كەشە «ەكسپو-2017» كورمەسىنە قاتىسۋعا تىلەك بىلدىرگەن ەلدەردەن ءوتىنىش قابىلداۋ مەرزىمى اياقتالدى. سونىمەن, ەلوردا تورىندە وتەتىن ايتۋلى شاراعا 115 مەملەكەت پەن 20 حالىقارالىق ۇيىم قاتىساتىن بولدى. ال 82 ەلدىڭ ۇلتتىق كۇنى بەلگىلەندى.
«ەكسپو-2017» كورمەسىنىڭ اشىلۋىنا تۋرا 72 كۇن قالدى. بۇگىندە ۇيىمداستىرۋ جۇمىستارى اياقتالعان. شەتەلدىك قاتىسۋشىلاردىڭ الدى ءوز پاۆيلوندارىن جاساقتاۋعا كىرىسىپ كەتتى.
– «ەكسپو-2017» حالىقارالىق كورمەسىنە ناقتى 115 ەل قاتىساتىن بولدى. ولاردىڭ كوبى كورمە اۋماعىندا ورنالاسقان پاۆيلونداردا دايىندىق جۇمىستارىن جۇرگىزۋدە. ەلىمىز كورمەگە قاتىساتىن مەملەكەت پەن ۇيىمدار سانى جونىنەن رەكوردتىق كورسەتكىشكە جەتتى. مۇنى حالىقارالىق كورمە بيۋروسى دا راستادى, – دەيدى «استانا ەكسپو-2017» ۇلتتىق كومپانياسى كوممەرتسيالىق دەپارتامەنتى ديرەكتورىنىڭ ورىنباسارى يليا ورازاقوۆ.
قازاقستان وسىلايشا كورمەگە قاتىسۋشى ەلدەردىڭ سانى جاعىنان العاشقى ۇشتىككە ەنبەكشى. كەزىندە وزدەرى ۇيىمداستىرعان كورمەگە 140 ەلدى قاتىستىرعان پورتۋگاليا كوش باستاسا, ودان كەيىنگى ورىندى 121 ەلدىڭ باسىن قوسقان قىتاي يەلەنگەن ەكەن.
جالپى, قاتىسۋشى ەلدەرگە كورمە اۋماعىنان پاۆيلوندار ۇلەستىرۋ ارناۋلى كەلىسىمشارت بويىنشا تەگىن جۇرگىزىلۋدە. بىراق, جابدىقتاۋ جۇمىستارىنا كەتكەن شىعىندى قاتىسۋشى ەل وزدەرى كوتەرەدى. بۇيىرتسا, ءساۋىر ايىنىڭ سوڭىنا دەيىن پاۆيلونداردى جابدىقتاۋ جۇمىستارى تۇگەل اياقتالادى.
«قازىرگى ۋاقىتتا حالىقارالىق ۇيىمدار عانا كورمەگە قاتىسۋعا ءوتىنىش بەرە الادى. الداعى جۇمىستاردىڭ نەگىزى باعىتى – ەكسپوزيتسيالارعا نازار اۋدارۋ. ءاربىر مەملەكەت كورمە قوناقتارىنا وزدەرىنىڭ يننوۆاتسيالىق ونىمدەرى مەن مادەنيەتىن ۇسىنادى. كورمەگە ۇسىناتىن جوبالارىنا دا تالاپ قويامىز» دەپ تۇيىندەدى يليا ورازاقوۆ.
گۇلميرا
ايماعانبەت,
«استانا اقشامى»
