنشى ءبىر قاتار جۇرگەن قۇربىسى.
ءبىز دە جۇرەككە قاياۋ ءتۇسىرگەن قاسىرەتتى وقيعانى شيىرلاپ, قايتا ەسكە ءتۇسىرىپ جاتۋعا قۇشتار ەمەسپىز. الايدا ويدى وي قوزعايدى دەمەكشى, جاقىندا مانەرلەپ كوركەمسوز وقۋدان قالالىق وليمپيادا ءوتتى. وسى ءسوز سايىستا اسەمگۇل ەسىمدى قىز بالا باس جۇلدەنى جەڭىپ الدى. وقۋشىنى جەڭىسىمەن قۇتتىقتاپ, وسىنداي جەتىستىككە جەتۋىنە كىم سەبەپشى بولعانىن سۇراعانىمىزدا اڭگىمە اراسىندا قىزدىڭ اناسى «مەنىڭ قىزىمدى ءبىرىنشى سىنىپتان باستاپ ءسوز ونەرىنە باۋلىعان مارقۇم سىنىپ جەتەكشىسى ءاليما مۇراتقىزى ەدى» دەپ اۋىر كۇرسىندى.
قىزدىڭ اناسى جاس ۇرپاققا بەرگەن ونەگەلى ءتالىمىن ايتىپ, ۇلگىلى ىستەرىن ەسكە الىپ وتىرعان ادام تۋرالى ءبىزدىڭ دە تەرەڭىرەك بىلگىمىز كەلدى. ءسويتىپ, تالاي ءبۇلدىرشىننىڭ تالابىن ۇشتاعان, قاناتىن قاتايتقان ۇستاز تۋرالى, ونىڭ قاسىرەتتى تاعدىرىنا بايلانىستى اڭگىمە ءتىنى تارقاتىلا باستادى.
قاتىگەزدىگىنەن قورقاتىنمىن
اياداي ەكى بولمەلى ۇيدە اپاي ءبىزدى ەكى جيەنىمەن بىرگە قارسى الدى. «جۇرەككە وشپەستەي جارا سالعان قاتىگەزدىكتى نەسىنە سۇراي بەرەسىڭدەر؟» دەپ كەيىدى.
وتكەن جىلى دا بىرنەشە جۋرنالشى كەلىپ, سۋىرتپاقتاپ سىر تارقاتقان. قايتالاپ ايتا بەرگىم كەلمەيدى بۇل اڭگىمەنى. ال ەندى قىزىم تۋرالى ايتايىن. بىراق ارتىق ەشتەڭە سۇراما مەنەن» دەپ ءاپ دەگەندە اشىلا قويمادى.
ءاليماشىم قارشادايىنان زەرەك بولىپ ءوستى. ءبىر ايتقاندى قاعىپ الىپ, مۇدىرمەي ايتىپ بەرەتىن. كوپ ولەڭ, جىرلاردى جاتقا بىلەتىن. بەسىنشى سىنىپتا جۇرگەندە اكەسى «باتىرلار جىرى» كىتابىن اكەلىپ بەرىپ, سونىڭ كوپتەگەن بەتتەرىن جاتقا ايتىپ ءجۇردى. ءوزى دە ولەڭ شىعارۋشى ەدى.
ينستيتۋتقا ءوز كۇشىمەن ءتۇستى. ۇزدىك وقىدى. قاتارىنىڭ الدى بولدى. ءسويتىپ ءجۇرىپ مىناعان (اپاي كۇيەۋ بالاسىنىڭ اتىن اتاعىسى كەلمەدى. ءبىز ونى ىشتەي ءتۇسىنىپ وتىردىق) تاپ بولدى.
العاش تانىستىرۋعا ەرتىپ كەلگەننەن-اق ۇنامادى. الايدا, قىزىمنىڭ تاڭداۋىنا قالاي قارسى شىعايىن؟ قاراعىم, انا جۇرەگى الدامايدى عوي. مەن قاتەلەسپەپپىن… (اپاي كوزىنە جاس الدى).
ولار قوسىلعاننان كەيىن ءبىر-ەكى اي وتكەن سوڭ الگى جاۋىز مەنىڭ كوزىمشە الدىنان كەسىپ وتكەن ءبىر مىسىقتى ۇستاپ الىپ باسىن شاۋىپ تاستادى. قىزىما ايتىپ ەدىم «كوڭىلىڭە الما, اپا, ول مىسىقتى بالا كۇنىنەن جەك كورەدى» دەپ ونشا ءمان بەرمەدى.
ماسقارا كەكشىل, قاتىگەز ەدى. باسىنان ءسوز اسىرمايتىن. بىردە ماس بولىپ تۋعان اعاسىمەن توبەلەسىپ, وڭباي تاياق جەدى. سودان ەرتەڭىنە الگى اعاسىنىڭ موتوتسيكلىمەن بىرگە گاراجىن ورتەپ جىبەردى. سولاردىڭ بىرىنەن دە قىزىم ساباق المادى. ەندى, مىنە, نە بولدى؟ ءومىرى قىرشىن قيىلىپ, ەكى بالا تىرىدەي جەتىم قالدى.
ۇستىنە بەنزين شاشىپ, وت قويعان
مىنا زامان جاتىپىشەرلەرگە تاپتىرمايتىن سىلتاۋ بولدى. «ماماندىعىم بويىنشا جۇمىس جوق» دەگەندى جەلەۋ ەتىپ, ول دا جان قيناماۋدى ادەتكە اينالدىردى. تاڭەرتەڭ «جۇمىس ىزدەيمىن» دەپ كەتەدى دە ءتۇس اۋا ىشىمدىككە ماسايىپ كەلىپ,
ۇيقىعا كىرىسەتىن. وسىنى كۇندەلىكتى داعدىعا اينالدىرىپ العاسىن وعان كىم شىدايدى؟ ءۇي ىشىندە داۋ-جانجال, ايقاي شىعىپ, بالالاردىڭ بەرەكەسى كەتە باستادى.
شىدامنىڭ دا شەگى بار. ءاليما كۇيەۋىمەن ءبىرجولاتا ات قۇيرىعىن كەسىسۋگە بەل بايلاپ, سوتقا بەردى. الدىندا دا ءبىر-ەكى رەت سوققىعا جىققانى بار. ونىڭ ۇستىنە وتباسىنداعى ويراندى جاقسى بىلەتىن ەت باۋىر جاقىندارى بۇل شەشىمدى دۇرىس دەدى.
ءسويتىپ, ول ايىرىلىسىپ, ءۇش بولمەلى ءۇيدىڭ ەكى بولمەسى ەكى بالاسىمەن اليماعا, ءبىر بولمەسى كۇيەۋىنە ءتيىستى بولدى. كۇندە ىردۋ-دىردۋ, ماسكۇنەم اداممەن ءبىر شاڭىراقتىڭ استىندا بىرگە تۇرۋ تاعى مۇمكىن بولمادى. امال جوق, ءۇش بولمەنى قالانىڭ ەكى اۋدانىنداعى ءبىر ەكى جانە ءبىر بولمەلى ۇيگە اۋىستىرىپ, قۇلاعى تىنىشتالعانداي بولىپ ەدى. قاتەلەسكەن ەكەن.
ءبىراز ۋاقىت وتكەن سوڭ ول تاعى كەلىپ تۇر. «ءۇيىمدى ساتىپ جىبەردىم. مىناۋ جارتى اقشاسى, بالالارىممەن بىرگە تۇرعىم كەلەدى» دەگەندى ايتادى. كۇيىپ كەتتى. پوليتسيا شاقىرتىپ, ۇيدەن قۋىپ شىقتى.
وسىلاي ونىڭ ومىرىندە ازاپتى كەزەڭ باستالدى. اۋزىنا اراق تيسە بولدى, نەشە ءتۇرلى بىلاپىت سوزدەردى ايتىپ, ەسىگىن ۇرادى دا تۇرادى. پوليتسياعا تاپسىرادى, ءۇش ساعاتتان كەيىن شىعارىپ جىبەرەدى. بۇرىنعىدان دا قاھارىنا ءمىنىپ تاعى كەلەدى.
ءسويتىپ جۇرگەندە سوڭعى رەت ۇلكەن جانجال شىعىپ, ول ايەلىن دە, اراشا تۇسكەن بالالارىن دا سوققىعا جىقتى. ون بەس تاۋلىككە قامالدى.
«ءاليما ومىرىمە قاۋىپ ءتونىپ تۇر» دەپ ىشكى ىستەر ورگانىنا ارىز دا ءتۇسىردى. ولار «تۇرمىستىق كيكىلجىڭ» دەپ ونشا ءمان بەرمەگەن سياقتى. اقىرى سوڭى قايعىلى اياقتالدى.
سول كۇنى مەكتەپكە كۇندەگىدەن ەرتەرەك شىققان. وقۋ جىلى اياقتالۋ قارساڭى بولاتىن. قاربالاس كەزەڭ ەدى. ءبىلىم ۇياسىنا ءۇش ءجۇز مەتر قالعاندا بۇرىنعى كۇيەۋى الدىنان شىقتى. قولىندا ليتر جارىم پلاستماسسا بوتەلكەگە قۇيىلعان سۇيىقتىعى بار.
بۇدان ءارى بولعان وقيعانى جەتپىس جاستاعى كۋاگەر تاتيانا نيكولاەۆنا بىلاي دەپ باياندايدى: «تاڭەرتەڭگى جەتى جارىمنىڭ شاماسى ەدى. بالكوندا تازا اۋا جۇتىپ تۇرعانمىن. مەكتەپكە قاراي ءبىر ايەل كەلە جاتتى. كوپ كەشىكپەي ەكىنشى ءۇيدىڭ بۇرىشىنان ءبىر ەر ادام شىقتى. ەكەۋى بىردەن قاتتى-قاتتى سويلەستى. ءبىر كەزدە الگى ەركەك قولىنداعى
بوتەلكەنىڭ تىعىنىن اشتى دا ىشىندەگى سۇيىقتىقتى ايەلدىڭ ءۇستىنە شاشا باستادى. سودان سوڭ قولىنداعى شىرپىنى تۇتاتتى دا ايەلدىڭ ۇستىنە لاقتىرىپ, ءوزى قاشا جونەلدى. تۇلا بويى وتقا ورناعان ايەل جانۇشىرىپ جەرگە قۇلاپ ءتۇستى. ارى قاراي مەنىڭ بولعان وقيعانى كورۋگە ءداتىم شىدامادى. پوليتسياعا حابارلاماققا تەلەفونعا جارماستىم».
مىنەكي, قىرىق بەس جاستاعى امەن قاناتوۆ ون جەتى جىل وتاسقان ايەلىن وسىلاي تىرىدەي ورتەپ جىبەردى. قۇدايىم سوندايلاردان ساقتاسىن!
تاڭاتار تولەۋعاليەۆ
