قاستەەۆتىڭ قىلقالامى
جاقىندا ەلورداداعى ۇلتتىق مۋزەي قورى ءبىراز جاڭا قۇندى جادىگەرلەرمەن تولىقتى. سولاردىڭ اراسىنان وتاندىق بەينەلەۋ ونەرىنىڭ نەگىزىن سالۋشى, كەسكىندەمە-ءشى, گرافيك-سۋرەتشى, ءبىر سوزبەن ايتقاندا, قازاقتىڭ ءبىرتۋار پەرزەنتى ءابىلحان قاستەەۆتىڭ قولىنىڭ تابى قالعان قىلقالامى كوزىمىزگە جىلى ۇشىرادى.
مۋزەي قىزمەتكەرى ءلايلا نوعايبەكقىزىنىڭ ايتۋىنشا, بيىلعى قىركۇيەك ايىندا الماتى وبلىسىندا مۇراجايعا سىي تارتۋ اكتسياسى وتەدى. سول ايتۋلى شاراعا سۋرەتشىنىڭ قىزى گۇلداريا ابىلحانقىزى دا قاتىسىپ, باس مۋزەيگە اكەسىنىڭ كوزىندەي ساقتاپ جۇرگەن قىلقالامدى سىيلاعان.
ۇلت تاريحىندا تۇڭعىشتار قاتارىندا ەسىمى اتالاتىن ءابىلحان اتامىزدىڭ ورنى بولەك. الىس اۋىلداعى تاۋدا قوي باعىپ ءجۇرىپ, بۇرىن بابالارى كاسىپ ەتپەگەن بەينەلەۋ ونەرىنە بەيىم بولعان جاس ورەننىڭ ءومىر جولى كىتاپتاعىداي ۇزاق حيكايالارعا تولى. قازاق دالاسىنا العاش پاروۆوز داۋىسىن الىپ كەلگەن تۇركسىب تەمىرجول قۇرىلىسىنان باستالعان جاس سۋرەتشىنىڭ ەڭبەك جولى ءبىرتالاي بەلەستەرگە جەتەلەدى. دارىندى جىگىتتىڭ بويىنداعى وزگەشە قابىلەتتى بايقاعان سول زامانداعى قازاق ونەرىنىڭ جاناشىر ازاماتتارى 1929 جىلى ونى ماسكەۋدەگى كوركەمسۋرەت ستۋدياسىنا وقۋعا جىبەرەدى. بۇل ستۋديا قاستەەۆتىڭ تالانتىن ودان ءارى ۇشتاي ءتۇستى. وسىنداعى بەينەلەۋ ونەرىنىڭ بىلگىرلەرى حلۋدوۆ پەن برودسكيدەن ءدارىس الادى. سۋرەتشىلىكتىڭ قىر-سىرىن مەڭگەرەدى. ەندى ءابىلحان اتامىز ەلىمىزگە ماسكەۋ كورگەن, ونداعى عاجايىپ ونەردىڭ تىلسىم قۇپياسىن مەڭگەرگەن كاسىبي قىلقالام شەبەرى بولىپ ورالىپ, قازاقستانداعى بۇرىن بولماعان جاڭاشا ونەرگە جول سالدى. ۇلكەن ءبىر ۇلتتىق مەكتەپ قالىپتاستىردى. ودان قانشاما تالانتتى بۋىن ءوسىپ شىقتى.
كورنەكتى تۇلعانىڭ ءبىز ءسوز ەتىپ وتىرعان قىلقالامىنان قازاق ءومىرىنىڭ الۋان كورىنىستەرىن شىنايى بەدەرلەگەن مىڭنان استام تۋىندىلار تۋدى.
اسىرەسە, سۋرەتشىنىڭ «تۇركسىب», «امانكەلدى ساربازدارى», «مەكتەپ», «جاس اباي», «گۇل اشقان الما», «جامبىلدىڭ پورترەتى», «مەنىڭ وتانىم» جانە ت.ب. كارتينالارى شىنايى تابيعيلىعىمەن ەرەكشەلەنەدى.
قالاي ايتساق تا, قازاقتىڭ بەينەلەۋ ونەرىنىڭ اتاسى اتالعان قاستەەۆ قىلقالامى – حالقىمىز ءۇشىن باعا جەتپەس قۇندى جادىگەردىڭ ءبىرى.