ساۋدا جاساعاندا نەمەسە تاپسىرىس بەرگەندە ەڭ ءبىرىنشى نەنى ەسكەرۋ كەرەك؟
تورتتى كىمنەن الاسىز؟
قازىرگى تاڭدا مەرەكەلەردى, تۋعان كۇندەردى تورتسىز قارسى الۋ مۇمكىن ەمەس. سوعان وراي, تورتتى ۇيدە وتىرىپ-اق ءپىسىرىپ, الەۋمەتتىك جەلى ارقىلى كاسىبىن ءدوڭگەلەتىپ وتىرعاندار از ەمەس بۇگىندە. تۇرعىندار تاراپىنان دا ۇيدە پىسىرىلەتىن تورتقا سۇرانىس جاقسى. ارينە, ۇيدە پىسىرىلەتىن كونديتەر ونىمدەرى كوزدىڭ جاۋىن الىپ, ءدامى ءتىل ۇيىرەدى. «زياندى قوسپالارسىز تابيعي ونىمدەردەن جاسالادى» دەگەن جارناماسى دا نازار اۋدارادى. بىراق ونىڭ ساپاسىنا قانشالىقتى ءمان بەرىلەدى؟ كونديتەرلىك قوسپا بۇيىمدارى تاماقتان ۋلانۋدىڭ ءجيى سەبەپكەرى بولىپ جاتقانىن بىلەسىز بە؟ ۇيدە پىسىرىلەتىن تورتتاردىڭ قۇرامىندا گليۋكوزا مەن قانتتىڭ كوپ بولۋى باكتەريانىڭ كوبەيۋىنە, توكسيندەردىڭ جينالۋىنا اسەر ەتەدى. ۋلانۋ جاعدايلارى كوبىنە مەرزىمى وتكەن ونىمدەردى پايدالانۋ نەمەسە دايىنداۋ تەحنولوگياسىن بۇزۋشىلىقپەن جانە تالاپقا ساي ەمەس ورىنداردا دايىندالۋىنىڭ سالدارىنان بولادى. ولاردىڭ قاۋىپسىزدىگىن راستايتىن قۇجاتتارى دا جوق. قاراپايىم جەكە باس گيگيەناسى دا ساقتالمايدى, ونىمەن قوسا ءبىر رەتتىك قولعاپتار دا قولدانىلمايدى. ولاردىڭ مەديتسينالىق قاراۋدان وتكەندىگى دە كۇمان تۋدىرادى. سونداي-اق, ۇيدە تورت پىسىرۋشىلەردىڭ تۋبەركۋلەز نەمەسە ينفەكتسيالىق اۋرۋلاردى تاسىمالداۋشى بولۋى دا عاجاپ ەمەس. سول سەبەپتى مەكەنجايى مەن ساقتاۋ مەرزىمى ناقتى كورسەتىلگەن ءونىمدى عانا ساتىپ الىڭىز.
ساقتاۋ مەرزىمىنە مۇقيات قاراڭىز
بالالار تاعامىن ساتىپ الاردا تۇتىنۋشىلار ەڭ الدىمەن ءونىم مەن ءوندىرۋشى تۋرالى اقپاراتپەن مۇقيات تانىسىپ, پايدالانۋعا بولاتىن مەرزىمگە, ءوندىرىلۋ ۋاقىتىنا جانە ساقتاۋ مەرزىمىنە كوڭىل اۋدارۋى قاجەت. ساقتاۋ مەرزىمى وتكەن تاۋاردى ساتۋعا مۇلدە بولمايدى. مۇنى ءاربىر تۇتىنۋشى ءبىلۋى ءتيىس. تاڭبالانۋى دۇرىس كورىنبەيتىن ءونىمدى دە ساتىپ الماۋ كەرەك. ونىڭ ساقتاۋ مەرزىمىن ءبارىبىر انىقتاي المايسىز. سونىمەن قاتار, جىل مەزگىلىن دە ەسكەرگەن ءجون. سەبەبى قىسقى ۋاقىتقا قاراعاندا جازدا ازىق-تۇلىكتەر تەز بۇزىلادى. ال ىرىمشىك ساتىپ الۋ كەزىندە تەمپەراتۋرالىق ساقتاۋ رەجيمىنە اسا كوڭىل اۋدارعان ابزال. مىسالى, -18 گرادۋستا ساقتالاتىن ىرىمشىكتىڭ مەرزىمى 4 ايعا جەتسە, +6 گرادۋستاعى ءونىم 21 تاۋلىكتەن ارى اسپايدى. ءونىمدى تاڭداعان كەزدە ونىڭ سىرتقى تۇرىنە دە مۇقيات قاراعان دۇرىس. ماسەلەن, ءسۇت ءونىمىنىڭ ورامى, تەمىردەن جاسالعان بانكىلەر تىرسيماۋى ءتيىس. ياعني قاپشىقتارى ىسىنبەگەن, كىرلەنبەگەن, شاڭ باسپاعان بولۋى ءلازىم. يوگۋرتتەردى دە ساتىپ العاندا ەرەكشە ءمان بەرىڭىز. ولاردىڭ قاقپاعىنا سىزات تۇسپەي, جىرتىلماعان بولۋى قاجەت. ايتپەسە ميكروبتار زەڭنىڭ پايدا بولۋىنا سەبەپكەر بولادى.
جاس انالار نەنى ەسكەرۋى ءتيىس؟
بالالاردى ۇيدە تاماقتاندىراتىن انالاردىڭ قۇلاعىنا التىن سىرعا, قۇرعاق قوسپالار مەن بوتقانى ساتىپ الۋ, ونى اشۋ كەزىندە ساقتالۋ مەرزىمى وتە شەكتەۋلى ەكەندىگىن ەسىڭىزدە ساقتاڭىز. نەگىزىندە, بۇل 2-3 اپتا ساقتالادى, ول تۋرالى ءونىم سىرتىندا كورسەتىلەدى. بىراق بالا ەگەر ءبىر ورام قوسپانى جەپ ۇلگەرمەگەن جاعدايدا, ونى ەكىنشى رەت قولدانباڭىز. بالالار تاعامىن كوپ كولەمدە ەرتە دايىنداۋعا دا بولمايدى. قاقپاعى اشىق ءونىمدى ەكى كۇننەن ارتىق توڭازىتقىشتا قالدىرماڭىز. بالالاردىڭ تاعامدارى وتە تەز بۇزىلادى. سول سەبەپتى ءسۇت ءونىمى مەن بانكىدەگى ەزبەنى توڭازىتقىشتىڭ ۇستىڭگى سورەسىنە قويۋ كەرەك. ىشەك ينفەكتسياسى مەن استان ۋلانۋدىڭ الدىن الۋ ءۇشىن ءسۇتتى پايدالانباس بۇرىن قايناتۋ قاجەت. جەكەلەگەن ساتۋشىلاردان ساپاسى تەكسەرىلمەگەن ءسۇت ونىمدەرىن مۇلدە الماڭىز. بالالارعا بۇرىن ءدامىن كورمەگەن جاڭا ءونىمدى دە بىردەن بەرمەڭىز. بۇل قاراپايىم ەرەجەلەردى ساقتاماۋ بالالارعا ۇلكەن قاۋىپ توندىرەدى. ساق بولىڭىزدار!
اينۇر داۋلەتباەۆا,
قوعامدىق دەنساۋلىق ساقتاۋ دەپارتامەنتى
تاعام نىساندارىن سانيتارلىق-گيگيەنالىق
قاداعالاۋ ءبولىمىنىڭ باسشىسى
