قاسىم-جومارت توقاەۆ: جەتىستىككە جەتكىسى كەلەتىن ادام ونىڭ جولىن ىزدەيدى جانە تابادى

پرەزيدەنت الدىمەن ەلوردالىق وتباسىلارعا «ءبىر تەرەزە» قاعيداتى بويىنشا زاڭگەرلىك, پسيحولوگيالىق جانە الەۋمەتتىك قىزمەت كورسەتەتىن «جانۇيا» ورتالىعىنىڭ جۇمىسىمەن تانىس­تى. بۇل جەردە دەنساۋلىق ساقتاۋ, ءبىلىم بەرۋ, كاسىپكەرلىك, اتاۋ­لى الەۋمەتتىك كومەك الۋ جانە تۇرعىن ءۇي باعدارلامالارىنىڭ ورىندالۋى جايىندا كەڭەس الۋعا بولادى.ورتالىقتىڭ باستامالارىن جوعارى باعالاعان مەملەكەت باسشىسى اتالعان مەكەمەنىڭ تاجىريبەسىن ەلىمىزدىڭ بارلىق ايماقتارىندا ىسكە اسىرۋ كەرەك ەكەنىن ايتتى. سونىمەن قاتار پرەزيدەنت ورتالىقتىڭ بازاسىندا ىسكە اسىپ جاتقان «كاسىپكەر انا» جوباسىنىڭ قاتىسۋشىلارىمەن دە اڭگىمەلەستى.
– ءبىزدىڭ ەلىمىزدە جۇمىس ىستەپ, جەتىستىككە جەتكىسى كەلەتىن ادام ونىڭ جولىن ىزدەيدى جانە تابادى. «ىزدەگەن جەتەر مۇراتقا» دەدى ­قاسىم-جومارت توقاەۆ.

ەلورداداعى №23 ورتا مەكتەپتى ارالاۋ بارىسىندا نۇر-سۇلتان قالاسىنىڭ اكىمى التاي كولگىنوۆ پرەزيدەنتكە استانانى دامىتۋ جونىندەگى كەڭەستە بەرىلگەن تاپسىر­مالاردىڭ ورىندالۋى تۋرالى باياندادى. قالا باسشىسى بيىل 5 مىڭ ورىندىق 6 جاڭا مەكتەپ, ال 2020 جىلى 10 مىڭ ورىندىق 12 مەكتەپ پايدالانۋعا بەرىلەتىنىن ءمالىم ەتتى.
مەملەكەت باسشىسىنا ەلوردا تۇرعىندارىنىڭ 25 پايىزى تۇراتىن قالا اۋماعىنداعى 16 تۇرعىن ءۇي الابىن دامىتۋ جونىندەگى تاپسىر­مالارىنىڭ جۇزەگە اسىرىلۋ جايىندا دا مالىمەت بەرىلدى. سونداي-اق التاي كولگىنوۆ قازىرگى ۋاقىتتا قالادا ءۇش اۋىسىمدى 8 مەكتەپ بارىن, وسى ماسەلەنى شەشۋ ءۇشىن جىل سايىن 12 مەكتەپ سالۋ قاجەتتىگىن جەتكىزدى. بۇقارالىق سپورتتى دامىتۋ ماقساتىندا 4 جاڭا سپورت نىسانىنىڭ قۇرىلىسى باستالعانىن دا حاباردار ەتتى.
مەملەكەت باسشىسى №23 مەكتەپتىڭ ماتەريالدىق-تەحنيكالىق بازاسىمەن تانىسىپ, وقۋ كابينەتتەرىن ارالادى, وقۋشىلارمەن جانە مۇعالىمدەرمەن ءاڭ­گى­مەلەس­تى. مۇعالىمدەر پرەزيدەنتكە مەكتەپتىڭ قاجەتتىلىكتەرى تۋرالى ايتتى.
قاسىم-جومارت توقاەۆ مەكتەپ­تىڭ تۇيتكىلدى ماسەلەلەرىمەن تانىس ەكەنىن, اتالعان اۋداندا قىسقا مەرزىم ىشىندە جاڭا مەكتەپ سالۋ جونىندە تاپسىرما بەرگەنىن اتاپ ءوتتى.
– بۇل – ىسكە اساتىن جوسپار. سىزدەرگە الداعى ۋاقىتتا جاڭا مەكتەپتە جۇمىس ىستەۋگە مۇمكىندىك بولادى, – دەدى مەملەكەت باسشىسى. «Astana يۋتاريا Ltd» ءوندىرىس­تىك-يننوۆاتسيالىق كومپانياسىنا بارعان قاسىم-جومارت توقاەۆ كاسىبي تىگىن جابدىقتارىن قۇراستىرۋمەن ءارى جەتكىزۋمەن اينالىساتىن, ارنايى كيىمدەر مەن باسقا دا تۇرمىستىق جانە تەحنيكالىق بۇيىمدار شىعاراتىن مەكەمەنىڭ جۇمىسىمەن تانىستى. بۇل فابريكادا 460 ادام جۇمىس ىستەيدى, سونىڭ ىشىندە 45-ءى حالىقتىڭ الەۋمەتتىك ءالسىز توبىنا جاتادى.
پرەزيدەنت شىعارىلاتىن ونىمدەردىڭ ساپاسى مەن سۇرانىسقا يە بولۋىن وڭ باعالاپ, كومپانيانىڭ ەكسپورتتىق الەۋەتىنە نازار اۋداردى. مەكەمە قىزمەتكەرلەرىمەن اڭگىمەلەسۋ بارىسىندا ولاردىڭ ەڭبەگىنىڭ ەلىمىز ءۇشىن ماڭىزدى ەكەنىن اتاپ ءوتتى. سونداي-اق ول مەملەكەتتىڭ حالىقتىڭ الەۋمەتتىك ءالسىز توپتارىنا قولداۋ كورسەتەتىنىن جانە وسىنداي جاندار ءۇشىن جۇمىس ورىندارىن اشاتىن مەكەمەلەرگە ارقاشان كومەك بەرەتىنىن ايتتى.
– سىزدەردىڭ فابريكالارىڭىزدى ۇلكەن قىزىعۋشىلىقپەن ارالاپ شىقتىم. شىن مانىندە, بۇل – قاجەتتى ءارى وزىق ءونىم شىعاراتىن جانە جاقسى جابدىقتالعان الەۋمەتتىك-جاۋاپتى كاسىپورىن. ەڭ باس­تىسى, مۇندا سىزدەر سياقتى ىسمەر ادامدار جۇمىس ىستەيدى, – دەدى  قاسىم-جومارت توقاەۆ.