ەرتەڭ – كولىك قىزمەتكەرلەرى كۇنى. ساۋلەتى مەن داۋلەتى وركەندەي تۇسكەن ەلوردامىزدا كولىك سالاسىنىڭ الار ورنى ايرىقشا. بۇگىنگى تاڭدا استانادا كولىك كەشەنىن دامىتۋدا بىرقاتار ىرگەلى جوبالار جۇزەگە اسىرىلۋدا.
جاقىندا «الاي – Astra» جانە «كەڭمارت – Astra» دەپ اتالعان قالا ىرگەسىندە تۇراتىن جولاۋشىلارعا قىزمەت كورسەتەتىن ەكى اۆتوبەكەت اشىلدى. بۇل ءبىر جاعىنان ۇلكەن كوشەلەر جەلىسىنە تۇسەتىن جۇكتەمەنى جانە «استانا» تەمىر جول ۆوكزالى مەن «ساپارجاي» اۆتوبەكەتى ماڭىنداعى كەپتەلىستى ازايتادى.
بيىل قوعامدىق كولىك جۇرەتىن «Bus Lane» جولاعىنىڭ 12 ۋچاسكەسى قوسىلدى. قالاداعى ونىڭ جالپى سانى – 24, ال ۇزىندىعى 79 كم قۇرايدى. جاڭارتىلعان قوعامدىق كولىكتەردىڭ قاتارى كوبەيدى. قوسىمشا ەكسپرەسس مارشرۋتتارى مەن تۇنگى مەزگىلدە جۇرەتىن باعدارلار قوسىلدى. ەلەكتروندىق جولاقى جۇيەسى ەنگىزىلدى. قازىرگى كۇندە 27 جابىق جىلى ايالداما ورناتىلعان. كوپتى الاڭداتىپ جۇرگەن تاعى ءبىر تىڭ ماسەلە بار ەدى. ول – اۆتوتۇراقتاردىڭ جاعدايى. قازىر بۇل دا جولعا قويىلىپ كەلەدى.
اقىلى اۆتوتۇراقتاردى ەنگىزۋ باستالدى. اتالعان جوبا الەمدىك تاجىريبەگە سۇيەنىپ قولعا الىندى. تاكسي قىزمەتىندە بىرقاتار جاڭالىقتار جەتەرلىك. ايتا بەرسە, اتقارىلىپ جاتقان شارۋا كوپ. سونىڭ بارلىعى استانانىڭ كولىك كەشەنىن ىلگەرلەتۋگە باعىتتالعان ماڭىزدى جوبالار دەپ ايتامىز.
كەشە قالالىق جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ ايتۋلى كاسىبي مەرەكەگە وراي وسى سالادا جەمىستى ەڭبەك ەتىپ جۇرگەن ءبىر توپ قىزمەتكەردى ماراپاتتادى.
جيىن بارىسىندا باسقارما باسشىسى بەكمىرزا يگەنبەردينوۆ سالا بويىنشا اتقارىلىپ جاتقان جۇمىستارعا قىسقاشا توقتالىپ, جينالعانداردى كاسىبي مەرەكەلەرىمەن قۇتتىقتادى.
«كولىك سالاسىنىڭ قىزمەتكەرلەرىنىڭ ەڭبەگى ەرەن.
ولاردىڭ ءبارى – حالىقتىڭ كوز الدىندا. جولاۋشىلارعا ساپالى قىزمەت كورسەتۋ – ءبىزدىڭ باستى ماقساتىمىز. وسى باعىتتا ءالى تالاي بىرلەسىپ جۇمىس ىستەيمىز. كاسىبي مەرەكەلەرىڭىز قۇتتى بولسىن» دەپ ءبىر توپ ازاماتقا «ۇزدىك اۆتوكولىكشى» بەلگىسىن تاپسىردى. ماراپاتقا يە بولعاندار قاتارىندا «№1 اۆتوبۋس پاركى» اق-نىڭ باس ينجەنەرى داۋلەتبەك نازىمبەكۇلى, كولوننا باستىعى ەرجان يبراەۆ, جولاۋشىلار كولىگى باسقارماسىنىڭ ءبولىم باسشىلارى تۇرسىنعالي جاكەنوۆ, باۋىرجان تايبەرگەنوۆ سەكىلدى ازاماتتار بار.
سونداي-اق, «№2 اۆتوبۋس پاركى» جشس-ءنىڭ ينجەنەرى الەكساندرا شەۆچەنكو مەن وندىرىستىك-تەحنيكالىق ءبولىمىنىڭ باسشىسى ۆالەنتينا كاركاريناعا «قۇرمەتتى اۆتوكولىكشى» بەلگىسىن الدى.
– مەن №2 اۆتوبۋس پاركىندە 40 جىلدان بەرى جۇمىس ىستەيمىن. بارلىق عۇمىرىمدى ارنادىم دەسەم دە بولادى. ءوز ۇجىمىمدى سونداي جاقسى كورەمىن. ءبىر وتباسىنىڭ مۇشەسىندەي ەڭبەك ەتىپ كەلەمىز. ارينە, ەپتەپ تولقىپ تۇرمىن. وسىنداي قۇرمەتكە تالاي ارىپتەستەرىم لايىق. ولاردىڭ دا ەڭبەگى جانسا دەپ ويلايمىن. قۇرمەتتەپ, قادىرلەپ جاتقان ازاماتتارعا العىسىمدى بىلدىرەمىن, – دەيدى كەۋدەسىندە «قۇرمەتتى اۆتوكولىكشى» بەلگىسى جارقىراعان الەكساندرا شەۆچەنكو دەگەن اپايىمىز.
شارا سوڭىندا كولىك قىزمەتكەرلەرى اراسىنداعى بيلياردتان وتكەن جارىستا جەڭىمپاز اتانعان مەكەمەلەرگە ارنايى جۇلدەلەر تابىستالدى.
ازامات ەسەنجول
