بۇگىن – قازاقستانداعى قۇتقارۋشىلاردىڭ كاسىبي مەرەكەسى. سونىڭ قارساڭىندا جاستار سارايىنىڭ ساحناسىندا ءۇش كۇن بويى بالالارعا ارنالعان «شاعىن پاتشالىقتاعى ۇلكەن وقيعالار» اتتى مۋزىكالىق تەاترلاندىرىلعان قويىلىم ءجۇردى.
«ءار ءۇيدىڭ قاۋىپسىزدىگى ءۇشىن» اتتى قالالىق شارا شەڭبەرىندە قر ءىىم توتەنشە جاعدايلار كوميتەتىنىڭ قولداۋىمەن قويىلعان سپەكتاكلگە جاستار سارايىنىڭ شىعارماشىلىق ۇجىمدارى مەن «م-ارت» تەاتر ستۋدياسىنىڭ اكتەرلەرى قاتىستى. كەيىنگى اتالعان ۇجىمنىڭ رەپەرتۋارىندا 40-تان استام قويىلىم بار. تەاتر ستۋدياسىنىڭ ارتىستەرى شەتەلدەردە تابىستى ونەر كورسەتىپ, سول جاقتىڭ كورەرمەندەرىن دە ءتانتى ەتكەن. سونىڭ ايقىن دالەلى – ماسكەۋدە وتكەن «ارت-ليتسەي» اتتى بۇكىلرەسەيلىك فەستيۆالدىڭ باس جۇلدەسى.
ال مۋزىكالىق تەاترلاندىرىلعان قويىلىم تەك قانا كوڭىل كوتەرۋگە باعىتتالماي, وندا قاۋىپسىزدىك ەرەجەلەرىن ساقتاۋ ماسەلەسى باستى تاقىرىپ ەتىپ شىعارىلدى. سونىڭ ىشىندە ءورتتىڭ الدىن الۋعا, ەلەكتر جانە گاز قۇرالدارىن پايدالانۋعا ءمان بەرىلدى. سونداي-اق, بۇگىن جاستار سارايىندا قۇتقارۋشىلار كۇنىنە ارنالعان مەرەكەلىك كونتسەرت وتەدى.
امانعالي قالجانوۆ
