ادام ومىرگە كەلگەن سوڭ ونىڭ بولاشاق تاعدىرى, ءومىر جولىنىڭ سوقپاعى قالاي بولاتىنىن باعدارلاي المايتىندىقتان, ءتۇرلى جاعدايلارعا تاپ بولىپ جاتادى. تۇمانمەن تۇمشالانعان وتكەن ءومىرى تۋرالى وسى ماقالادا پسيحولوگيالىق كەڭەسكە جۇگىنۋشى سارا جايلى باياندالادى.
ءومىردىڭ قيلى شىرعالاڭىنا تۇسكەن سارا اتا-انادان 3 قىز, 1 ۇل. جاستايىنان 4 بالا اناسىز جەتىم قالادى. بالالىق شاقتارى باقىتتى بولدى دەپ ايتۋعا مۇلدەم كەلمەيدى. اناسىنىڭ جىلى وتپەي جاتىپ اكەسى ۇيلەنەدى. وگەي انا قاتالدىعىمەن, قاتىگەزدىگىنىڭ سالعان جان جارالارى ەسەيسە دە جازىلماعان. دەنساۋلىعىنا ءاتۇستى قاراعاندىقتان, وكپەسىنە سۋىق ءتيىپ اۋرۋحانا توسەگىنە تاڭىلعان جەتكىنشەك, بولاشاقتان ءۇمىتىن ۇزەدى. ورتا بىلىممەن قالىپ قويعان سارا 2000 جىلداردا وڭتۇستىك ءوڭىرىنىڭ ءبىر مەشىتىندە ءدىني ساۋات اشادى. سول جىلدىڭ ءساۋىر ايىندا مەشىتتە ءدارىس الىپ جۇرگەن جىگىتپەن تانىسىپ شاڭىراق كوتەرەدى. ومىرگە 1 ۇل, 2 قىز الىپ كەلەدى.
جولداسى ۋاقىت وتە كەلە جات اعىمنىڭ قۇرىعىنا ءتۇسىپ, كۇرت وزگەرە باستايدى. ۇستانىمى وزگەرگەن جولداسى ساراعا ءتۇرلى تىيىمدار سالىپ, ودان باسقا دا ۇلتتىق, ءداستۇرلى قۇندىلىقتارعا دا شەكتەۋلەر قويا باستايدى. جاقىن تۋىستارىمەن, باۋىرلارىمەن دە قارىم-قاتىناسىنا قويىلعان شەكتەۋلەردەن ارالارىندا سالقىندىق پايدا بولادى. وتباسىلىق ومىردەن ايتا الاتىن ەستەلىكتەرى ارازداسۋ, رەنجىسۋ, تۇسىنىسپەۋشىلىكتەرمەن ورىن العانىن العا تارتادى. قول كوتەرۋ, كەمسىتۋ, ايەل رەتىندە باعالاماۋدىڭ سوڭى ءتىپتى كوزىنە ءشوپ سالۋمەن اياقتالعان. وسى جاعدايعا دا كونىپ, وتباسىلىق ءومىرىن بالالارى ءۇشىن شىداپ جالعاستىرا بەرگەن سارا, بىرنەشە جىلدان سوڭ جولداسىمەن ءبىر شاڭىراق استىندا تۇرا المايتىنىن ءتۇسىنىپ اجىراسۋعا بەل بۋعان. اجىراسۋدان كەيىن اكە بالالارىنىڭ ءومىرى ءۇشىن جاۋاپسىز ەكەنىن ايقىنداپ بەردى. قانداي دا ءبىر كومەك كورسەتۋدەن باس تارتادى.
اجىراسۋدىڭ سالدارى ساراعا وتە اۋىر بولعانى سونشالىق, ءولىم تۋرالى ءجيى ويلاي باستاعان, بىراق وڭالتۋ ورتالىعىنا كەلىپ كەڭەس الۋ ارقىلى ويىنىڭ وزگەرگەنىن, بالالارى ءۇشىن ءومىر ءسۇرۋ كەرەك ەكەنىن ءتۇسىنىپ, ارقاشان العا ۇمتىلاتىنىن ايتىپ, ءوز ويىمەن ءبولىستى. وتان وت باسىنان باستالاتىنىن ەسكەرسەك, جالعان ءدىني يدەيالاردى ۇستانۋشىلاردىڭ بەيادەپ ارەكەتتەرى ەلىمىزدىڭ بولاشاعىنا كەرى اسەرىن تيگىزۋى مۇمكىن. سوندىقتان مەملەكەتتىك, وتباسىلىق, ۇلتتىق قۇندىلىقتاردى باسىمدىق رەتىندە قاراستىرۋىمىز قاجەت. اڭگىمە سوڭىندا سارانىڭ جاس بالاشا قيماستىقپەن قاپسىرا قۇشاقتاپ ۇزاق تۇرعانى, ادامداردان ءالى دە بولسا جىلۋلىق پەن مەيىرىمدىلىك اڭسايتىنىن بايقاتادى.
(كەيىپكەرلەردىڭ اتى وزگەرتىلگەن)
نۇرگۇل رۇستەم
